پنجاب عملاً ایک پولیس اسٹیٹ بن چکا ہے، کسی کے قانونی اور انسانی حقوق نہیں ہیں

اسلام آباد (اردوپوائنٹ اخبار تازہ ترین۔ انٹرنیشنل پریس ایجنسی ۔ 13 مئی 2026ء ) پی ٹی آئی کے مرکزی رہنماء اسد قیصر نے کہا ہےکہ پنجاب عملاً ایک پولیس اسٹیٹ بن چکا ہے، کسی کے قانونی اور انسانی حقوق نہیں ہیں، کسی کی جرات نہیں کہ انسانی حقوق پر ایس ایچ او سے سوال کرے۔ انہوں نے ایوان میں اظہار خیال کرتے ہوئے کہا کہ گلگت بلتستان انتخابات میں بھی پاکستان تحریکِ انصاف کے ساتھ زیادتی کی جا رہی ہے۔

پی ٹی آئی نے گلگت بلتستان ڈیموکریٹک الائنس کے ساتھ اتحاد کیا۔ اس الائنس کو الیکشن کمیشن نے رجسٹر کیا اور باقاعدہ انتخابی نشان الاٹ کیا، لیکن جیسے ہی پی ٹی آئی نے اس الائنس کے ساتھ اتحاد کیا تو الیکشن کمیشن نے اس سے انتخابی نشان بھی واپس لے لیا اور اس پر پابندی بھی عائد کر دی۔

(جاری ہے)

میں یہ پوچھنا چاہتا ہوں کہ پی ٹی آئی قومی اسمبلی میں سب سے بڑی اپوزیشن جماعت ہے، گو کہ عوام نے عمران خان کو مینڈیٹ دیا تھا، مگر ہم سے ہمارا مینڈیٹ چھین لیا گیا۔

سینیٹ اور پنجاب اسمبلی میں بھی ہم بڑی اپوزیشن جماعت ہیں، جبکہ ایک صوبے میں ہماری حکومت ہے، لیکن قانون کے تحت ہم سے ہمارا آئینی حق چھینا گیا۔ میں الیکشن کمیشن کے اس اقدام کی مذمت کرتا ہوں اور مطالبہ کرتا ہوں کہ اس نوٹیفکیشن کو واپس لے کر گلگت بلتستان ڈیموکریٹک الائنس کو لیول پلیئنگ فیلڈ فراہم کی جائے۔ اسد قیصر نے کہا کہ خیبر پختونخوا میں چونکہ پی ٹی آئی کی حکومت ہے، اس لیے اس کے ساتھ بد نیتی کی جارہی ہے۔

صرف ایک سال میں این ایف سی ایوارڈ میں ہمارے صوبے کو 160 ارب کا شارٹ فال ہے۔ خیبر پختونخوا کا روٹین میں جو این ایف سی حصہ بنتا ہے، وہ نہیں دیا جارہا۔ اس پارلیمنٹ نے یہ کمٹمنٹ کی تھی کہ فاٹا انضمام کے بعد ہر سال ہم 100 ارب فنڈ دیں گے، وہ بھی ابھی تک نہیں دیے جارہے ہیں۔ یہ بھی اس پارلیمنٹ نے کمٹمنٹ کی تھی کہ 3 فیصد این ایف سی ایوارڈ سے دیا جائے گا، وہ بھی نہیں دیا جارہا ہے۔

فاٹا انضمام کے بعد فاٹا کے تمام اخراجات صوبائی حکومت پر آئے اور وفاقی حکومت کے ذمے جو فنڈز تھے، وہ بھی نہیں دیے جارہے ہیں۔ اسد قیصر نے کہا کہ خیبر پختونخوا میں دہشت گردی کی نئی لہر آ گئی ہے، بلوچستان کی بھی یہی صورتِ حال ہے۔ گزشتہ دنوں مولانا ادریس صاحب شہید ہوئے جو ایک بہت جید عالم تھے۔ اس کے بعد بنوں میں تھانے پر خودکش حملہ ہوا جس میں 21 جوان شہید ہوئے۔

وہاں ایک سنگین جنگ چھڑی ہوئی ہے اور اس کی بنیاد یہ ہے کہ جو وفاقی حکومت کی ذمہ داری ہے، وہ وفاق پوری نہیں کر رہا۔ ہمیں افسوس اس بات پر ہے کہ اتنے بڑے واقعات پر اس ایوان میں کوئی بحث نہیں ہو رہی۔ ہم روزانہ کی بنیاد پر لاشیں اٹھا رہے ہیں اور وفاقی حکومت ٹس سے مس نہیں ہو رہی۔ پاکستان تحریک انصاف کے ساتھ اس وقت جو ظلم ہو رہا ہے۔ عمران خان اس ملک کے منتخب وزیرِاعظم ہیں، ہم انہیں اس ملک کا وزیرِاعظم سمجھتے ہیں۔

عمران خان کو اس قوم نے ووٹ دیا، اور ان کے ووٹ کو زبردستی چھینا گیا۔ عمران خان کا بنیادی حق ہے کہ جیل مینوئل کے مطابق انہیں ہسپتال منتقل کیا جائے، انہیں بہترین علاج معالجے کی سہولیات فراہم کی جائیں اور ان کی ملاقاتیں بحال کی جائیں۔ ہم عمران خان کے لیے کوئی ایسا مطالبہ نہیں کرتے جو غیر قانونی ہو؛ جس طرح نواز شریف کو ایئرپورٹ پر سہولیات فراہم کی گئیں، ہم صرف قانون کے مطابق ان کا حق مانگتے ہیں۔

جس طرح یہ ملک ظلم اور جبر کے ذریعے چلایا جا رہا ہے اور جس طرح انہوں نے کنٹرول کیا ہوا ہے۔ میں پنجاب گیا تھا، تین دن وہاں گزار کر آیا ہوں۔ جیل میں قید اسیران کے خاندانوں سے بھی ملا ہوں۔ پنجاب عملاً ایک پولیس اسٹیٹ بن چکا ہے۔ پنجاب میں کوئی قانونی اور انسانی حقوق نہیں ہیں۔ ایک ایس ایچ او سے کوئی نہیں پوچھ سکتا؛ وہ چادر اور چار دیواری کی بے توقیری کرتا ہے۔ کسی کی جرات نہیں کہ وہ اس ایس ایچ او سے سوال کرے، کیونکہ کسی کے قانونی حقوق نہیں ہیں۔ مجھے سمجھ نہیں آ رہی کہ پیپلز پارٹی، جو خود کو 1973 کے آئین کی خالق اور جمہوریت کی چیمپئن سمجھتی ہے، وہ کس طرح اس حکومت کا حصہ ہے۔ ہم سمجھتے ہیں کہ جو بھی یہ ہو رہا ہے، پیپلز پارٹی اس میں برابر کی شریک ہے۔