شبمن گل نے محمد یوسف کا 19 سال پرانا ٹیسٹ ریکارڈ توڑ دیا

محمد یوسف نے 2006ء میں انگلینڈ کے دورے میں 4 میچوں میں 631 رنز بنا کر ایک ٹیسٹ سیریز میں سب سے زیادہ رنز بنانے والے ایشیائی کھلاڑی کا ریکارڈ بنایا تھا

ذیشان مہتاب پیر 28 جولائی 2025 11:31

شبمن گل نے محمد یوسف کا 19 سال پرانا ٹیسٹ ریکارڈ توڑ دیا

مانچسٹر (اردو پوائنٹ تازہ ترین اخبار ۔ 28 جولائی 2025ء ) بھارتی کرکٹ ٹیم کے کپتان شبمن گل نے انگلینڈ کے خلاف ٹیسٹ سیریز میں شان دار بیٹنگ کا مظاہرہ کیا اور سیزیر کے چوتھے ٹیسٹ کی دوسری اننگز میں سنچری بنا کر پاکستان کے سابق کپتان اور عظیم بیٹر محمد یوسف کا ریکارڈ توڑ دیا۔

مانچسٹر میں سیریز کے چوتھے ٹیسٹ کی دوسری اننگز میں بھارت نے انگلینڈ کے پہلی اننگز کے 669 رنز کے بعد خسارہ ختم کرتے ہوئے برتری حاصل کی، جس میں کپتان شبمن گل اور تجربہ کار بیٹر کے ایل راہل کی 181 رنز کی بہترین شراکت کا بنیادی کردار رہا۔

شبمن گل میچ کے آخری روز 238 گیندوں پر 103 رنز کی اننگز کھیل کر آؤٹ ہوئے، جس میں 12 چوکے شامل تھے۔

بھارتی کپتان نے اپنی ٹیم کے لیے بہترین اننگز کھیلی اور ٹیسٹ کرکٹ میں انگلینڈ کے خلاف ریکارڈ بھی اپنے نام کرلیا، انہوں نے پاکستان کرکٹ ٹیم کے سابق کپتان محمد یوسف کا ریکارڈ توڑ دیا۔

(جاری ہے)

محمد یوسف نے 2006ء میں انگلینڈ کے دورے میں 4 میچوں میں 631 رنز بنا کر ایک ٹیسٹ سیریز میں سب سے زیادہ رنز بنانے والے ایشیائی کھلاڑی کا ریکارڈ بنایا تھا۔

پاکستان کے سابق بیٹر نے 4 میچوں کی 7 اننگز میں 90.14 کی اوسط سے ڈبل سنچری سمیت 3 سنچریوں کی مدد سے 631 رنز بنائے تھے، جس میں 202 رنز سب سے بڑی اننگز تھی۔

شمبن گل نے 4 میچوں میں ایک ڈبل سنچری سمیت 3 سنچریوں کی مدد سے 700 سے زائد رنز بنائے اور 269رنز ان کی طویل اننگز تھی۔

انگلینڈ کے خلاف ان کی سرزمین میں ایک ٹیسٹ سیریز میں سب سے زیادہ رنز بنانے والے بیٹرز کی فہرست میں تیسرے نمبر پر بھارت کے راہول ڈریوڈ ہیں، جنہوں نے 2002ء میں 4 میچوں میں 602 رنز بنائے تھے اور 217 ان کا ایک اننگز میں بڑا اسکور تھا۔

ویرات کوہلی چوتھے نمبر پر ہیں، جنہوں نے 2018ء میں 5 میچوں میں 593 رنز بنائے تھے اور 149 ان کی طویل اننگز تھی۔

بھارت کے سابق بیٹر سنیل گواسکر نے 1979ء میں انگلینڈ میں 4 میچوں میں 542 رنز بنا کر ایشیائی کرکٹر میں سب سے زیادہ رنز بنانے کا ریکارڈ بنایا تھا، انہوں نے انگلینڈ کے خلاف ایک اننگز میں 221 رنز بنائے تھے۔

پاکستان کے سابق کپتان محمد یوسف کا 2006ء میں بنایا گیا ریکارڈ 19 سال بعد شبمن گل نے اپنے نام کرلیا۔

شبمن گل اب بھارت کی جانب سے کسی بھی ٹیسٹ سیریز میں سب سے زیادہ رنز بنانے کے ریکارڈ کے قریب پہنچے ہیں، جو سنیل گواسکر نے 1978ء میں ویسٹ انڈیز کے خلاف ہوم سیریز میں 732 رنز بنا کر بنایا تھا۔

بھارت کی جانب سے کپتان کی حیثیت میں ٹیسٹ سیریز میں سب سے زیادہ رنز بنانے کا ویرات کوہلی کا ریکارڈ بھی شمبن گل نے توڑ دیا ہے، جنہوں نے ایک سیریز میں 655 رنز بنائے تھے۔

وقت اشاعت : 28/07/2025 - 11:31:49