بابر اعظم ویسٹ انڈیز کیخلاف سیریز میں ویرات کوہلی کا ریکارڈ توڑنے کے قریب

پاکستان اور ویسٹ انڈیز کے درمیان تین میچوں کی سیریز کا پہلا ون ڈے آج کھیلا جائے گا

ذیشان مہتاب جمعہ 8 اگست 2025 12:42

بابر اعظم ویسٹ انڈیز کیخلاف سیریز میں ویرات کوہلی کا ریکارڈ توڑنے کے قریب

لاہور (اردو پوائنٹ تازہ ترین اخبار ۔ 8 اگست 2025ء ) پاکستان کے مایہ ناز بلے باز بابر اعظم ایک روزہ کرکٹ میں دو اہم سنگ میل عبور کرنے کے قریب ہیں۔

پاکستان اور ویسٹ انڈیز کے درمیان تین میچوں کی سیریز کا پہلا ون ڈے جمعہ کو برائن لارا کرکٹ اکیڈمی میں کھیلا جائے گا۔

30 سالہ بابر اعظم اس وقت لیجنڈری اوپنر سعید انور کا ایک روزہ میچز میں سب سے زیادہ سنچریوں کا ریکارڈ توڑنے کے قریب ہیں۔

سعید انور نے 247 میچز اور 244 اننگز میں 20 سنچریاں بنائی تھیں، جب کہ سابق کپتان بابراعظم اب تک صرف 131 میچز اور 128 اننگز میں 19 سنچریاں سکور کر چکے ہیں۔

انہیں سعید انور کا طویل عرصے سے قائم ریکارڈ توڑنے کے لیے صرف ایک مزید سنچری درکار ہے۔

پاکستانی بلے بازوں کی جانب سے سب سے زیادہ ون ڈے سنچریاں:

سعید انور – 20 سنچریاں، 247 میچز

بابر اعظم – 19\* سنچریاں، 131 میچز

محمد یوسف – 15 سنچریاں، 288 میچز

فخر زمان – 11 سنچریاں، 82 میچز

محمد حفیظ – 11 سنچریاں، 218 میچز

بابر اعظم نہ صرف سعید انور کا ریکارڈ توڑنے کے قریب ہیں بلکہ وہ ون ڈے کرکٹ کی تاریخ میں 20 سنچریاں بنانے والے دوسرے تیز ترین کھلاڑی بھی بن سکتے ہیں۔

(جاری ہے)

موجودہ ریکارڈ کے مطابق بابر اعظم نے 128 اننگز میں 19 سنچریاں بنائی ہیں اور اگر وہ اگلی چار اننگز میں ایک اور سنچری اسکور کر لیتے ہیں تو وہ بھارتی سٹار ویرات کوہلی کو پیچھے چھوڑ دیں گے، جنہوں نے 133 اننگز میں یہ سنگ میل عبور کیا تھا۔

اس فہرست میں پہلے نمبر پر جنوبی افریقہ کے ہاشم آملہ موجود ہیں جنہوں نے یہ کارنامہ صرف 108 اننگز میں سرانجام دیا تھا۔

20 ون ڈے سنچریاں بنانے والے تیز ترین بلے باز:

ہاشم آملہ – 108 اننگز

ویرات کوہلی – 133 اننگز

اے بی ڈی ویلیئرز – 175 اننگز

روہت شرما – 183 اننگز

وقت اشاعت : 08/08/2025 - 12:42:11