yاسلام آباد(اُردو پوائنٹ اخبارتازہ ترین - آن لائن۔ 16 اگست2026ء) پاکستان پیپلز پارٹی سندھ کے جنرل سیکرٹری سینیٹر وقار مہدی نے ایم کیو ایم رہنماؤں کی پریس کانفرنس پر سخت ردعمل دیتے ہوئے کہا ہے کہ ایم کیو ایم کے رہنما سندھ حکومت پر تنقید کرنے سے پہلے اپنے ماضی اور کراچی کے عوام کے ساتھ کیے گئے جھوٹے وعدوں کا حساب دیں۔سینیٹر وقار مہدی نے کہا کہ ایم کیو ایم کے منتشر رہنماؤں کو کراچی کی فکر آج کیوں یاد آ رہی ہی کراچی کے عوام پوچھتے ہیں کہ ان کے طویل سیاسی اقتدار کے دوران شہر کے بنیادی مسائل کیوں حل نہیں ہوئے۔

انہوں نے کہا کہ سندھ کو تقسیم کرنے کی باتیں کرنے والے سندھ کے عوام کی طاقت اور یکجہتی کو چیلنج نہ کریں۔ کراچی کو الگ انتظامی یونٹس میں تقسیم کرنے کے خواب دیکھنے والے جان لیں کہ کراچی سندھ کا اٹوٹ حصہ ہے۔

(جاری ہے)

وقار مہدی نے کہا کہ ایم کیو ایم کو کراچی کی تباہی کی ذمہ داری کا بے بنیاد الزام پیپلز پارٹی پر لگانے سے پہلے اپنے گریبان میں جھانکنا چاہیے۔

سندھ کو تقسیم کرنے کا ایجنڈا نہ سندھ کے عوام قبول کریں گے اور نہ پیپلز پارٹی، اس سازش کو ہر محاذ پر ناکام بنایا جائے گا۔انہوں نے کہا کہ ایم کیو ایم رہنما سندھ حکومت سے حساب مانگتے ہیں، ہم ان سے پوچھتے ہیں کہ کراچی میں اپنے طویل سیاسی اقتدار کا حساب کب دیں گی جو لوگ برسوں کراچی کے نام پر اقتدار، وسائل اور ذاتی فائدے حاصل کرتے رہے، آج وہی پیپلز پارٹی کو کراچی کی خدمت کا درس دے رہے ہیں۔

سینیٹر وقار مہدی نے کہا کہ کراچی کے مسائل کا حل سندھ کی تقسیم نہیں بلکہ اختیارات کی نچلی سطح تک منتقلی اور وسائل کی منصفانہ تقسیم ہے، جس پر پیپلز پارٹی کی حکومت کام کر رہی ہے۔انہوں نے سوال کیا کہ اگر ایم کیو ایم کو کراچی کی ترقی سے اتنی ہی محبت ہے تو وفاقی حکومت میں اپنا اثر و رسوخ استعمال کرکے کراچی کے لیے اربوں روپے کے منصوبے کیوں نہیں لاتی ان کا کہنا تھا کہ پیپلز پارٹی نے کراچی میں ٹرانسپورٹ، انفراسٹرکچر، صحت اور دیگر شعبوں میں عملی منصوبے شروع کیے ہیں، ایم کیو ایم اپنے دور کا ایک بڑا عوامی منصوبہ گنوائے۔

سینیٹر وقار مہدی نے کہا کہ پریس کانفرنسوں میں شور مچانے سے کراچی کے عوام کا مینڈیٹ تبدیل نہیں ہوگا۔ عوام فیصلہ کر چکے ہیں کہ انہیں نفرت نہیں بلکہ ترقی چاہیے۔ ایم کیو ایم سندھ حکومت کو گالیاں دینے کے بجائے اپنی وفاقی حکومت سے پوچھے کہ کراچی کے لیے نئے منصوبوں اور وسائل کا اعلان کہاں ہے۔انہوں نے کہا کہ پیپلز پارٹی نے کبھی کراچی کو سندھ سے الگ نہیں سمجھا، کراچی سندھ کا دل ہے اور اس کی ترقی پورے سندھ کی ترقی ہے۔

سندھ کے وسائل پر قبضے اور سندھ کی تقسیم کے خواب دیکھنے والوں کو پیپلز پارٹی سیاسی میدان میں بھرپور جواب دے گی۔وقار مہدی نے مزید کہا کہ ایم کیو ایم کی سیاست کا پرانا فارمولا نفرت، تقسیم اور خوف تھا، سندھ بالخصوص کراچی کے عوام اس سیاست کو دفن کر چکے ہیں۔ ایم کیو ایم رہنما پہلے اپنی جماعت کی کارکردگی کا وائٹ پیپر جاری کریں، پھر سندھ حکومت سے سوال کریں۔انہوں نے واضح کیا کہ پیپلز پارٹی کراچی سمیت پورے سندھ کے عوام کے ساتھ کھڑی ہے، سندھ کی وحدت، وسائل اور عوامی مینڈیٹ پر کوئی سمجھوتہ نہیں ہوگا۔