Live Updates

جماعت اسلامی کا مطالبات کی منظوری تک دھرنے جاری رکھنے کا اعلان

جماعت اسلامی 25 کروڑ لوگوں کا مقدمہ لڑرہی ہے، جنگ کے دوران بہانہ بنا کر پٹرول کی قیمتیں بڑھائی گئیں . حافظ نعیم الرحمان

میاں محمد ندیم پیر 17 اگست 2026 15:35

جماعت اسلامی کا مطالبات کی منظوری تک دھرنے جاری رکھنے کا اعلان

لاہور(اردوپوائنٹ اخبارتازہ ترین-انٹرنیشنل پریس ایجنسی۔17 اگست ۔2026 ) امیر جماعت اسلامی حافظ نعیم الرحمان نے مطالبات کی منظوری تک احتجاج جاری رکھنے کا اعلان کر تے ہوئے کہا ہے کہ یہ دھرنے پرامن طریقے سے جاری رہیں گے، شہریوں سے بھی اپیل ہے ان دھرنوں میں آئیں اور بتائیں کہ یہ لیوی بھتہ قبول نہیں ہے.

(جاری ہے)

پیٹرولیم لیوی کیخلاف جماعت اسلامی کے دھرنے پیر کو دوسرے روز بھی جاری رہے لاہور میں وزیر اعلی ہاﺅ س جبکہ کراچی، پشاور اور کوئٹہ میں گورنر ہاﺅ سز کے باہر دھرنوں میں کارکنان دوسرے روز بھی موجود ہیں امیر جماعت اسلامی پاکستان حافظ نعیم نے لاہور میں دھرنے کے مقام پر پریس کانفرنس کرتے ہوئے کہا کہ یہ دھرنے پرامن طریقے سے جاری رہیں گے، شہریوں سے بھی اپیل ہے کہ وہ ان دھرنوں میں آئیں اور بتائیں کہ یہ لیوی بھتہ قبول نہیں ہے.

حافظ نعیم نے کہا کہ جماعت اسلامی 25 کروڑ لوگوں کا مقدمہ لڑرہی ہے، جنگ کے دوران بہانہ بنا کر پٹرول کی قیمتیں بڑھائی گئیں، یہ کہتے ہیں آئی ایم ایف کی وجہ سے قیمتیں بڑھائیں، حکمران آئی ایم ایف کے غلام بن چکے ہیں ہمارا مطالبہ ہے کہ پٹرول 225 روپے فی لیٹر کیا جائے انہوں نے کہا کہ حکومت نے بریفنگ کے لئے کمیٹی بنائی ہے، ہم کمیٹی کو دعوت دیتے ہیں وہ لاہور میں آئیں ہم میزبانی کریں گے، یہ دھرنا کسی پارٹی یا کسی کی ذات کے لیے نہیں بلکہ عوام کے لیے ہے.

حافظ نعیم کا کہنا تھا کہ پیٹرولیم مصنوعات کی قیمتوں میں اضافے سے مہنگائی ہو رہی ہے، بجلی کے بل میں طرح طرح کے ٹیکسز رکھے گئے ہیںانہوں نے کہا کہ آئی پی پیز 1994 سے ملک میں بجلی بحران کے ذمہ دار ہیں ، بجلی کے پلانٹس کی کپیسیٹی میں بھی غلط کام کیا گیا. انہوں نے کہا کہ کپسیٹی پیمنٹس کا بوجھ بھی صارفین اٹھاتے ہیں، قرض پر سود بھی عوام ادا کریں تو ریلیف کہاں ہے؟ ان کا کہنا تھا کہ پاکستان میں جب صحیح عدالتی نظام آئے گا ، یہ جعلی قسم کے سیٹ اپ ختم ہونگے تو ان کا فرانزک آڈٹ بھی ہو گا ، ان کا ٹرائل بھی ہو گا کہ انہوں نے لوگوں کے ساتھ فراڈ کیا کیا ہے، بجلی کی پیداواری استعداد میں دو نمبری کی گئی .

دوسری جانب امیر جماعت اسلامی کراچی منعم ظفر نے اپنے بیان میں کہا کہ حکومت فوری طور پر پیٹرول کی قیمتوں میں کمی کرے، مہنگائی کا بوجھ عام آدمی کے کندھوں سے ہٹانا حکومت کی اولین ذمہ داری ہے.