ایم کیو ایم کے رہنما سندھ حکومت پر تنقید سے پہلے اپنے ماضی اور کراچی کے عوام کے ساتھ کیے گئے جھوٹے وعدوں کا حساب دیں سینیٹر وقار مہدی

اسلام آباد (اُردو پوائنٹ اخبارتازہ ترین - این این آئی۔ 16 اگست2026ء) جنرل سیکرٹری پاکستان پیپلز پارٹی سندھ سینیٹر وقار مہدی نے ایم کیو ایم رہنماؤں کی پریس کانفرنس پر سخت ردعمل کا اظہار کرتے ہوئے کہاہے کہ ایم کیو ایم کے رہنما سندھ حکومت پر تنقید سے پہلے اپنے ماضی اور کراچی کے عوام کے ساتھ کیے گئے جھوٹے وعدوں کا حساب دیں ،ایم کیو ایم کے منتشر رہنماؤں کو کراچی کی فکر آج کیوں یاد آ رہی ہی کراچی کے عوام پوچھتے ہیں ان کے دور میں شہر کے بنیادی مسائل کیوں حل نہیں ہوئے۔

اپنے بیان میں سینیٹر وقار مہدی نے کہاکہ سندھ کو تقسیم کرنے کی باتیں کرنے والے سندھ کے عوام کی طاقت اور یکجہتی کو چیلنج نہ کریں،کراچی کو الگ انتظامی یونٹس میں تقسیم کرنے کے خواب دیکھنے والے جان لیں کہ کراچی سندھ کا اٹوٹ حصہ ہے۔

(جاری ہے)

سینیٹر وقار مہدی نے کہاکہ ایم کیو ایم کو کراچی کی تباہی کی ذمہ داری کا بے بنیاد الزام پیپلز پارٹی پے لگانے سے پہلے اپنے گریبان میں جھانکنا چاہیے ۔

انہوںنے کہاکہ سندھ کو تقسیم کرنے کا ایجنڈا نہ سندھ کے عوام قبول کریں گے نہ پیپلز پارٹی، یہ سازش ہر محاذ پر ناکام بنائیں گے۔ سینیٹر وقار مہدی نے کہاکہ ایم کیو ایم رہنما سندھ حکومت سے حساب مانگتے ہیں، ہم ان سے پوچھتے ہیں کراچی میں اپنے طویل 40 سالہ سیاسی اقتدار کا حساب کب دیں گی ۔ انہوںنے کہاکہ جو لوگ برسوں کراچی کے نام پر اقتدار، وسائل اور ذاتی فائدے حاصل کرتے رہے، آج وہی پیپلز پارٹی کو کراچی کی خدمت کا درس دے رہے ہیں۔

انہوںنے کہاکہ کراچی کے مسائل کا حل سندھ کی تقسیم نہیں، اختیارات کی نچلی سطح تک منتقلی اور وسائل کی منصفانہ تقسیم ہے جو پیپلزپارٹی کی حکومت پہلے ہی کررہی ہے۔انہوںنے کہاکہ ایم کیو ایم کو کراچی کی ترقی سے اتنی ہی محبت ہے تو وفاقی حکومت میں اپنا اثر استعمال کرکے کراچی کے لیے اربوں روپے کے منصوبے کیوں نہیں لاتی ۔ انہوںنے کہاکہ پیپلز پارٹی نے کراچی میں ٹرانسپورٹ، انفراسٹرکچر، صحت اور دیگر شعبوں میں عملی منصوبے شروع کیے، ایم کیو ایم اپنے دور کا ایک بڑا عوامی منصوبہ گنوائے۔

انہوںنے کہاکہ پریس کانفرنسوں میں شور مچانے سے کراچی کے عوام کا مینڈیٹ تبدیل نہیں ہوگا، عوام فیصلہ کر چکے ہیں کہ انہیں نفرت نہیں ترقی چاہیے۔ انہوںنے کہاکہ ایم کیو ایم سندھ حکومت کو گالیاں دینے کے بجائے اپنی وفاقی حکومت سے پوچھے کہ کراچی کے لیے نئے منصوبوں اور وسائل کا اعلان کہاں ہی ،پیپلز پارٹی نے کبھی کراچی کو سندھ سے الگ نہیں سمجھا، کراچی سندھ کا دل ہے اور اس کی ترقی پورے سندھ کی ترقی ہے۔

سینیٹر وقار مہدی نے کہاکہ سندھ کے وسائل پر قبضے اور سندھ کی تقسیم کے خواب دیکھنے والوں کو پیپلز پارٹی سیاسی میدان میں بھرپور جواب دے گی ۔ انہوںنے کہاکہ ایم کیو ایم کی سیاست کا پرانا فارمولا نفرت، تقسیم اور خوف تھا؛ سندھ بلخصوص کراچی کے عوام اس سیاست کو دفن کر چکے ہیں،ایم کیو ایم رہنما پہلے اپنی جماعت کی کارکردگی کا وائٹ پیپر جاری کریں، پھر سندھ حکومت سے سوال کریں ۔ انہوںنے کہاکہ پیپلز پارٹی کراچی سمیت پورے سندھ کے عوام کے ساتھ کھڑی ہے، سندھ کی وحدت، وسائل اور عوامی مینڈیٹ پر کوئی سمجھوتہ نہیں ہوگا۔