پاکستان کا دفاعی میدان میں ایک اور سنگِ میل، فتح 4 کروز میزائل کا کامیاب تجربہ

یہ میزائل سسٹم جدید ترین ایوی اونکس اور جدید نیوی گیشنل آلات سے لیس ہے، طویل فاصلے تک مار کرنے اور ہدف کو غیر معمولی درستگی کے ساتھ تباہ کرنے کی صلاحیت رکھتا ہے؛ آئی ایس پی آر اعلامیہ

ساجد علی جمعرات 14 مئی 2026 15:24

پاکستان کا دفاعی میدان میں ایک اور سنگِ میل، فتح 4 کروز میزائل کا کامیاب ..

راولپنڈی (اُردو پوائنٹ اخبارتازہ ترین۔ 14 مئی2026ء) پاکستان آرمی کے راکٹ فورس کمانڈ نے مقامی طور پر تیار کردہ 'فتح 4' گراؤنڈ لانچ کروز میزائل کا کامیاب تربیتی تجربہ کیا ہے، اس میزائل سسٹم کی خاص بات اس میں موجود جدید ترین ایوی اونکس اور نیوی گیشنل سسٹم ہے جو اسے طویل فاصلے تک اپنے ہدف کو انتہائی درستگی کے ساتھ نشانہ بنانے کے قابل بناتا ہے۔

مسلح افواج کے شعبہ تعلقات عامہ ( آئی ایس پی آر ) کے مطابق آرمی راکٹ فورس کمانڈ نے آج مقامی طور پر تیار کردہ کروز میزائل ’فتح 4‘ کا کامیاب تربیتی فائر کیا ہے، یہ میزائل سسٹم جدید ترین ایوی اونکس اور جدید نیوی گیشنل آلات سے لیس ہے، یہ طویل فاصلے تک مار کرنے اور ہدف کو غیر معمولی درستگی کے ساتھ تباہ کرنے کی صلاحیت رکھتا ہے، اس تربیتی فائر کا مقصد فوج کی آپریشنل کارکردگی کو بڑھانا اور بہتر درستگی اور بچاؤ کے لیے شامل کیے گئے مختلف ذیلی سسٹمز کے تکنیکی پیرامیٹرز کی توثیق کرنا تھا۔

(جاری ہے)

فوج کے ترجمان ادارے نے بتایا کہ اس کامیاب تجربے کا مشاہدہ پاکستان آرمی راکٹ فورس کمانڈ کے سینیئر افسران کے علاوہ ڈویلپنگ ایجنسی کے سائنسدانوں اور انجینئرز نے بھی کیا، صدرِ مملکت، وزیراعظم پاکستان، آرمی چیف، چیف آف ڈیفنس فورسز، نیول چیف اور ایئر چیف نے فتح 4 کے اس کامیاب تربیتی تجربے پر مبارکباد پیش کی، انہوں نے اس منصوبے میں شامل تمام افراد کی تکنیکی مہارت، لگن اور عزم کو سراہا جنہوں نے ’فتح سیریز‘ کے اس میزائل کو کامیاب بنانے میں اپنا کردار ادا کیا۔