معرکہ حق کی فتح کا ایک سال مکمل ہونے پر فیلڈ مارشل کی قوم کو مبارکباد

راولپنڈی (اردوپوائنٹ اخبار تازہ ترین ۔ 09 مئی 2026ء ) معرکہ حق کی فتح کا ایک سال مکمل ہونے پر فیلڈ مارشل کی قوم کو مبارکباد۔ پاک فوج کےشعبہ تعلقات عامہ آئی ایس پی آر سے جاری بیان کے مطابق فیلڈ مارشل سید عاصم منیر سمیت عسکری قیادت نے معرکہ حق کی فتح کا ایک سال مکمل ہونے کے پُرمسرت اور تاریخی موقع پر پوری قوم کو مبارکباد دی ہے۔ فیلڈ مارشل سید عاصم منیر نے افواجِ پاکستان کے تمام افسران و جوانوں کو بھی دلی مبارکباد دی۔

نیول چیف ایڈمرل نوید اشرف اور ایئر چیف مارشل ظہیر احمد بابر سدھو نے بھی قوم کو مبارکباد دی ہے۔ آئی ایس پی آر کے مطابق یہ اہم دن پیشہ ورانہ مہارت، ہمت اور اتحاد کے پائیدار جذبے کا ثبوت ہے، مسلح افواج ہمیشہ پاکستانی عوام کے شانہ بشانہ کھڑی ہیں۔

(جاری ہے)

مسلح افواج قوم سے لازوال رشتےکوجذبہ خدمت کیساتھ فخر سے نبھا رہی ہیں، معرکہ حق قوم کی تاریخ میں ایک اہم سنگ میل بن گیا ہے۔

یہ دن قومی عزم، عسکری مہارت اور حکمت عملی کی پختگی کا عکاس ہے، معرکہ حق کی کامیابی نے قومی اعتماد کو مضبوط کر دیا۔ معرکہ حق نے پاکستان کو مستحکم علاقائی قوت کے طور پر اُجاگر کیا، پاکستان نے دشمن کی سازشوں اور جھوٹے بیانیے کو بے نقاب کیا۔ پاکستان کی فتح کے بعد دشمن کو عالمی سطح پر رسوائی اٹھانا پڑی، افواج پاکستان کو پراکسی دہشتگردی سمیت روایتی اور ہائبرڈ چیلنجز کا سامنا رہا۔

وزیر اعظم محمد شہباز شریف نے معرکہ حق کا ایک سال مکمل ہونے کے موقع پر اپنے پیغام میں کہا کہ معرکہ حق اللہ تعالیٰ کے بے شمار انعامات اور احسانات پر اُس کے حضور سجدہ شکر بجا لانے کا دن ہے۔ آج ہم اس عزم، جرات اور استقامت کو یاد کر رہے ہیں جس کا مظاہرہ پاکستان نے آزمائش کی گھڑی میں کیا اور دشمن کو عبرتناک شکست سے دوچار کیا۔ وزیر اعظم نے کہا کہ پوری قوم اپنے شہداء، اُن کے اہلِ خانہ اور ان غازیوں کو خراجِ عقیدت پیش کرتی ہے جو فولادی دیوار بن کر اپنے وطن کے دفاع کے لیے ڈٹ گئے۔

بری، بحری، فضائی اور سائبر محاذوں پر ہماری افواج کے مربوط، منظم اور ہم آہنگ ردِعمل نے پاکستان کو ایک ناقابلِ تسخیر قوت کے طور پر منوایا۔انہوں نے کہا کہ معرکہ حق اس حقیقت کی روشن دلیل ہے کہ پاکستانی قوم امن پسند ہونے کے ساتھ ساتھ بہادر، باوقار، ثابت قدم اور غیرت مند قوم ہے، جسے نہ تو مرعوب کیا جا سکتا ہے اور نہ ہی کسی جارحیت کے ذریعے جھکایا جا سکتا ہے۔

معرکہ حق تاریخ میں ایک ایسے عظیم کارنامے کے طور پر ثبت ہو چکا ہے جس میں دشمن کی بلا اشتعال جارحیت کے مقابلے میں پاکستان نے فیصلہ کن برتری حاصل کی۔ دشمن کو حقیقت کا ایسا سبق دیا گیا جس نے اُس کے ناقابلِ شکست ہونے کے زعم کو خاک میں ملا دیا۔ وزیر اعظم نے کہا کہ ہم چیف آف آرمی اسٹاف اور چیف آف ڈیفنس فورسز، فیلڈ مارشل سید عاصم منیر کو اُن کی جراتمندانہ اور دلیرانہ قیادت پر بھرپور خراجِ تحسین پیش کرتے ہیں۔

ہم ایئر چیف مارشل ظہیر احمد بابر اور ایڈمرل نوید اشرف کو بھی اُن کی مدبرانہ حکمتِ عملی پر خراجِ تحسین پیش کرتے ہیں۔ ہم اپنی بہادر مسلح افواج کے افسران اور جوانوں کو بھی سلام پیش کرتے ہیں جنہوں نے پاکستانی قوم کی غیر متزلزل حمایت کے ساتھ پاکستان اور بھارت کے تناظر میں ایک نئے باب کا اضافہ کیا۔پاکستان نے ایک جانب اپنے امن کے عزم کو واضح کیا تو دوسری جانب دفاعی توازن کو بحال کرتے ہوئے اپنی سلامتی، خودمختاری اور علاقائی سالمیت کا بھرپور تحفظ یقینی بنایا۔

وزیر اعظم نے کہا کہ اس امر میں کوئی شبہ نہیں ہونا چاہیے کہ پاکستان کو کمزور کرنے یا اس کے خلاف کسی بھی جارحیت کا فوری، مؤثر اور ہمہ جہت جواب دیا جائے گا۔ ہم اپنی سرحدوں کے دفاع اور تحفظ کے لیے پُرعزم اور مکمل طور پر چوکس ہیں۔ پاکستان’’فتنہ الخوارج‘‘ اور ’’فتنہ الہندوستان‘‘ کے مکمل خاتمے اور دہشت گردی کے ناسور کو منطقی انجام تک پہنچانے کے لیے بھی ثابت قدمی سے اپنی کوششیں جاری رکھے گا۔

انہوں نے کہا کہ پاکستان کا تذکرہ ’’کشمیر‘‘ کے بغیر مکمل نہیں ہو سکتا، جو برصغیر کی تقسیم کا نامکمل ایجنڈا ہے۔ مسئلہ کشمیر کے حل کے بغیر جنوبی ایشیا میں پائیدار تزویراتی استحکام کا خواب شرمندہ تعبیر نہیں ہو سکتا۔ یہ مسئلہ اقوامِ متحدہ کی قراردادوں اور کشمیری عوام کی امنگوں کے مطابق حل ہونا چاہیے۔ پاکستان کشمیری عوام کے حقِ آزادی اور حقِ خودارادیت کی ہمیشہ بھرپور حمایت جاری رکھے گا۔

وزیر اعظم نے کہا کہ آج پاکستان کو ایک ذمہ دار ملک کے طور پر تسلیم کیا جا رہا ہے، جو نہ صرف اپنے دفاع کی بھرپور صلاحیت رکھتا ہے بلکہ عالمی امن اور استحکام کے ضامن کے طور پر بھی ابھرا ہے۔ امریکہ اور ایران کے درمیان جاری تنازع میں ایک اہم ثالث کے طور پر پاکستان کے کردار اور قیامِ امن کے لیے ہماری مسلسل کوششوں کو عالمی سطح پر سراہا گیا ہے۔

پاکستان تنازع کے پُرامن حل کے لیے اپنی کاوشیں جاری رکھنے کے عزم پر قائم ہے۔ انہوں نے کہا کہ آئیے، آج معرکہ حق کا ایک سال پورا ہونے پر اپنے شہداء کی عظیم قربانیوں کو یاد کرتے ہوئے اس عہد کی تجدید کریں کہ ہم’’فولادی دیوار‘‘ بن کر اپنے دشمنوں کا مقابلہ کریں گے اور اس عظیم وطن کی مقدر کی شان و عظمت کے لیے بے لوث محنت جاری رکھیں گے۔