پاکستان میں ایک نئی فضائی کمپنی اڑان بھرنے کیلئے تیار

10 سالہ طویل انتظار کے بعد جیٹ گرین ایئرلائن تمام قانونی مراحل مکمل کرکے رن وے پر آگئی، ایس آئی ایف سی نے تقریباً ایک دہائی سے زیر التوا 30 ملین ڈالر مالیت کے نجی ایئرلائن منصوبے کی منظوری کا عمل کامیابی سے مکمل کر لیا

Sajid Ali ساجد علی جمعہ 15 مئی 2026 11:45

پاکستان میں ایک نئی فضائی کمپنی اڑان بھرنے کیلئے تیار
اسلام آباد (اُردو پوائنٹ اخبارتازہ ترین۔ 15 مئی2026ء) سپیشل انویسٹمنٹ فیسیلیٹیشن کونسل (ایس آئی ایف سی) کی انتھک کوششوں کے بعد جیٹ گرین ایئرلائن کا 30 ملین ڈالر کا پروجیکٹ آخر کار حقیقت کا روپ دھارنے جا رہا ہے۔ تفصیلات کے مطابق پاکستان کی ایوی ایشن انڈسٹری میں ایک نئی روح پھونک دی گئی ہے، وہ منصوبہ جو گزشتہ 10 سالوں سے قانونی فائلوں اور دفتری پیچیدگیوں کی دھول چاٹ رہا تھا، اب آپریشنل مرحلے میں داخل ہو گیا ہے، تقریباً 30 ملین ڈالر کی مالیت کا یہ منصوبہ محض ایک ایئرلائن نہیں بلکہ پاکستان کے ہوابازی کے شعبے میں سرمایہ کاروں کے اعتماد کی بحالی کا استعارہ ہے۔

بتایا گیا ہے کہ ایس آئی ایف سی نے متعلقہ اداروں کے درمیان پل کا کردار ادا کرتے ہوئے لائسنسنگ، سیفٹی ویٹنگ اور کمرشل پرمٹس جیسے کٹھن مراحل کو ریکارڈ مدت میں اور مکمل شفافیت کے ساتھ طے کرایا، مارکیٹ میں نئی ایئرلائن آنے سے مقابلہ بڑھے گا، جس کا براہِ راست فائدہ مسافروں کو کرایوں میں کمی اور بہتر سروس کی صورت میں ملے گا، 30 ملین ڈالر کی یہ سرمایہ کاری پائلٹس، کیبن کریو اور گراؤنڈ اسٹاف سمیت سینکڑوں افراد کے لیے روزگار کے نئے دروازے کھولے گی۔

(جاری ہے)

کہا جارہا ہے کہ جیٹ گرین کی آمد سے ناصرف معاشی سرگرمیاں تیز ہوں گی بلکہ دیگر غیر ملکی ایئرلائنز کے لیے بھی پاکستان میں سرمایہ کاری کی راہ ہموار ہوگی، جیٹ گرین کو کلئیرنس دلوانا اس بات کا ثبوت ہے کہ پاکستان اب کاروبار کے لیے ایک سازگار ملک بن چکا ہے، پیچیدہ بیوروکریٹک عمل کو سہل بنانا ایس آئی ایف سی کی اولین ترجیح ہے تاکہ ملکی معیشت کو نجی شعبے کے تعاون سے مستحکم کیا جا سکے۔