لبنان اسرائیلی جنگی جرائم کو دستاویز ی شکل دینے اور اسے اقوام متحدہ میں پیش کرنے کے لئے پرعزم

بیروت (اُردو پوائنٹ اخبارتازہ ترین - اے پی پی۔ 12 مئی2026ء) لبنان نے کہا ہے کہ وہ اسرائیلی جرائم کو دستاویز ی شکل دینے اور اسے اقوام متحدہ میں پیش کرنے کے لیے پُر عزم ہے۔ العربیہ اردو کے مطابق یہ بات لبنانی وزیراعظم نواف سلام نے گزشتہ روز وزارتی اجلاس کی صدارت کرتے ہوئے کہی۔ انہوں نے اسرائیلی جنگی جرائم کی دستاویز سازی جاری رکھنے اور انہیں اقوام متحدہ میں پیش کرنے کی اہمیت پر زور دیتے ہوئے کہا کہ لبنان جنیوا میں انسانی حقوق کونسل کا اجلاس بلانے کے لیے کام کر رہا ہے۔

اجلاس کے بعد وزیر اطلاعات پال مرقص نے کہا کہ اجلاس کے آغاز میں وزیراعظم نے اسرائیلی حملوں میں اضافے ، جنگی جرائم کی دستاویز سازی اور انہیں اقوام متحدہ میں پیش کرنے کی اہمیت پر بات کی۔

(جاری ہے)

انہوں نے انسانی حقوق کے ہائی کمشنر کے ساتھ ہونے والے اس معاہدے کا بھی انکشاف کیا جس کے تحت وہ لبنان میں ہونے والے جنگی جرائم کی تحقیقات کے لیے جلد ہی لبنان کا دورہ کریں گے۔

انہوں نے کہا کہ بین الاقوامی اداروں بالخصوص ورلڈ بینک کے تعاون اور سیٹلائٹ تصاویر کی مدد سے تباہی اور نقصانات کی دستاویز سازی کو مکمل کرنے کے لیے متعلقہ وزارتوں کے درمیان رابطہ جاری ہے۔ ہر وزارت اپنے دائرہ اختیار میں نقصانات، بالخصوص معاشی نقصانات اور دیہات کو مسمار کیے جانے کی دستاویز سازی کر رہی ہے۔ وزیر اطلاعات نے کہا کہ وزیراعظم نےلبنان میں اسرائیلی حملوں کے نتیجے میں ہونے والے جانی نقصان پر گہری تشویش کا اظہار کیا جہاں اموات کی تعداد 2846 تک پہنچ گئی ہے جبکہ 8639 افراد زخمی ہوئے ہیں۔

لبنانی وزیر نے کہا کہ سکیورٹی اور فوجی محاذ پر وزیر دفاع نے میدانی صورت حال کا جائزہ پیش کیا۔ انہوں نے بتایا کہ اسرائیل نے خیام حراستی مرکز میں ایک مستقل پوائنٹ قائم کر رکھا ہے، جبکہ کچھ دیگر مقامات پر اس کی نقل و حرکت جاری ہے جہاں وہ داخل ہو کر واپس نکل جاتا ہے۔ انہوں نے واضح کیا کہ اجلاس میں بے گھر افراد کی امدادی ضروریات اور متعلقہ وزارتوں کے درمیان وزیراعظم کی نگرانی میں رابطے کے ذریعے انہیں ضروری امداد فراہم کرنے کے طریقوں پر بھی غور کیا گیا۔

اسی تناظر میں لبنانی صدر جوزف عون نے مطالبہ کیا ہے کہ اسرائیل پر دباؤ ڈالا جائے تاکہ وہ ملک کے جنوب میں اپنی فوجی کارروائیاں بند کرے۔ لبنانی ایوان صدر کی جانب سے گزشتہ روز جاری بیان کے مطابق صدر نے امریکی سفیر مشعل عیسیٰ کے ساتھ لبنان، امریکا اور اسرائیل کے درمیان ہونے والے تیسرے اجلاس سے متعلق تازہ ترین پیش رفت پر تبادلہ خیال کیا، جو رواں ہفتے واشنگٹن میں منعقد ہوگا۔ بیان کے مطابق صدر نے اس بات پر زور دیا کہ جنگ بندی، فوجی کارروائیوں کے خاتمے اور گھروں کو تباہ و مسمار کرنے سے روکنے کے لیے اسرائیل پر دباؤ ڈالنا ضروری ہے۔