شالیمار ایکسپریس کے حوالے سے شکایات کا ازالہ کیا جائے گا، ڈاکٹر طارق فضل چوہدری

منگل 12 مئی 2026 21:02

اسلام آباد(اُردو پوائنٹ اخبارتازہ ترین - آن لائن۔ 12 مئی2026ء) ایوان بالا کو وفاقی وزیر پارلیمانی امور ڈاکٹر طارق فضل چوہدری نے بتایا ہے کہ شالیمار ایکسپریس کے حوالے سے شکایات کا ازالہ کیا جائے گا۔انہوں نے کہاکہ میڈیا پر چلنے والی اکثریتی خبریں درست نہیں ہوتی ہیں۔منگل کو سینیٹر محسن عزیز نے ضمنی سوال کرتے ہوئے کہاکہ شالیمار ایکسپریس کے حادثے کے حوالے سے میڈیا میں جو رپورٹس چھپی ہیں اس میں لکھا گیا ہے کہ شالیمار ایکسپریس کی 60فیصد بوگیوں کے بریکس خراب تھے جس پر وفاقی وزیر پارلیمانی امور نے بتایا کہ پاکستان ریلوے ترقی کر رہا ہے ،اس وقت ریلوے ٹریکس کے ساتھ ساتھ گرین بلٹ بنائے جارہے ہیں۔

انہوں نے کہاکہ پاکستان ریلوے کوچز کی مکمل سیفٹی کیلئے بھرپور اقدامات اٹھا رہی ہے اسی طرح سٹیشن سٹاف سمیت ریلوے ڈرائیور ز اور دیگر سٹاف کو ہمہ وقت مستعد رہنے کی ہدایت کی جاتی ہے۔

(جاری ہے)

انہوں نے کہاکہ اس سوال کا حقیقت سے کوئی تعلق نہیں ہے۔انہوں نے کہاکہ سوشل میڈیا ،الیکٹرانیک اور پرنٹ میڈیا پر چلنے والی خبروں میں سوفیصد درستگی نہیں ہوتی ہے۔سینیٹر وقار مہدی نے کہاکہ شالیمار ایکسپریس نجی شعبے کے حوالے کی گئی ہے تاہم اس کی حالت خراب ہے اس کی بوگیاں ٹوٹی ہیں ،تین گھنٹوں کے بعد ناشتہ دیا گیا اور کوئی بھی پوچھنے والا نہیں ہے۔وفاقی وزیر نے کہاکہ شالیمار ایکسپریس کے حوالے سے جو شکایات سامنے آئی ہیں اس کا ازالہ کیا جائے گا۔۔۔