ایس ای سی پی نے سٹریٹجک اقدامات کے ذریعے میوچوئل فنڈز میں تبدیلی کا آغاز کر دیا

اسلام آباد (اُردو پوائنٹ اخبارتازہ ترین - اے پی پی۔ 01 اگست2025ء) ایس ای سی پی نے پاکستان کی میوچوئل فنڈز انڈسٹری کو مضبوط بنانے کے لئے کئی اہم اقدامات کئے ہیں،ان اقدامات میں میوچوئل فنڈز ایسوسی ایشن آف پاکستان (ایم یو ایف اے پی)کو ایک خود مختار نگران ادارے کے طور پر رجسٹر کرنا، ڈیجیٹل ایسٹ مینجمنٹ کمپنیز کے لئے ایک مکمل فریم ورک کی منظوری دینا، پاکستان میں ایکسچینج ٹریڈڈ فنڈز کی ترقی کے لئے ایک کمیٹی کا قیام شامل ہیں ۔

ان اقدامات کا مقصد مارکیٹ کی ترقی کو آسان بنانا، سرمایہ کاروں کا اعتماد بڑھانا، شفافیت میں بہتری لانا، اور مالی شمولیت کو فروغ دینا ہے۔ایس آر او کے طور پر تسلیم کئے جانے کے بعدایم یو ایف اے پی اب میوچوئل فنڈز کے شعبے میں صنعت کی ترقی، سرمایہ کاروں کی آگاہی، اور کاروباری طرزِ عمل کی خود نگرانی میں اہم کردار ادا کرے گا۔

(جاری ہے)

ایم یو ایف اے پی کا وسیع کردہ دائرہ کار اب صنعت میں اخلاقی اصولوں اور پیشہ وارانہ مہارت کو فروغ دینے، تحقیق کر نے اور اس کا تبادلہ کرنے، عالمی معیار کے مطابق انڈسٹری کے اصول و ضوابط بنانے میں مدد دینے، انسپکشن کے ذریعہ قوانین کی نگرانی کرنے، تنازعات کے حل میں ثالثی کرنے اور مالی شمولیت، سرمایہ کاروں تک رسائی اور آگاہی کو فروغ دینے کے ساتھ ساتھ سرمایہ کاروں کے تحفظ کے لئے اقدامات نافذ کرنے جیسے کاموں پر مشتمل ہے۔

اس کے علاوہ ایم یو ایف اے پی ٹرسٹ ڈیڈز اور آفرنگ ڈاکومنٹس جیسے بنیادی دستاویزات کا جائزہ لے گا، انڈسٹری کے لئے معیاری دستاویزات اور رپورٹنگ کا نظام اپنائے گا اور بالآخر ایک ایسا میوچوئل فنڈ نظام قائم کرے گا جو زیادہ مؤثر، شفاف، اور سرمایہ کاروں کے لئے سازگار ہو۔ڈیجیٹل اے ایم سی فریم ورک کی منظوری سے ٹیکنالوجی میں جدت آئے گی، مارکیٹ تک رسائی بڑھے گی، اور صنعت کی ترقی کو فروغ ملے گا۔

یہ فریم ورک داخلے کی رکاوٹیں کم کرے گا، عام سرمایہ کاروں کی شمولیت میں اضافہ کرے گا، اور میوچوئل فنڈز میں سرمایہ کاری کے لیے مکمل طور پر ڈیجیٹل رسائی فراہم کرے گا۔مزید یہ کہ ای ٹی ایف کی ترقی کے لیے قائم کردہ کمیٹی کو یہ ذمہ داری دی گئی ہے کہ وہ موجودہ فریم ورک اور بین الاقوامی بہترین طریقہ کار کا جائزہ لے، اور ایسی اصلاحات کی سفارش کرے جو سرمایہ کاروں کی شمولیت بڑھانے اور اس شعبے کی ترقی میں حائل رکاوٹوں کو دور کرنے میں مددگار ہوں۔

حال ہی میں ایس ای سی پی نے میوچوئل فنڈز انڈسٹری فوکس گروپ سیشن کا انعقاد کیا، جس میں اہم اسٹیک ہولڈرز اور انڈسٹری کے ماہرین نے شرکت کی۔اس سیشن میں مختلف حکمت عملیوں پر رائے لی گئی، جن میں میوچوئل فنڈز کے ذریعے انفراسٹرکچر فنانس کو بڑھانا، لیکویڈیٹی مینجمنٹ اور گورننس کو بہتر بنانا، اور تقسیم کے طریقہ کار کو جدید بنانا شامل تھا۔اس کے علاوہ، خواتین کی مالی شمولیت میں حائل ساختی اور ثقافتی رکاوٹوں پر بھی بات کی گئی، اور طویل مدتی اور باقاعدہ بچت کے لئے "" (SIPs) Systematic Investment Plans کے فروغ کا جائزہ بھی لیا گیا۔اس سیشن کے نتائج کے خلاصہ اور اہم سفارشات پر مبنی ایک وائٹ پیپر تیار کیا گیا ہے، جس کی منظوری کمیشن نے اس کی تقسیم کے لئے دے دی ہے۔