سینیٹر شیری رحمان نے دونوں ایوانوں سے کتابوں پر پلاسٹک کورز پر پابندی کا بل منظور ہونا اسلام آباد کیلئے تاریخی ماحولیاتی کامیابی قرار دیدیا

بدھ 13 مئی 2026 20:20

اسلام آباد (اُردو پوائنٹ اخبارتازہ ترین - این این آئی۔ 13 مئی2026ء) نائب صدر پیپلز پارٹی سینیٹر شیری رحمان نے دونوں ایوانوں سے کتابوں پر پلاسٹک کورز پر پابندی کا بل منظور ہونا اسلام آباد کیلئے ایک تاریخی ماحولیاتی کامیابی قرار دیدیا ۔ اپنے بیان میں سینیٹر شیری رحمن نے کہاکہ اسلام آباد کیپٹل ٹیریٹری پروہیبیشن آف پلاسٹک بک کورز بل 2026 فوری نافذ ہوگیا، یہ سنگل یوز پلاسٹک اور زہریلے ’’فاریور کیمیکلز‘‘کے خلاف فیصلہ کن قدم ہے، پلاسٹک کو ختم ہونے میں ایک ہزار سال تک لگ سکتے ہیں اور یہ دریائوں، نالوں، لینڈ فلز، ساحلی علاقوں اور ماحول میں مستقل آلودگی پھیلا رہا ہے۔

انہوںنے کہاکہ دنیا بھر میں 40 کروڑ ٹن سے زائد پلاسٹک فضلہ پیدا ہو چکا ہے جبکہ صرف 9 فیصد ری سائیکل ہوا، پاکستان میں سالانہ تقریباً 3 ملین ٹن پلاسٹک کچرا پیدا ہوتا ہے۔

(جاری ہے)

شیری رحمن نے کہاکہ پاکستان میں صرف تقریباً 3 فیصد پلاسٹک ری سائیکل ہوتا ہے جو زیادہ تر غیر رسمی شعبے میں ہوتا ہے، یہ صورتحال سنگین ماحولیاتی چیلنج کو ظاہر کرتی ہے۔ انہوںنے کہاکہ قانون کے تحت پہلی خلاف ورزی پر 50 ہزار روپے سے زائد جرمانہ عائد ہوگا، شہریوں سے اپیل ہے کہ وہ خلاف ورزی کرنے والے عناصر کے خلاف شکایات درج کرائیں انہوںنے کہاکہ اب بڑے ریٹیلرز کی بھی چیکنگ کی جائے گی تاکہ پلاسٹک کورز کے مکمل خاتمے کو یقینی بنایا جا سکے۔

شیری رحمن نے کہاکہ بڑے ریٹیلرز کو پہلے ہی وارننگز دی گئی ہے کہ وہ پلاسٹک کورز سمیت تمام غیر ضروری پلاسٹک مواد کا استعمال ختم کریں۔ انہوںنے کہاکہ دنیا بھر میں سنگل یوز پلاسٹک کے استعمال میں تیزی سے کمی آ رہی ہے اور پاکستان کو بھی اسی سمت میں عملی اقدامات کرنا ہوں گے۔انہوںنے کہاکہ اسلام آباد کے سبز علاقے پہلے ہی شہری تعمیرات کے دباؤ کا شکار ہیں اور مزید پلاسٹک آلودگی ناقابل قبول ہے، یہ قانون عوامی صحت، ماحولیاتی تحفظ اور آنے والی نسلوں کے محفوظ مستقبل کیلئے ایک اہم قدم ہے۔