ائیر کوالٹی بہتر کرنے اور سموگ کم کرنے کے پلان پر عمل درآمد کے دوسرے مرحلے کا آغاز

لاہور (اُردو پوائنٹ اخبارتازہ ترین - آن لائن۔ 29 اپریل2024ء) وزیر اعلی پنجاب مریم نواز شریف کے صوبہ پنجاب میں ائیر کوالٹی بہتر کرنے اور سموگ کم کرنے کے پلان پر عمل درآمد کے دوسرے مرحلے کا آغازکردیا گیا ہے۔انسانی صحت کا قاتل زہریلا دھواں پھیلانے والی فیکٹریوں پر ماحولیاتی تحفظ کے ادارے (ای پی ای) کے چھاپوں کا سلسلہ شروع کر کے ماحولیاتی قوانین کی خلاف ورزی پر صوبہ پنجاب میں گرینڈ آپریشن جاری ہے۔

ان خیالات کا اظہار سینئر منسٹر مریم اورنگزیب نے کرتے ہوئے کہا کہ ای پی اے ٹیموں نے لاہور سیالکوٹ موٹر وے پر بھی کارروائیاں کی ہیں۔آنے والے دنوں میں ماحولیاتی آلودگی، زہریلے مادوں کے اخراج اور سموگ کی وجہ بننے والی فیکٹریوں کے خلاف کارروائیاں مزید تیز کی جائیں گی۔

(جاری ہے)

وزیر اعلی پنجاب نے انسانی صحت کے لئے مضر اور کینسر سمیت مہلک بیماریاں پیدا کرنے والے دھوئیں کے تدارک کے ٹاسک پر عملدرآمد کی ہدایت دی ہے۔

ان اقدامات سے ائیرکوالٹی انڈیکس بہتر ہوگا، سموگ کی صورت حال میں بھی بہتری آئے گی۔زیادہ دھواں پیدا کرنے والے علاقوں کی میپنگ بھی شروع کر دی گئی، دھوئیں کی مقدار جانچنے کے جدید آلات سے بھی مدد لی جائے گی۔مریم اورنگزیب نے مزید کہا کہ قانون سازی کے لئے بھی کام تیز کر دیا گیا، قانون سازی سے سزائیں اور بھاری جرمانے بھی کئے جائیں گے۔سینئر وزیر پنجاب مریم اورنگزیب نے صنعتوں کو ماحولیاتی قوانین پر عملدرآمد اور ائیر کوالٹی بہتر بنانے کی مہم میں بھرپور ساتھ دینے کی اپیل کی ہے۔انہوں نے ہدایت کی ہے کہ صنعتیں جدید آلات اور طریقوں کو اختیار کریں تاکہ سب بیماریوں سے محفوظ ہوں، درخت پرندے اور انسان صاف فضا میں سانس لے سکیں۔