پاک بھارت ٹاکرے پر حالیہ لڑائی کا اثر ہوگا؟، صحافی کے سوال پر سلمان آغا اور سوریا نے کیا کہا؟

پاک بھارت میچ کیلئے خاص ہدایت کا انتظار نہیں تھا، کوئی جذبات دکھائے تو ہم بھی تیار ہیں: سلمان علی آغا

ذیشان مہتاب منگل 9 ستمبر 2025 17:00

پاک بھارت ٹاکرے پر حالیہ لڑائی کا اثر ہوگا؟، صحافی کے سوال پر سلمان آغا اور سوریا نے کیا کہا؟

دبئی (اردو پوائنٹ تازہ ترین اخبار ۔ 9 ستمبر 2025ء ) ایشیا کپ 2025 کا آج سے متحدہ عرب امارات میں آغاز ہورہا ہے جہاں افتتاحی میچ ہانگ کانگ اور افغانستان کے درمیان میچ سے ہورہا ہے۔

ایشیا کپ 2025 کی ٹرافی کی رونمائی 9 ستمبر منگل کے روز دبئی میں کی گئی، ٹرافی کی رونمائی کی تقریب میں تمام ٹیموں کے کپتانوں نے شرکت کی جبکہ ایشین کرکٹ کونسل (اے سی سی) کے صدر محسن نقوی بھی اس موقع پر موجود تھے۔

تمام ٹیموں کے کپتانوں نے پریس کانفرنس کے دوران صحافیوں کے سوالوں کے جواب بھی دیئے، ایشیا کپ پریس کانفرنس میں کپتانوں کی باڈی لینگویج اور مسکراہٹیں میڈیا کی توجہ کا مرکز بن گئیں۔

اس موقع پر پاکستان کے کپتان سلمان علی آغا اور بھارتی ٹیم کے کپتان سوریا کمار یادیو سے ایک صحافی نے سوال کیا کہ ” کیا موجودہ صورتحال میں پاک بھارت ہائی وولٹیج مقابلے میں کھلاڑی زیادہ جذباتی ہونگے، کیا آپ دونوں کو کوئی ہدایت ملی ہے "۔

(جاری ہے)

اس سوال کے جواب پر دونوں کپتانوں نے انکار کیا۔

سلمان علی آغا نے کہا کہ پاک بھارت میچ سے متعلق کسی کھلاڑی کو جارحانہ انداز اختیار کرنے کی کوئی خاص ہدایت نہیں کی گئی، بس اپنی گیم پر توجہ رکھیں گے تاہم ہمارے فاسٹ بولر جارحانہ انداز رکھتے ہیں اور بالرز کو جارحانہ انداز اپنانے سے نہیں روکوں گا۔

سوریا کمار یادو نے صحافی کے سوال کا جواب دیتے ہوئے کہا کہ پاک بھارت میچ میں جوش تو ہوتا ہے لیکن ہم جس بھی میچ میں فیلڈ پر آتے ہیں جارحانہ انداز ہی اپناتے ہیں۔

سلمان علی آغا نے مزید کہا کہ ہم نے سہ ملکی سیریز میں ایک ٹیم کی طرح اچھا پرفارم کیا ہے اور آگے بھی ایسا ہی کرنے کی کوشش کریں گے، پاکستانی کھلاڑیوں کو دبئی میں کھیلنے کا تجربہ ہے۔

پاکستانی کپتان نے مزید کہا کہ سہ ملکی سیریز سے ہمیں ایشیا کپ کی تیاری کا اچھا موقع ملا، ایشیا کپ میں ہر چیلنج کو قبول کرتے ہیں اور کافی پُراعتماد ہیں۔

واضح رہے کہ ایشیا کپ 2025ء کا ٹورنامنٹ ٹی ٹونٹی فارمیٹ کے تحت کھیلا جارہا ہے، اس سے قبل 2016ء اور 2022ء میں بھی یہ ٹورنامنٹ ٹی ٹونٹی فارمیٹ کے تحت کھیلا گیا تھا۔

وقت اشاعت : 09/09/2025 - 17:00:04