متحدہ عرب امارات سے کوئی شہری ڈی پورٹ نہیں ہوا، ہمارے ان کے ساتھ تعلقات بہترین ہیں، طلال چوہدری

اس مہینے سعودی عرب کے بعد دوسرے نمبر پر متحدہ عرب امارات سے ترسیلات زر سب زیادہ ہیں؛ وزیر مملکت کا اظہار خیال

ساجد علی جمعرات 14 مئی 2026 14:10

متحدہ عرب امارات سے کوئی شہری ڈی پورٹ نہیں ہوا، ہمارے ان کے ساتھ تعلقات ..

اسلام آباد (اُردو پوائنٹ اخبارتازہ ترین۔ 14 مئی2026ء) وزیر مملکت برائے داخلہ طلال چوہدری کا کہنا ہے کہ متحدہ عرب امارات سے کوئی شہری ڈی پورٹ نہیں ہوا، ہمارے ان کے ساتھ تعلقات بہترین ہیں۔ قومی اسمبلی اجلاس سے اظہار خیال کرتے ہوئے انہوں نے کہا کہ متحدہ عرب امارات کے ساتھ ہمارے تعلقات بالکل ٹھیک ہیں، یو اے ای میں 17 لاکھ سے زائد پاکستانی رہ رہے ہیں، متحدہ عرب امارات سے کوئی شہری ڈی پورٹ نہیں ہوا، اس مہینے سعودی عرب کے بعد دوسرے نمبر پر متحدہ عرب امارات سے ترسیلات زر سب زیادہ ہیں۔

وزیر مملکت کا کہنا ہے کہ متحدہ عرب امارات میں مقیم پاکستانیوں کے حوالے سے کوئی بھی شکایت ہوگی تو اسے حل کیا جائے گا، ہماری ذمہ داری ہے ہم اپنے شہریوں کی پوری دنیا میں حفاظت کریں، تاہم آج کل یہ فیشن ہے کہ محسن نقوی کا نام لیا جائے تو ہیڈلائن بنتی ہے، وزارت داخلہ کی کارکردگی پر تنقید کریں، لیکن پاکستان کے پاسپورٹ کی رینکنگ اس وزیر داخلہ کے ہوتے بہتر ہوئی ہے۔

(جاری ہے)

علاوہ ازیں وزیر مملکت برائے داخلہ پاکستان مسلم لیگ ن کے سینیٹر طلال چوہدری نے انکشاف کیا ہے کہ پی ٹی آئی کے ایم این اے اقبال آفریدی کے بیٹے نے سرکاری منصب کے تحت ملنے والے بلیو پاسپورٹ پر اٹلی کا سفر کیا اور وہاں پہنچ کر سیاسی پناہ کی درخواست دے دی، ہمیں اٹلی نے بہت سخت پیغام بھیجا ہے جو میں بتا نہیں سکتا، ایسے اقدامات بین الاقوامی سطح پر پاکستان کی بدنامی کا باعث بنتے ہیں، سرکاری پاسپورٹ پر جا کر اسائلم ڈکلیئر کرنا انتہائی شرمناک عمل ہے، ایسے ہی معاملات کی وجہ سے دنیا کے دوسرے ممالک ہمارے ساتھ مفاہمت کی یادداشتوں پر دستخط کرنے سے کتراتے ہیں اور پاکستانی پاسپورٹ کی ساکھ متاثر ہوتی ہے۔