اس سال عمران خان کی رہائی ہو جانی ہے، ندیم افضل چن کی پیشگوئی

عمران خان کو سیاسی جماعتوں سے ڈیل کرنا ہوگی، یہ ڈیل نہیں کہلائے گی، میثاق جمہوریت کو کوئی ڈیل نہیں کہتا؛ ترجمان پی پی کی گفتگو

ساجد علی جمعرات 14 مئی 2026 13:54

اس سال عمران خان کی رہائی ہو جانی ہے، ندیم افضل چن کی پیشگوئی

اسلام آباد (اُردو پوائنٹ اخبارتازہ ترین۔ 14 مئی2026ء) پاکستان پیپلزپارٹی کے ترجمان ندیم افضل چن نے پیشگوئی کی ہے کہ اس سال عمران خان کی رہائی ہوجائےگی۔ سینئر صحافی نعیم اشرف بٹ سے گفتگو کرتے ہوئے انہوں نے کہا کہ عمران خان کو 3 سال ہوگئے ہیں، سیاسی لیڈرز کو زیادہ عرصہ تک قید نہیں رکھا جاسکتا، راستہ عدالتوں کا ہی ہوگا، جب حالات نارمل ہوں گے تو کورٹس بھی نارمل ہوجائیں گی، عمران خان کو سیاسی جماعتوں سے ڈیل کرنا ہوگی، لیکن یہ ڈیل نہیں کہلائے گی کیوں کہ میثاق جمہوریت کو کوئی ڈیل نہی کہتا۔

پیپلزپارٹی کے رہنماء کا کہنا ہے کہ آصف علی زرداری وہ صدر نہیں جو استعفیٰ دیں، اور دیں گے بھی کیوں؟ استعفی تو آپشن ہی نہیں ہے، صدر زرداری پریشرمیں زیادہ بہتر سیاست کرتےہیں، ترمیم کے لیے سب ہورہاہے، جیسے ہی کسی آئینی ترامیم کی بات ہوتی ہے تو نیب سر گرم ہو جاتا ہے، لیکن یہ نظام پیپلزپارٹی کے بغیر نہیں چل سکتا کیونکہ ایک بڑی جماعت کو پہلے ہی باہر رکھا ہوا ہے۔

(جاری ہے)

ندیم افضل چن کہتے ہیں کہ یہ جمہوری نہیں بیوروکریٹک حکومت ہے، پنجاب میں افسران غائب ہوتے ہیں اور بیان دے کر واپس آتےہیں، پھر کارروائی کا پوچھا جائے تو منع کردیتے ہیں، منڈی بہاؤالدین کے ایکسین راجہ عمر 2 روز غائب رہے، واپس آئے تو پولیس نے کارروائی کا پوچھا تو انہوں نے کہا ایم این اے سے پوچھے بغیر بیان نہیں دوں گا، احتساب کرنا ہے تو خواجہ آصف کے بیان سے شروع کریں۔

انہوں نے مزید کہا کہ سی سی ڈی سے امن لانا مستقل حل نہیں ہے، پولیس جن کے بندے مارتی ہے وہ پھر ایم پی اے پر حملہ کردیتے ہیں، ماورائےعدالت کارروائی کریں گے تو کوئی نہ کوئی اس کا سامناکرے گا، اسی طرح مہنگائی، بے روزگاری بہت زیادہ اور زراعت تباہی کے دہانے پر ہے، اس وقت جو سکون چل رہا ہے وہ کسی بڑے لاوے کی صورت میں نظر آئے گا، اقتدار کے ایوانوں میں راوی سکھ چھین زیادہ دیر نہیں رہے گا۔