پاکستان میں سندھ حکومت سب سے زیادہ کام کر رہی ہے، شرجیل میمن کا دعویٰ

اس وقت کارکردگی کی بنیاد پر پیپلز پارٹی کا مقابلہ کسی دوسری جماعت سے نہیں ہے، اپنی بہترین عوامی خدمت کی بدولت پیپلز پارٹی ہر آنے والے انتخاب میں سرخرو ہوگی؛ سینئر صوبائی وزیر کا تقریب سے خطاب

ساجد علی منگل 12 مئی 2026 15:01

پاکستان میں سندھ حکومت سب سے زیادہ کام کر رہی ہے، شرجیل میمن کا دعویٰ

خیرپور (اُردو پوائنٹ اخبارتازہ ترین۔ 12 مئی2026ء) سندھ کے سینئر وزیر اور صوبائی وزیرِ ٹرانسپورٹ شرجیل انعام میمن نے دعویٰ کیا ہے کہ سندھ حکومت کارکردگی کے لحاظ سے ملک کے دیگر صوبوں کے مقابلے میں سب سے آگے ہے، تاہم سب سے زیادہ سیاسی پراپیگنڈہ بھی پیپلز پارٹی کے خلاف ہی کیا جاتا ہے۔ تفصیلات کے مطابق سندھ کے سینئر وزیر شرجیل انعام میمن نے خیرپور میں پیپلز بس سروس کا باقاعدہ افتتاح کر دیا، اس موقع پر خطاب کرتے ہوئے انہوں نے حکومتِ سندھ کے ترقیاتی منصوبوں اور مستقبل کے ٹرانسپورٹ پلان پر تفصیل سے روشنی ڈالی۔

شرجیل میمن نے خیرپور کے عوام کے لیے جدید سفری سہولیات کا اعلان کرتے ہوئے کہا کہ خیرپور میں پیپلز بس سروس کے 2 ابتدائی روٹس کا آغاز کر دیا گیا ہے، شہر میں جلد ہی مزید بسیں لائی جائیں گی، جن میں خواتین کے لیے مخصوص پنک بسیں اور سیاحت و سفر کے لیے ڈبل ڈیکر بسیں بھی شامل ہوں گی، حکومت خواتین کو بااختیار بنانے کے لیے انہیں اسکوٹیز بھی فراہم کرے گی۔

(جاری ہے)

اپنے خطاب میں شرجیل میمن نے سیاسی مخالفین پر تنقید کرتے ہوئے کہا کہ پیپلز پارٹی کے خلاف منظم پراپیگنڈہ کیا جاتا ہے، حالانکہ حقیقت میں سندھ حکومت پاکستان میں سب سے زیادہ کام کر رہی ہے، ہمارا کسی سے جھگڑا نہیں، ہم چاہتے ہیں سب سیاست کریں، لیکن اس وقت کارکردگی کی بنیاد پر پیپلز پارٹی کا مقابلہ کسی دوسری جماعت سے نہیں ہے، اپنی بہترین عوامی خدمت کی بدولت پیپلز پارٹی ہر آنے والے انتخاب میں سرخرو ہوگی۔ سندھ کے نظامِ صحت کا دفاع کرتے ہوئے شرجیل میمن نے کہا کہ آج بھی پورے پاکستان سے مریض علاج کی غرض سے سندھ کے ہسپتالوں کا رخ کرتے ہیں، جو اس بات کا ثبوت ہے کہ یہاں کے طبی ادارے جیسے NICVD اور SIUT دیگر صوبوں سے بہتر خدمات فراہم کر رہے ہیں۔