پاکستان، سعودی عرب اور ترکیہ کا مشترکہ دفاعی معاہدہ مسلم امہ کیلئے غیر معمولی خوشی اور فخر کا باعث ہے، وجیہہ قمر

معاہدے کے تحت کسی ایک رکن پر حملہ تینوں ممالک پر حملہ تصور ہوگا اور اب مشکل کی کسی بھی گھڑی میں کوئی بھی ملک تنہا نہیں ہوگا، وزیرمملکت

اتوار 9 اگست 2026 19:45

اسلام آباد (اُردو پوائنٹ اخبارتازہ ترین - این این آئی۔ 09 اگست2026ء) وزیر مملکت برائے وفاقی تعلیم و پیشہ ورانہ تربیت وجیہہ قمر نے کہا ہے کہ پاکستان، سعودی عرب اور ترکیہ کے درمیان مشترکہ دفاعی معاہدہ مسلم امہ کے لیے خوشی اور فخر کا ایک غیر معمولی معاہدہ ہے۔اتوار کو پاکستان،ترکیہ اور سعودی عرب مکہ باہمی معاہدہ کے حوالے سے گفتگو کرتے ہوئیانہوں نے کہا کہ سعودی ولی عہد محمد بن سلمان، ترک صدر رجب طیب اردوان اور وزیراعظم محمد شہباز شریف نے یہ فیصلہ کرکے ثابت کیا ہے کہ مضبوط قیادت قوموں کو قریب لاتی ہے۔

وجیہہ قمر نے وزیراعظم شہباز شریف اور فیلڈ مارشل سید عاصم منیر کی محنت اور بہترین قیادت کو سراہتے ہوئے پوری قوم کی جانب سے انہیں مبارکباد پیش کی۔انہوں نے کہا کہ معاہدے کے تحت کسی ایک رکن پر حملہ تینوں ممالک پر حملہ تصور ہوگا اور اب مشکل کی کسی بھی گھڑی میں کوئی بھی ملک تنہا نہیں ہوگا۔

(جاری ہے)

وزیر مملکت نے کہا کہ مکہ مکرمہ کی سرزمین سے اٹھنے والا یہ خوبصورت پیغام پوری دنیا میں مسلم امہ کو متحد کرنے کا باعث بن سکتا ہے۔

انہوں نے کہا کہ سعودی عرب کی مضبوط معیشت، ترکیہ کی جدید دفاعی طاقت اور پاکستان کی تجربہ کار افواج مل کر امن اور مشترکہ خوشحالی کی ضامن بنیں گی ۔وجیہہ قمر نے کہا کہ آج ہم فخر اور عاجزی کے ساتھ اللہ تعالی کا شکر ادا کرتے ہیں، یہ معاہدہ پوری مسلم امہ کے لیے محفوظ اور خوشحال مستقبل کی امید ہے۔