پاکستان کو75ممالک کی فہرست سے خارج کروایا جائے جن پر امریکی شہریت اور گرین کارڈ کی درخواستیں دینے پر پابندی عائد کی گئی ہے

شہبازشریف اور آرمی چیف عاصم منیر صدر ٹرمپ کے ساتھ تعلقات کو پاکستان کے حق میں استعمال کریں.پاکستانی امریکی شہریوں کا مطالبہ

میاں محمد ندیم پیر 25 مئی 2026 17:25

پاکستان کو75ممالک کی فہرست سے خارج کروایا جائے جن پر امریکی شہریت اور ..

نیوجرسی(اردوپوائنٹ اخبارتازہ ترین-انٹرنیشنل پریس ایجنسی۔25 مئی ۔2026 ) امریکا میں مقیم پاکستانیوں نے وزیراعظم شہبازشریف اور آرمی چیف فیلڈ مارشل عاصم منیر سے مطالبہ کیا ہے کہ وہ صدر ٹرمپ کے ساتھ اپنے تعلقات کو پاکستان کے حق میں استعمال کرتے ہوئے پاکستان کا نام اس فہرست سے خارج کروائیں جس کے تحت پاکستان سمیت75ممالک کے شہریوں پر امریکی شہریت اور گرین کارڈ کی درخواستیں دینے پر پابندی عائد کی گئی ہے.

(جاری ہے)

پاکستان ڈیموکریٹ پارٹی کے سربراہ اور مسلم لیگ نون نیویارک کے سابق عہدیدار طارق محمود بٹ‘ریاست ٹیکساس سے پاکستانی ڈاکٹروں کی تنظیم کے رکن ڈاکٹر عامرسعد محمد‘نیویارک میں پاکستان پیپلزپارٹی کے سرگرم رکن بابرمحمودبابری سمیت دیگر کمیونٹی راہنماﺅں کا کہنا ہے کہ ٹرمپ انتظامیہ پاکستان کو اتحادی ملک قراردیتی ہے اور ”اہم اتحادی“ملک کے ساتھ اس طرح کا رویہ تشویشناک ہے .

انہوں نے کہاکہ فہرست میں بھارت کو شامل نہیں کیا گیا حالانکہ بھارتی نژاد امریکیوں کی تعداد پاکستانیوں سے کئی گنا زیادہ ہے جبکہ پاکستانیوں کی جانب سے بہت تھوڑی تعداد میں درخواستیں دائرکی جاتی ہیں اس کے باوجود پاکستان کا نام اس فہرست میں شامل کرنا ناقابل فہم ہے ‘انہوں نے وزیراعظم شہبازشریف اور آرمی چیف فیلڈ مارشل عاصم منیر سے کہا کہ وہ صدر ٹرمپ سے اس معاملے میں براہ راست بات کرکے پاکستان کا نام فہرست سے خارج کروائیں کیونکہ اس حکم نامے کے تحت نئی درخواستیں وصول کرنے پر پابندی کے علاوہ زیرالتواءدرخواستوں پر بھی کاروائی روک دی گئی ہے جس سے سینکڑوں خاندان متاثرہونگے جو سالوں سے اپنی درخواستوں پر کاروائی کا انتظارکررہے ہیں.

انہوں نے کہاکہ صدرٹرمپ کی انتظامیہ کے اعلان کے تحت جو پاکستانی قانونی طورپر امریکا میں مستقل رہائش اختیار کرنا یا شہریت حاصل کرنا چاہ رہے ہیں ان پر قانونی طریقہ کار کے راستے بند کرنا ناانصافی ہے اس وقت سینکڑو ں پاکستانی شہریوں کی درخواستیں زیرسماعت ہیں جبکہ سینکڑوں شادی‘خاندان کی جانب سے سپانسرشپ سمیت امریکی امیگریشن قانون کے تحت درخواستیں جمع کروانے کے خواہش مند ہیں تاہم حالیہ پابندی کی وجہ سے انہیں شدید پریشانی کا سامنا ہے لہذا حکومت فوری طورپر واشنگٹن سے اس سلسلے میں رابط کرکے پاکستان کو فہرست سے خارج کروانے کے لیے اقدامات کرئے.