بھارت نے اجمیرشریف میں زائرین کے غسل پرپابندی لگا دی

انتظامیہ نے اپنا فیصلہ واپس نہیں لیا تو اس کے خلاف تحریک چلائی جائے گی، زائرین

بدھ 22 فروری 2017 19:41

اجمیر(اُردو پوائنٹ اخبار آن لائن۔ جمعرات 23 فروری 2017ء)بھارت نے اجمیرشریف میں زائرین کے غسل پرپابندی لگا دی،راجستھان کے اجمیر میں اگلے ماہ شروع ہونے والے خواجہ معین الدین چشتی کے 805ویں سالانہ عرس کے دوران تاریخی انا ساگر جھیل کو آلودگی سے بچانے کے لئے عام زائرین کے غسل کرنے پر انتظامیہ کی طرف سے عائد کی گئی پابندی کی مسلمانوں نے سخت مخالفت کی ہے۔

بی جے پی کے ممبر اسمبلی اور وزیر تعلیم پروفیسر واسودیو دیونانی کی صدارت میں ہوئی میٹنگ میں انا ساگر میں زائرین کے غسل کرنے پر پابندی لگانے کا فیصلہ لیا گیا تھا۔ عرس کی تیاریوں کے سلسلے میں ہوئی اس میٹنگ میں کہا گیا کہ انا ساگر کے گھاٹ پر اس مرتبہ زائرین کے غسل کرنے پر پابندی رہے گی۔

(جاری ہے)

درگاہ احاطہ میں درگاہ کمیٹی کے خلاف کئے گئے مظاہرہ میں مظاہرین نے وارننگ دی کہ اگر انتظامیہ نے اپنا فیصلہ واپس نہیں لیا تو اس کے خلاف تحریک چلائی جائے گی۔

ملک کے دوردراز سے اس عرس میں آنے والے زائرین کہاں غسل کریں گے۔مظاہرین نے الزام لگایا کہ آلودگی کے نام پر انا ساگر میں غسل کرنے پر پابندی انتظامیہ کی گندی سوچ کا مظہر ہے۔انہوں نے کہا کہ زائرین مذہبی رسومات کی ادائیگی کے لئے یہاں غسل اور وضو کرتے ہیں۔ انتظامیہ کے فیصلے سے مذہبی جذبات کو ٹھیس پہنچنا لازمی ہے اور کسی کا پانی روکنا مذہب کے خلاف ہے۔