یوم آزادی کی تقریب‘پاکستانی سفیر پاکستان ممتاز زہرہ بلوچ نے پیرس میں پاکستانی سفارتخانے میں قومی پرچم لہرایا

پیرس(اردوپوائنٹ اخبارتازہ ترین-انٹرنیشنل پریس ایجنسی۔14 اگست ۔2026 ) پاکستان کے 79ویں یومِ آزادی کے موقع پر پاکستانی سفیر پاکستان ممتاز زہرہ بلوچ نے پیرس میں پاکستانی سفارتخانے میں قومی پرچم لہرایا اس موقع پر قومی ترانے کی دھن بجائی گئی اور پاکستانی کمیونٹی کے ممتاز افراد، جن میں بڑی تعداد میں بچے بھی شامل تھے، کا خیرمقدم کیا گیا تقریب کے دوران صدرِ پاکستان، وزیراعظم اور وزیرخارجہ پاکستان کے پیغامات بھی پڑھ کر سنائے گئے.

(جاری ہے)

یومِ آزادی پر سب کو مبارکباد دیتے ہوئے سفیرِ پاکستان نے کہا کہ 14 اگست ایک حقیقی معنوں میں بابرکت اور اہم دن ہے، جو پوری قوم کو جشن، قائداعظم اور تحریکِ آزادی کے دیگر راہنماﺅں کو خراجِ عقیدت پیش کرنے، اپنے بزرگوں کی عظیم قربانیوں کو یاد کرنے، اپنے شاندار ماضی سے حوصلہ حاصل کرنے اور گزشتہ کئی دہائیوں کی عظیم کامیابیوں کا اعتراف کرنے کے لیے متحد کرتا ہے.

انہوں نے کہا کہ حکومت پاکستان موجودہ سال 2026ءکو قائداعظم محمد علی جناح کی 150ویں سالگرہ کے موقع پر ”سالِ قائداعظم محمد علی جناح“ کے طور پر منا رہی ہے قائداعظم کی عظیم فکری بصیرت کا تقاضا ہے کہ قوم ان کے اصولوں کو مضبوطی سے اپنائے اور پاکستان کی ترقی و خوشحالی میں اپنا بھرپور کردار ادا کرے. سفیر ممتاز زہرہ بلوچ نے کہا کہ قائداعظم نے قوم کو تین سنہری اصول ایمان، اتحاد اور نظم و ضبط دیے تھے اور ان اصولوں پر عمل پیرا ہو کر ہی قوم آنے والی نسلوں کے لیے ایک روشن مستقبل کی جانب گامزن ہو سکتی ہے سفیرنے کہا کہ آزادی کی خوشیاں مناتے ہوئے ہمیں اپنے کشمیری اور فلسطینی بھائیوں اور بہنوں کو بھی یاد رکھنا چاہیے، جو سات دہائیوں سے زائد عرصے سے آزادی اور حق خودارادیت کے لیے جدوجہد کر رہے ہیں انہوں نے جموں و کشمیر کے غیر قانونی طور پر بھارتی قبضے والے علاقوں (IIOJK) اور فلسطین کے عوام کے جائز حقوق کے لیے پاکستان کی سیاسی اور سفارتی حمایت کا اعادہ کیا.

سفیر نے فرانس میں مقیم پاکستانی تارکین وطن کی جانب سے پاکستان اور فرانس کے تعلقات کے فروغ میں ادا کیے جانے والے کردار کو بھی سراہا انہوں نے اس عزم کا اظہار کیا کہ سفارتخانہ فرانس میں مقیم پاکستانیوں کو ہر ممکن سہولت فراہم کرنے کے لیے اپنی بھرپور کوششیں جاری رکھے گا بعد ازاں سفیر پاکستان نے سفارتخانے میں قائداعظم محمد علی جناح کی زندگی اور خدمات کے موضوع پر ایک ”تاریخی تصویری نمائش“ کا افتتاح کیا نمائش میں قائداعظم کی بصیرت افروز قیادت اور پاکستان کے بانی کی لازوال میراث کو اجاگر کرنے والے تاریخی ریکارڈز اور نایاب تصاویر کا شاندار مجموعہ پیش کیا گیا تقریب میں شریک مہمانوں، بالخصوص بچوں نے نمائش میں گہری دلچسپی کا اظہار کیا اور ”پاکستان زندہ باد“ کے نعرے بھی لگائے.