وفاقی وزیر ریلوے سے وفاقی وزیر برائے مذہبی امور کی ملاقات، باہمی دلچسپی کے امور پر تبادلہ خیال

جمعرات 14 مئی 2026 18:51

اسلام آباد (اُردو پوائنٹ اخبارتازہ ترین - اے پی پی۔ 14 مئی2026ء) وفاقی وزیر ریلوے محمد حنیف عباسی سے وفاقی وزیر برائے مذہبی امور و بین المذاہب ہم آہنگی سردار محمد یوسف نے وزارتِ ریلوے میں ملاقات کی جس میں باہمی دلچسپی کے امور، عوامی سہولیات اور انتظامی معاملات پر تفصیلی تبادلہ خیال کیا گیا۔ وزارت ریلوے سے جاری پریس ریلیز کے مطابق ملاقات کے دوران دونوں رہنماؤں نے بین المذاہب ہم آہنگی کے فروغ، عوامی خدمت کے منصوبوں کی بہتری اور ادارہ جاتی تعاون کو مزید مؤثر بنانے کی ضرورت پر زور دیا۔

(جاری ہے)

دونوں وزرا نے اس عزم کا اظہار کیا کہ عوامی مسائل کے حل اور خدمات کی فراہمی کو بہتر بنانے کے لئے باہمی رابطوں اور تعاون کو مزید مضبوط بنایا جائے گا۔اس موقع پر سردار محمد یوسف نے شہید ریلوے ملازم لیاقت علی کی بہادری اور قربانی کو خراجِ عقیدت پیش کرتے ہوئے کہا کہ لیاقت جیسے بہادر افراد قومی اثاثہ ہیں اور ان کی قربانیوں کو ہمیشہ یاد رکھا جائے گا۔وفاقی وزیر ریلوے محمد حنیف عباسی نے گفتگو کرتے ہوئے کہا کہ پاکستان ریلوے میں اصلاحات اور مسافروں کو بہتر سہولیات کی فراہمی حکومت کی اولین ترجیح ہے جبکہ سردار محمد یوسف نے بین المذاہب ہم آہنگی کے فروغ کے لئے جاری حکومتی اقدامات کو سراہا۔