لیجنڈری کرکٹر جاوید میانداد 69سال کے ہوگئے، سالگرہ پر دنیا بھر سے کرکٹرز اور پرستاروں کی مبارکبادیں

لاہور (اُردو پوائنٹ اخبارتازہ ترین - اے پی پی۔ 12 جون2026ء) پاکستان کے عظیم ترین بلے بازوں میں شمار ہونے والے لیجنڈری کرکٹر جاوید میانداد کی 69ویں سالگرہ منائی گئی ۔اس موقع پر کیک بھی کاٹا گیا اور عزیزو اقارب اور دوستوں نے شرکت کی ۔ جاوید میانداد 12 جون 1957 کو پیدا ہوئے اور اپنی شاندار کارکردگی کے باعث پاکستان کرکٹ کی تاریخ میں ہمیشہ یاد رکھے جائیں گے۔

جاوید میانداد کو عموما "مین آف دی کرائسز" اور "پاکستان کی ریڑھ کی ہڈی" کے القابات سے یاد کیا جاتا ہے۔ انہوں نے پاکستان کی نمائندگی کرتے ہوئے 124 ٹیسٹ اور 233 ایک روزہ بین الاقوامی (ون ڈے) میچز کھیلے اور بے شمار یادگار اننگز کھیلیں۔ٹیسٹ کرکٹ میں ان کی نمایاں اننگز میں بھارت کے خلاف 280، نیوزی لینڈ کے خلاف 271، آسٹریلیا کے خلاف 211 اور سری لنکا کے خلاف 203 رنز کی شاندار اننگز شامل ہیں۔

(جاری ہے)

ان کی ایک منفرد خصوصیت یہ تھی کہ ان کا ٹیسٹ بیٹنگ اوسط اپنے آخری ٹیسٹ میچ تک کبھی بھی 50 سے کم نہیں ہوا۔ون ڈے کرکٹ میں بھی جاوید میانداد نے کئی ریکارڈ قائم کیے، جن میں مسلسل 9 نصف سنچریاں یا اس سے زیادہ اسکور کرنے کا کارنامہ خاص طور پر قابلِ ذکر ہے۔ یہ ریکارڈ آج بھی ان کے عظیم مقام کی گواہی دیتا ہے۔جاوید میانداد کا شارجہ میں بھارت کے خلاف آخری گیند پر چھکا کر پاکستان کو تاریخی فتح دلانا کرکٹ کی تاریخ کے یادگار ترین لمحات میں شمار ہوتا ہے، جسے آج بھی شائقین کرکٹ بڑے فخر اور محبت سے یاد کرتے ہیں۔

سابق کرکٹرز اور پرستاتوں کا کہنا تھا کہ ہم اس عظیم کرکٹر کی 69ویں سالگرہ کے موقع پر انہیں دل کی گہرائیوں سے خراجِ تحسین پیش کرتے ہیں اور دعا گو ہیں کہ اللہ تعالی انہیں صحت، خوشی اور درازی عمر عطا فرمائے۔