بھارتی بلائنڈ کرکٹ ٹیم نے ورلڈکپ میں شرکت کیلئے پاکستان آنے کی تصدیق کر دی

لاہور (اردو پوائنٹ تازہ ترین اخبار ۔ 17 مئی 2024ء ) ورلڈ کپ بلائنڈ کرکٹ ٹورنامنٹ میں شرکت کیلئے بھارتی بلائنڈ کرکٹ ٹیم نے پاکستان آنے کی تصدیق کردی ہے۔ نجی ٹی وی جیو نیوز کے مطابق پاکستان بلائنڈ کرکٹ کونسل کے چیئرمین سید سلطان شاہ کا کہنا ہے کہ ورلڈ کپ کا میزبان پاکستان ہے جو اس سال نومبر دسمبر میں کراچی میں ہونا ہے، بھارتی بلائنڈ ٹیم نے سب سے پہلے پاکستان آنے کی حامی بھری ہے۔

ان کا کہنا تھا کہ بھارتی بلائنڈ کرکٹ ٹیم کی پاکستان آنے سے 2025ء میں آئی سی سی چیمپئنز ٹرافی کیلئے بھارتی ٹیم کے پاکستان آنے کی راہ ہموار ہوگی۔ سید سلطان شاہ نے بتایا کہ اب تک ورلڈ کپ بلائنڈ ٹورنامنٹ میں بھارت سمیت 7 ممالک نے شرکت کی تصدیق کی ہے۔ ایونٹ میں بھارت، سری لنکا، بنگلادیش، نیوزی لینڈ ،جنوبی افریقہ، نیپال کی ٹیمیں شرکت کر رہی ہیں۔

(جاری ہے)

ویسٹ انڈیز بلائنڈ ٹیم کی بھی شرکت کا امکان ہے۔ سید سلطان شاہ کے مطابق ورلڈ بلائنڈ کرکٹ کپ کیلئے سندھ اور پنجاب حکومت کو خط لکھا ہے، وزیر اعلیٰ سندھ نے میزبانی کی حامی بھی ہے، ورلڈ بلائنڈ کپ کراچی میں کرائیں گے البتہ منسٹر اسپورٹس محمد بخش سے ملاقات میں مزید معاملات طے ہوں گے۔ انہوں نے کہا کہ سندھ حکومت نے میزبانی سے معذرت کی تو پھر یہ ایونٹ پنجاب میں کرائیں گے۔