صولت مرزا کی اہلیہ نے کیس کی از سرنو تحقیقات کا مطالبہ کر دیا،الطاف حسین پہلے کہتے تھے صولت مرزا ہمارا شیر ہے ، اب کہتے ہیں کبھی نام ہی نہیں سنا :نجی ٹی وی سے گفتگو

پیر 13 اپریل 2015 08:50

کراچی (اُردو پوائنٹ اخبارآن لائن۔13 اپریل۔2015ء) سزائے موت کے مجرم صولت مرزا کی اہلیہ نے کہا ہے کہ ایف آئی آر میں صولت مرزا کا نام موجود نہیں تو اس کو سزا کیوں دی جا رہی ہے ، ایک نجی ٹی وی کو انٹرویو میں ان کا کہنا ہے کہ ان کے شوہر الطاف حسین اور ایم کیو ایم کی وجہ سے سزا کاٹ رہے ہیں۔ صولت مرزا کی اہلیہ کا کہنا تھا کیس کی دوبارہ تحقیقات کرائی جائے ، اور اصل محرکات کو سامنے لایا جائے۔

اس کیس میں صرف صولت مجرم نہیں جو ساتھ تھے ان کے خلاف بھی کارروائی کی جائے۔ صولت مرزا کی اہلیہ کا کہنا تھا ایک ہی دن میں تین بار دھمکی آمیز فون کالز موصول ہوئیں۔ کہا گیا کہ صولت اور اس کی اہلیہ اچھا نہیں کر رہے ہیں ، اس کا انجام اچھا نہیں ہوگا۔ صولت مرزا کی اہلیہ کا کہنا تھا الطاف بھائی کہتے تھے کہ صولت ہمارا شیر ہے اب کہتے ہیں نام ہی نہیں سنا ہے۔

(جاری ہے)

انہوں نے کہا کہ ایم کیو ایم کے بہت سے رہنماء صولت مرزا سے رابطے میں تھے ، اب جھوٹ بولتے ہیں۔ گورنر سندھ سے متعدد بار ملاقاتیں کیں۔ الطاف حسین سے فیکس کے ذریعے رابطہ تھا۔ لندن میں محمد انور سے رابطے میں تھے اور انہیں مقدمے کی تفصیلات سے آگاہ کرتے تھے۔ صولت مرزا کی اہلیہ کا کہنا تھا کہ صولت نے وڈیو بیان کسی کے کہنے یا دباوٴ پرنہیں دیا۔ وڈیو بیان کا مقصد ایسے لوگوں کو بچانا تھا جو ایم کیو ایم کے ہاتھوں استعمال ہو رہے ہیں۔ انہوں نے کہا پارٹی کی خاطر صولت مرزا اپنے ماں باپ کے جنازوں کو کندھا بھی نہیں دے سکے۔