کویت کا پاکستان کے ساتھ پروٹوکول معاہدہ 2026 پر دستخط کے بعد بھارت کے ساتھ بھی دفاعی تعاون مزید مضبوط بنانے پر اتفاق

بھارت اور کویت کی مشترکہ دفاعی کمیٹی کا نئی دہلی میں اجلاس، فوجی مشقوں، تربیت اور دفاعی صنعت میں شراکت داری پر غور کیا گیا، بھارتی وزارت دفاع

ثنااللہ ناگرہ جمعہ 28 اگست 2026 23:37

نئی دہلی (اردوپوائنٹ اخبار تازہ ترین۔ انٹرنیشنل پریس ایجنسی ۔ 27 اگست 2026ء ) کویت کا پاکستان کے ساتھ پروٹوکول معاہدہ 2026 پر دستخط کے بعد بھارت کے ساتھ بھی دفاعی تعاون مزید مضبوط بنانے پر اتفاق، کویتی وفد کا بھارت کے ساتھ تربیت، فوجی مشقوں اور دفاعی صنعت میں شراکت داری پر غور، دونوں ممالک کا مختلف شعبوں میں دفاعی تعاون کو مزید مستحکم کرنے پر بھی اتفاق کیا گیا۔

گلف نیوز کے مطابق بھارت اور کویت کے درمیان مشترکہ دفاعی کمیٹی کا پہلا اجلاس جمعہ کو نئی دہلی میں منعقد ہوا، جس میں دونوں ممالک نے تربیت ، فوجی مشقیں ، فوجی ادویات ، اسٹاف مذاکرات، دفاعی صنعت اور تحقیق و ترقی (آر اینڈ ڈی) سمیت مختلف شعبوں میں دو طرفہ دفاعی تعاون کو مزید مستحکم کرنے پر اتفاق کیا۔

(جاری ہے)

بھارتی وزارتِ دفاع کے مطابق مشترکہ دفاعی کمیٹی کا پہلا اجلاس دسمبر 2024 میں بھارتی وزیراعظم کے کویت کے دورے کے دوران دونوں ممالک کے درمیان دفاعی تعاون سے متعلق طے پانے والی مفاہمت کی یادداشت میں بیان کردہ مقاصد کو عملی شکل دینے کی جانب ایک اہم قدم ہے۔

اجلاس کی مشترکہ صدارت بھارتی وزارتِ دفاع کے جوائنٹ سیکریٹری امیتابھ پرساد اور کویتی وفد کے سربراہ بریگیڈیئر جنرل رائد السکران نے کی۔ کویتی وفد پانچ ارکان پر مشتمل تھا، جبکہ بھارتی وفد میں تینوں مسلح افواج، محکمہ دفاعی پیداوار، دفاعی تحقیق و ترقی کی تنظیم، مسلح افواج کی طبی خدمات اور وزارتِ خارجہ کے نمائندے شامل تھے۔ یاد رہے گزشتہ روز پاکستان اور کویت کے دفاعی تعلقات میں اہم پیشرفت کے تحت دونوں ممالک نے پروٹوکول معاہدہ 2026 پر دستخط کئے۔

میڈیا رپورٹ کے مطابق پاکستان کی وزارت دفاع کے ترجمان کے جاری کردہ بیان کے مطابق راولپنڈی میں کویتی وزیر دفاع اور وفد نے وزارت دفاع کا دورہ کیا، وفد میں کویتی فوج کے چیف آف جنرل اسٹاف لیفٹیننٹ جنرل خالد درج سعد الشریعان بھی شامل تھے۔ اس موقع پر وزیر دفاع خواجہ آصف اور کویتی ہم منصب شیخ عبداللہ علی عبداللہ السالم الصباح اور چیف آف جنرل اسٹاف لیفٹیننٹ جنرل خالد دارج سعد الشریعان کی سربراہی میں وفد کی اہم ملاقات ہوئی۔

ملاقات میں باہمی دلچسپی کے امور، سیکیورٹی تعاون اور دفاعی روابط مزید مضبوط بنانے کا جائزہ لیا گیا۔

Pakistan 🇵🇰 and Kuwait 🇰🇼 sign joint defence and military cooperation agreement pic.twitter.com/HWR1NmbUGN
— Pakistan Armed Forces News 🇵🇰 (@PakistanFauj) August 27, 2026

اس موقع پر پاکستان اور کویت کے درمیان پروٹوکول معاہدہ 2026 پر دستخط کیے گئے۔ دفاعی تعاون معاہدے سے 2023 کے تحت قائم فوجی تعاون کے موجودہ فریم ورک کو مزید وسعت ملے گی، معاہدے کے تحت پاک فوج کویت کی افواج کو مختلف شعبوں میں معاونت فراہم کرے گی۔

پروٹوکول معاہدہ 2026 سے پاکستان اور کویت 2023 کے دفاعی تعاون معاہدے کے تحت فوجی تعاون کا فریم ورک مزید مضبوط ہوگا۔ دفاعی تعاون میں استعدادکار میں اضافے اور سرحدی انتظام سمیت دفاعی تعاون کے دیگر باہمی طے شدہ شعبے شامل ہیں۔ ترجمان کے مطابق پاکستان اور کویت نے دفاعی شراکت داری مزید مضبوط بنانے کے عزم کا اعادہ کیا، دفاعی تعاون سے باہمی سلامتی، علاقائی امن اور استحکام کو فروغ ملے گا۔