پنجاب کے تین منتخب اضلاع میں پیر سے پولیو مہم کا آغاز،

لاہور (اُردو پوائنٹ اخبارتازہ ترین - این این آئی۔ 29 جون2018ء) پنجاب کے 3 حساس اضلاع میں پولیومہم2 سی5جولائی کے درمیان منعقد کی جارہی ہے جس کے تحت 17لاکھ بچوں کو پولیو سے بچائو کے قطرے پلائے جائیں گے، یہ مہم ، جو کہ پولیوانتہائی رسک سیزن کی پہلی مہم ہے، منتخب ضلعوں میں کی جا رہی ہے جس میں پنجاب کے ڈیرہ غازی خان، راجن پور اور راولپنڈی کی 163 یونین کونسل شامل ہیں،خیبر پختونخواہ ،سندھ اور بلوچستان سے تعلق رکھنے والی متحرک آبادی کی موجودگی کی وجہ سے یہ اضلاع حساس قرار دئیے گئے ہیں۔

اس کے علاوہ مئی کے مہینے میں راولپنڈی سے ماحولیاتی نمونوں کے مثبت آنے کے بعدضلع کی منتخب یونین کونسلوں میں پولیو مہم کا انعقاد کیا گیا ہے۔ کوآرڈینیٹر ایمرجنسی آپریشن سنٹرپنجاب اور ڈائیریکٹر جنرل ہیلتھ سروسز ڈاکٹر منیر احمدکے مطابق چونکہ پنجاب سے ملحقہ صوبوں کی متحرک آبادیاں جو ایک دوسرے سے جڑی ہیںبہت بڑی تعداد میں پنجاب آتی ہیں لہذابچوں کی ویکسینیشن ایک بہت بڑا چیلنج ہے۔

(جاری ہے)

ڈاکٹر منیر کے مطابق تین صوبوں میں ماحولیاتی نمونوں اور بلوچستان کی دکی تحصیل میں تین بچوں میںپولیو وائرس کی تصدیق کی جا چکی ہے۔ اس کے علاوہ بنوں میں2016کے بعد پولیو وائرس کی موجودگی کا انکشاف ہوا ہے۔ لیبارٹری ٹیسٹ سے پتہ چلتا ہے کہ یہی وائرس فروری میں ڈیرہ غازی خان میں پایا گیا تھا۔ چنانچہ ایسے تمام اضلاع جن میں پولیو زدہ علاقوں سے آمدورفت ہے، وہاں پولیو مہم کا آغاز کیا جارہا ہے۔

ڈائریکٹر جنرل ہیلتھ سروسز ڈاکٹر منیر احمدنے گزشتہ روزاضلاع کوتیاری مکمل کرنے کی ہدایات جاری کیں ۔انھوں نے کہا پولیو مہم کے آغاز سے پہلے والدین کو یقین دلایا جاتا ہے کہ پولیو ویکسین محفوظ، موثر اور حکومت پاکستان کے تحت کام کرنے والی اتھارٹیز سے منظور شدہ ہے۔ انھوں نے کہا جو والدین اپنے بچوں کو پولیو ویکسین نہیں پلاتے وہ نہ صرف اپنے بچوں بلکہ گردونواح کے دوسرے بچوں کی زندگی کو بھی خطرے میں ڈال دیتے ہیں۔

کوآرڈینیٹر ایمرجنسیی آپریشن سنٹر ڈاکٹر منیر احمد نے مزیدکہا کہ صوبوں کے سنگم پر واقع اضلاع جہاں سے بین الصوبا ئی نقل و حمل کے اہم راستے ہیں پر خاص توجہ دی جا رہی ہے۔ اس مقصد کے لیے اہم مقامات اور گزرگاہوں پر پوا ٴنٹ قائم کئے گئے ہیں جہاں صحت محافظ ٹیمیں تشکیل دے دی گئی ہیں۔ ڈاکٹر منیر نے اس بات کی تاکید کی کہ پولیو کے خلاف مدافعتی مہم کے دوران تمام بچوں کو ہر بار ویکسین پلانا انتہائی ضروری ہے۔

ڈاکٹر منیر کا کہنا تھا پولیو ویکسین کی متعدد خوراکیں (بعض اوقات10 سے بھی زائد بار)بچے کو مکمل طور پر تحفظ فراہم کرتی ہیں۔ کوآرڈینیٹر ایمرجنسیی آپریشن سنٹر نے والدین سے کہا بچوں کو پولیو کے قطرے ضرور پلوائیں اور کسی جگہ ٹیمیں نہ پہنچنے کی صورت میں قریبی مراکز صحت یا عارضی حفاظتی ٹیکوں کے سنٹر پر قطرے پلوائیں۔ کسی شکایت کی صورت میں مہم کے دنوں میں0800-99000 ہیلپ لائن پر بھی رابطہ کیا جا سکتا ہے۔