سجاس کے وفد کی ریجنل کرکٹ ایسوسی ایشن کراچی کے صدر ندیم عمر سے ملاقات

مسلسل تیسری بار صدر منتخب ہونے پر مبارکباد، کراچی کرکٹ، ڈومیسٹک کیلنڈر اور اسپورٹس جرنلسٹس کے مسائل پر تبادلہ خیال کیاگیا

منگل 4 اگست 2026 21:05

کراچی(اُردو پوائنٹ اخبارتازہ ترین - این این آئی۔ 04 اگست2026ء) اسپورٹس جرنلسٹس ایسوسی ایشن آف سندھ (سجاس) کے ایک وفد نے صدر محمود ریاض کی سربراہی اور پاکستان اسپورٹس رائٹرز فیڈریشن (PSWF) کے سیکریٹری جنرل اصغر عظیم کی قیادت میں ریجنل کرکٹ ایسوسی ایشن کراچی کے صدر اور کوئٹہ گلیڈی ای ایٹرز کے فرنچائزر ندیم عمر سے ملاقات کی۔وفد میں صدر محمود ریاض، جوائنٹ سیکریٹری طارق اسلم، فنانس سیکریٹری شاہد انصاری، مجلسِ عاملہ کے ارکان انیس الرحمن، سہیل خان اور جنید راجپوت شامل تھے، جبکہ ندیم عمر کی معاونت کوئٹہ گلیڈی ایٹرز کے منیجر اعظم خان نے کی۔

ملاقات کے دوران سجاس کے وفد نے ندیم عمر کو مسلسل تیسری مرتبہ ریجنل کرکٹ ایسوسی ایشن کراچی کا صدر منتخب ہونے پر مبارکباد پیش کی اور ان کے لیے نیک تمناؤں کا اظہار کیا۔

(جاری ہے)

اس موقع پر ندیم عمر نے کہا کہ پاکستان کرکٹ بورڈ ایسا مستقل ڈومیسٹک ایئر کیلنڈر ترتیب دے جس میں پی سی بی کے ایونٹس کے ساتھ کلب کرکٹ کے لیے بھی باقاعدہ ونڈو مختص ہو، تاکہ نچلی سطح پر کرکٹ کی سرگرمیاں متاثر نہ ہوں۔

انہوں نے کہا کہ کراچی کرکٹ کا مقدمہ لڑنے پر انہیں اکثر پی سی بی کی ناراضی کا سامنا کرنا پڑتا ہے، تاہم چیئرمین پی سی بی محسن نقوی کی جانب سے تمام ریجنز کو ڈومیسٹک کرکٹ میں شامل کرنے کا فیصلہ خوش آئند ہے۔ندیم عمر نے کہا کہ پاکستان سپر لیگ کے بارہویں سیزن میں کوئٹہ گلیڈی ایٹرز کی ٹیم میں کئی تبدیلیاں نظر آئیں گی، تاہم سرفراز احمد جیسا کھلاڑی دوبارہ ملنا آسان نہیں۔

انہوں نے سجاس کی خدمات کو سراہتے ہوئے کہا کہ بغیر کسی سرکاری فنڈ کے اسپورٹس جرنلسٹس کے مسائل کے حل، اراکین کو عمرے کی سعادت دلانے، طبی امداد فراہم کرنے اور سالانہ ایوارڈز سمیت مختلف سماجی سرگرمیوں کا انعقاد سجاس کی قابلِ قدر خدمات کا ثبوت ہے۔اس موقع پر سجاس کے صدر محمود ریاض نے کہا کہ مسلسل تیسری بار ریجنل کرکٹ ایسوسی ایشن کراچی کی صدارت حاصل کرنا ندیم عمر پر کراچی کے کرکٹ آرگنائزرز کے اعتماد کا مظہر ہے۔

انہوں نے کہا کہ کرکٹ کے فروغ میں ندیم عمر کا کردار قابلِ تحسین ہے اور انہیں یقین ہے کہ ان کی قیادت میں کراچی کے باصلاحیت کرکٹرز کو قومی ٹیم میں نمائندگی کے مزید مواقع ملیں گے۔محمود ریاض نے کہا کہ کوئٹہ گلیڈی ایٹرز کا یہ اعزاز ہے کہ اس کے پلیٹ فارم سے متعارف کرائے گئے متعدد جونیئر کرکٹرز آج پاکستان کے اسٹار کھلاڑیوں میں شمار ہوتے ہیں۔ملاقات کے اختتام پر سجاس کے وفد نے ندیم عمر کو گلدستہ پیش کیا، جبکہ سندھ کی ثقافت اور محبت کی علامت کے طور پر اجرک اور سندھی ٹوپی بھی بطور تحفہ پیش کی گئی۔