Live Updates

پاکستان کے ثالثی کردار پر بھارت نے کبھی اعتراض نہیں کیا.امریکی وزیر خارجہ

پاکستان کے ساتھ بھارت کا مسئلہ مختلف ہے، صدر ٹرمپ کو ایران کے ساتھ معاہدے تک پہنچنے کے لئے کوئی جلدی نہیں، برا معاہدہ نہیں کریں گے، کسی بھی ممکنہ معاہدے کے تحت اسرائیل کو اپنے دفاع کا حق حاصل رہے گا.مارکو روبیو کی بھارت میں گفتگو

میاں محمد ندیم پیر 25 مئی 2026 17:38

پاکستان کے ثالثی کردار پر بھارت نے کبھی اعتراض نہیں کیا.امریکی وزیر ..

نئی دہلی(اردوپوائنٹ اخبارتازہ ترین-انٹرنیشنل پریس ایجنسی۔25 مئی ۔2026 ) امریکی وزیر خارجہ مارکو روبیو نے کہا ہے کہ بھارت نے پاکستان کے ثالثی کردار پر کبھی اعتراض نہیں کیا، صدر ٹرمپ کو ایران کے ساتھ معاہدے تک پہنچنے کے لئے کوئی جلدی نہیں، برا معاہدہ نہیں کریں گے دورہ بھارت کے بعدروانگی سے قبل صحافیوں سے گفتگو کرتے ہوئے امریکی وزیر خارجہ سے پوچھا گیا کہ امریکا ایران تنازع میں پاکستان ثالث کا کردار ادا کر رہا ہے، کیا بھارت نے اس پر کسی تشویش کا اظہار کیا؟.

(جاری ہے)

مارکو روبیو کا جواب میں کہنا تھا کہ بھارت ہمیشہ اس بات کی طرف اشارہ کرتا ہے کہ پاکستان کی سر زمین سے مسلح دہشت گرد گروہ کام کر رہے ہیں جو بھارت کو نشانہ بناتے ہیں، وہ ہمیشہ اس پر فکر مند رہتے ہیں امریکی وزیر خارجہ نے کہا کہ جہاں تک ایران کے معاملے میں ثالث اور سہولت کار کے طور پر پاکستان کے کردار کی بات ہے، یہ موضوع کبھی سامنے نہیں آیا، مجھے نہیں لگتا کہ وہ اس پر اعتراض کریں گے.

پاکستان کے ساتھ ان کا مسئلہ مختلف ہے امریکی وزیر خارجہ نے کہا کہ ایران کی جانب سے آبنائے ہرمز کو کھلا رکھنے اور جوہری معاملات پر ایک حقیقی اہم اور محدود مدت کے مذاکرات میں شامل ہونے کے حوالے سے ایک کافی مضبوط تجویز موجود ہے. انہوں نے کہا کہ امید ہے ہم اسے کامیاب بنا لیں گے، خلیجی ممالک میں اس کی بھرپور حمایت موجود ہے اور عالمی سطح پر بھی کافی حمایت حاصل ہے ہر ملک جسے ہم نے اس منصوبے کے بارے میں بتایا اس نے سمجھا کہ یہ نہ صرف بہت معقول ہے بلکہ دنیا کے لیے درست قدم بھی ہے.

مارکو روبیو نے کہا کہ صدر ڈونلڈ ٹرمپ کسی معاہدے تک پہنچنے میں جلد بازی نہیں کرنا چاہتے، صدر کوئی برا معاہدہ نہیں کریں گے، اس لیے دیکھتے ہیں کیا ہوتا ہے، ہم سفارت کاری کو کامیاب ہونے کا ہر ممکن موقع دیں گے، اس سے پہلے کہ ہم دوسرے متبادل راستوں پر غور کریں ایران کے ساتھ معاہدہ اب بھی ممکن ہے، روبیو نے اس بات پر بھی زور دیا کہ کسی بھی ممکنہ معاہدے کے تحت اسرائیل کو اپنے دفاع کا حق حاصل رہے گا.