پی ڈی ایم جماعتیں اے سے لیکر زیڈ تک جتنے مرضی پلان بنا لیں فر ق نہیں پڑتا‘محمدسرور

لاہور(اُردو پوائنٹ اخبارتازہ ترین - این این آئی۔ 27 جنوری2021ء) گور نر پنجاب چوہدری محمدسرور نے کہا ہے کہ پی ڈی ایم جماعتیں اے سے لیکر زیڈ تک جتنے مرضی پلان بنا لیں فر ق نہیں پڑتا، پی ڈی ایم کے پہلے تمام پلان فیل ہوچکے آیندہ بھی فیل ہونگے، اپوزیشن جماعتیں کبھی ایک پیج پر آئی ہیں اور نہ ہی آئندہ آئیں گی،ترقی کی راہ میں اپوزیشن کا رکاوٹوں کا منصوبہ ملکی مفاد میں نہیں،ملک میں احتساب کو بر یک لگے گی نہ ہی حکومت اپنے موقف سے پیچھے ہٹے گی۔

وہ گور نر ہائوس لاہور میں قومی اسمبلی مجلس قائمہ خزانہ کے چیئرمین و تحر یک انصاف کے رکن قومی اسمبلی فیض اللہ کوموکا سے ملاقات کے دوران گفتگو کر رہے تھے۔ اس موقعہ پر سیاسی اور حکومتی امور سمیت دیگر ایشوز کے بارے میں بات چیت کی گئی ۔

(جاری ہے)

گور نر پنجاب چوہدری محمدسرور نے کہا کہ وزیر اعظم عمران خان کے بارے میں ان کے مخالفین جانتے ہیں کہ عمران خان حالات سے سمجھوتہ کر نے واالے نہیں بلکہ ڈٹ جانے والے لیڈر ہیںاور تاریخ اس بات کی گواہ ہے کہ وزیر اعظم عمران خان جو کہتے ہیں وہ کر کے بھی دکھاتے ہیں۔

اُنہوں نے کہا کہ حکومت اور اتحادی متحد ہیں مگر پی ڈی ایم میں درجنوں مختلف موقف ہیںان کے پاس کوئی نظر یہ اوراصول نہیں۔ اُنہوں نے کہا کہ پی ڈی ایم کا عارضی اتحاد ہے حکومت اپوزیشن کے احتجاج اور لانگ مارچ کی دھمکیوں سے خوفزدہ ہونے والی نہیں۔ گورنر نے کہا کہ وزیر اعظم عمران خان ملک کو درست سمت میں لیکر جارہے جو اپوزیشن جماعتوں سے برداشت نہیں ہو رہا۔

اُنہوں نے کہا کہ اگر اپوزیشن یہ سمجھتی ہے کہ وہ اپنی احتجاجی سیاست اور انتشار پیدا کر کے حکومت کو دبائو میں لے آگئی تو ایسا کسی صورت نہیں ہوگا۔چوہدری محمدسرور نے کہا کہ ملک کی معاشی ترقی اور استحکام کو یقینی بنانے کیلئے ملک میںشفاف اور بلا تفر یق احتساب ضروری ہے اور حکومت کی دو ٹوک واضح پالیسی ہے کہ ملک میں احتساب کو بر یک لگے گی نہ ہی حکومت اپنے موقف سے پیچھے ہٹے گی۔

انہوں نے کہا کہ تحر یک انصاف کی حکومت نے عوام سے جو بھی وعدے کیے ہیں ان کوپورا کیا جائے گا۔اس موقعہ پر گفتگو کرتے ہوئے تحر یک انصاف کے ایم این اے فیض اللہ کومکوکا نے کہا کہ پہلی بار عام آدمی کی ترقی اور خوشحالی کے لیے کام ہورہا ہے۔ اُنہوں نے کہا کہ اپوزیشن کا انتشار اور فساد پر مبنی ایجنڈا ناکام ہوگا۔بعدازاں،گور نر پنجاب چوہدری محمد سرور نے اپنے ایک بیان میں بھارتی کسانوں پر مودی حکومت کے تشدد کی شدید مذمت کرتے ہوئے کہا کہ دنیا کے سامنے ثابت ہو چکا ہے کہ بھارت میں بنیادی انسانی حقوق کا قتل عام کیا جارہا ہے اس لیے اقوام متحدہ سمیت تمام عالمی اداروں کی ذمہ داری ہے کہ وہ بھارت میں انسانی حقوق کے قتل عام کا نوٹس لیں۔