کراچی میں جی ڈی اے کا اہم مشاورتی اجلاس، سندھ میں منشیات، بلدیاتی نظام اور عوامی مسائل پر تشویش

کراچی(اُردو پوائنٹ اخبارتازہ ترین - این این آئی۔ 17 مئی2026ء) کراچی میں میں گرینڈ ڈیموکریٹک الائنس کا اہم مشاورتی اجلاس جی ڈی اے کے سربراہ پیر صاحب پگارا کی صدارت میں راجا ہائوس میں منعقد ہوا، جس میں سندھ اور ملک کی مجموعی سیاسی صورتحال سمیت اہم قومی و صوبائی معاملات پر تفصیلی غور کیا گیا۔اجلاس میں پیر سید صدر الدین شاہ راشدی، غلام مرتضی جتوئی، ڈاکٹر صفدر عباسی، ایاز لطیف پلیجو، سید زین شاہ، سائرہ بانو، سردار عبدالرحیم اور دیگر رہنمائوں نے شرکت کی۔

اجلاس میں سندھ میں منشیات کے بڑھتے ہوئے استعمال اور اسمگلنگ پر شدید تشویش کا اظہار کرتے ہوئے کہا گیا کہ صوبے میں نوجوان نسل تیزی سے تباہی کی طرف جا رہی ہے۔ رہنمائوں نے الزام عائد کیا کہ صوبائی حکومت منشیات کے خاتمے میں مکمل طور پر ناکام ہو چکی ہے، اس لیے منشیات فروشوں اور ان کے سرپرست عناصر کے خلاف بلاامتیاز کارروائی کی جائے۔

(جاری ہے)

بلدیاتی نظام کے حوالے سے اجلاس میں کہا گیا کہ سندھ میں حقیقی بلدیاتی نظام موجود نہیں اور اختیارات نچلی سطح تک منتقل نہ ہونے کے باعث عوام بنیادی سہولیات سے محروم ہیں۔

رہنمائوں نے آئین کے آرٹیکل 140-اے کے تحت بااختیار بلدیاتی نظام کے قیام پر زور دیا۔اجلاس میں سندھ کی انتظامی تقسیم، نئے انتظامی حصوں کے قیام اور صوبے کے نظم و نسق سے متعلق امور پر بھی غور کیا گیا۔ رہنمائوں نے کہا کہ عوامی سہولت اور بہتر حکمرانی کے لیے انتظامی اصلاحات ضروری ہیں، تاہم سندھ کی تقسیم کسی صورت قابل قبول نہیں ہوگی۔سرکاری اداروں میں اخراجات کم کرنے کے معاملے پر گفتگو کرتے ہوئے اجلاس میں کہا گیا کہ قومی وسائل کے مثر استعمال کے لیے غیر ضروری اخراجات میں کمی کی جائے، تاہم سرکاری ملازمین کے حقوق کا مکمل تحفظ یقینی بنایا جائے۔

اجلاس میں یہ بھی کہا گیا کہ سندھ کے سرکاری ملازمتوں کے امتحانی ادارے میں بدعنوانی اور میرٹ کی پامالی نوجوانوں کے مستقبل کو تباہ کر رہی ہے۔اجلاس میں کراچی اور گوادرکی معاشی اور تجارتی اہمیت پر بھی تفصیلی تبادلہ خیال کیا گیا۔ رہنمائوں نے کہا کہ کراچی ملکی معیشت کی شہ رگ ہے جبکہ گوادر مستقبل میں خطے کی تجارت کا اہم مرکز بن سکتا ہے، اس لیے دونوں شہروں میں بنیادی ڈھانچے، امن و امان اور سرمایہ کاری کے مواقع بہتر بنانا ناگزیر ہے۔

قومی سلامتی اور سیکیورٹی صورتحال پر گفتگو کرتے ہوئے رہنمائوں نے کہا کہ ملک کو درپیش چیلنجز سے نمٹنے کے لیے تمام سیاسی قوتوں کو متحد ہو کر کردار ادا کرنا ہوگا۔اجلاس کے اختتام پر اس عزم کا اظہار کیا گیا کہ گرینڈ ڈیموکریٹک الائنس سندھ کے عوام کے حقوق، جمہوریت، آئین کی بالادستی اور صوبے کے وسائل کے تحفظ کے لیے اپنی سیاسی جدوجہد جاری رکھے گا۔