عالمی برداری بھارت کومقبوضہ کشمیرمیں اسکے جنگی جرائم پر جواب دہ بنائے ،محمود احمد ساغر

اسلا م آباد(اُردو پوائنٹ اخبارتازہ ترین - این این آئی۔ 22 ستمبر2021ء) جموں و کشمیر ڈیموکریٹک فریڈم پارٹی کے قائم مقام چیئرمین محمود احمد ساغر نے عالمی برادری پر زور دیا ہے کہ وہ بھارت کے غیر قانونی زیر تسلط جموں وکشمیر میںجاری خونریزی اور بھارتی ریاستی دہشت گردی ختم کرانے کیلئے دیرینہ تنازعہ کشمیر کے حل کیلئے اپنی کوششوںمیں تیزی لائے ۔

کشمیر میڈیا سروس کے مطابق محمود احمد ساغر نے اسلام آباد میں جاری ایک بیان میںعالمی برادری کی توجہ مقبوضہ کشمیر کی تیزی سے بگڑتی سیاسی اور انسانی حقوق کی صورتحال کی طرف مبذول کراتے ہوئے کہا کہ بھارت میں مودی کی برسر اقتدار آنے کے بعد سے مقبوضہ کشمیر تباہی کے دہانے پر ہے۔انہوں نے کہا کہ مودی کی فسطائی حکومت کے دور میںجموں و کشمیر کی صورتحال مزید گھمبیر ہو گئی ہے جس کی وجہ سے مظلوم کشمیریوں میں مزید عدم تحفظ اور بے چینی پائی جاتی ہے۔

(جاری ہے)

محمود احمد ساغر نے کشمیر کے بارے میں بی جے پی کی طاقت کے وحشیانہ استعمال کی پالیسی کی شدید مذمت کرتے ہوئے کہاکہ عالمی برادری کو مقبوضہ علاقے میں بھارت کی بڑھتی ہوئی ریاستی دہشت گردی کا نوٹس لیاچاہیے اوربھارتی فوجیوںکی طرف سے جاری جنگی جرائم کی تحقیقات کرانی چاہیے ۔ ادھر ڈیموکریٹک فریڈم پارٹی کے قائم مقام چیئرمین نے ایک اور بیان میں اقوام متحدہ کی جنرل اسمبلی سے خطاب میں مسئلہ کشمیر کو اٹھانے پر ترک صدر رجب طیب اردوان کا شکریہ ادا کیاہے۔ انہوں نے کہا کہ ترکی نے ہمیشہ کشمیر کاز کی حمایت کی ہے اور اس دیرینہ تنازعے کو ہمیشہ تمام عالمی فورموںپر اجاگر کیا ہے ۔