سری لنکا کیخلاف میچ کیلئے پاکستانی ٹیم کا اعلان

کولمبو (اردو پوائنٹ تازہ ترین اخبار ۔ 13 ستمبر 2023ء ) سری لنکا کیخلاف میچ کیلئے پاکستانی ٹیم کا اعلان، سیمی فائنل کی حیثیت اختیار کر جانے والے میچ کیلئے قومی ٹیم میں 5 تبدیلیاں کر دی گئیں۔

تفصیلات کے مطابق بھارت کے خلاف عبرتناک شکست کا سامنا کرنے اور فرنٹ لائن پیسر زخمی ہونے کے بعد کل 14 ستمبر کو کولمبو میں سری لنکا کیخلاف شیڈول میچ کیلئے پاکستانی ٹیم میں بڑی تبیدلیاں کر دی گئی ہیں۔

پاکستان 2023ء کے ایشیا کپ میں اپنا آخری سپر 4 مقابلہ دفاعی چیمپئن سری لنکا کے خلاف کھیلے گا، یہ میچ سیمی فائنل کی حیثیت اختیار کر چکا، اس میچ کی فاتح ٹیم فائنل میں بھارت کے مدمقابل آئے گی۔ مین ان گرین کے بھارت کے خلاف 228 رنز کی شکست کا سامنا کرنے کے بعد ایک مختلف پلیئنگ الیون کے ساتھ جانے کا فیصلہ کیا گیا ہے، بنیادی طور پر اس وجہ سے کہ ان کے فرنٹ لائن پیسر نسیم شاہ اور حارث رؤف انجری کا شکار ہیں۔

(جاری ہے)

حارث روف اور نسیم شاہ کی جگہ زمان خان اور محمد وسیم جونیئر ٹیم کا حصہ بنائے گئے ہیں، زمان خان کل اپنے ایک روزہ کیرئیر کا ڈیبیو کریں گے۔ جبکہ پاکستان نے آغا سلمان کے لیے بائیں ہاتھ کے بلے باز سعود شکیل کو ٹیم میں شامل کر لیا ہے۔ سعود شکیل ون ڈے انٹرنیشنل فارمیٹ میں صرف چند بار پاکستان کی نمائندگی کر چکے ہیں جہاں انہوں نے 6 میچوں میں 71.02 کے اسٹرائیک ریٹ سے 76 رنز بنائے۔

اس کے باوجود، انہوں نے ٹیسٹ فارمیٹ میں پاکستان کے لیے مؤثر اننگز کھیلی ہے، جس میں سری لنکا کے خلاف ڈبل سنچری بھی شامل ہے۔ کولمبو میں اسپن کے لیے سازگار پچ کو دیکھتے ہوئے فہیم اشرف کی بجائے محمد نواز کو ٹیم میں شامل کیا گیا ہے، جبکہ فخر زمان کی جگہ محمد حارث ٹیم کا حصہ ہوں گے۔ یہ بات قابل غور ہے کہ اس بات کا قوی امکان ہے کہ حارث اور نسیم نہ صرف سری لنکا کے خلاف پاکستان کے آخری سپر 4 میچ میں شرکت نہیں کر پائیں گے بلکہ فائنل کے لیے ان کی دستیابی بھی غیر یقینی ہے۔

2،2 سپر 4 میچوں کے بعد پاکستان اور سری لنکا دونوں کے 2،2 پوائنٹس ہونے کے باعث ان کا مقابلہ اب ایک سیمی فائنل ہے ، جو بھی جیتے گا وہ فائنل میں بھارت سے کھیلے گا۔ اگر سری لنکا بمقابلہ پاکستان میچ بارش کی وجہ سے ضائع ہو جاتا ہے تو سری لنکا فائنل کے لیے کوالیفائی کر لے گا کیونکہ وہ پاکستان (-1.892) کے مقابلے میں بہتر نیٹ رن ریٹ (-0.200) رکھتا ہے۔