ان کے لئے احتجاج کون کرے؟

کاش ہمارے معاشرے کے یہ بچے بھی کسی طرح سنور جائیں۔ انہیں بھی اچھا ماحول میسر ہو۔ سچ تو یہ ہے کہ اللہ تعالی آسمان سے کوئی سیڑھی نہیں لٹکائے گا

کنول نوید جمعرات 4 اپریل 2019

یہ کچھ کچھ مذاق سا لگتا ہے مجھے

حق اور حقوق کی بات کرتے ہیں سبھی

ماحول کو آلودگی سے پاک کرنے والوں

کاغذ چننے والے بچوں کو دیکھا ہے کبھی

ہمارے ہاں روز بروز کچرے کے ڈھیروں اور آلودگی میں اضافہ ہو رہا ہے۔ ہمارے ارد گرد لوگ اس پر غم و غصہ کااظہار کرتے ہوئے نظر آتے ہیں مگر یہی غلاظت کے ڈھیر ہمارے معاشرے کے ایک طبقہ کے لیے ان کے روز گار کا ذریعہ ہیں۔

یہی وجہ ہے کہ شاید حکومت کچرے کے ان ڈھیروں کو ختم کرنے سے گریزاں ہیں۔

کیا ہو گا اگر صبح صبح تھیلا اْٹھائے چار سال کا بچہ منہ دھوئے بغیر اپنی جگی سے نکلے اور کچرے کے ڈھیر پہنچ کر اسے معلوم ہو کہ آج تو کچرے کے ڈھیر کی جگہ پر فقط کھلا میدان ہی ہے۔ وہ بیچارا تو بوکھلا جائے گا۔ اسے لگے گا شاہد وہ ابھی نیند سے جاگا ہی نہیں۔

(جاری ہے)

سوچیے جب اسے یقین ہو جائے گا کہ وہ جاگ گیا ہے تو کیا ؟ وہ تو دھاڑیں مار ما ر کر روئے گا۔

اللہ کو پکارے گا۔اس کے کھانے کا سامان کرنے والا وہ غلاظت کا ڈھیر اے رب کیوں چھین لیا۔ اقبال کا وہ شاہین زمین پر ناک رگڑتا نظر آئے گا۔ کیا اس کے لیے بھی اقبال کا شاہین ہونے کا دعویٰ درست ہو گا۔ یا پھر یہ بھی ایک مذاق ہے۔

مجھے حیرت ہوتی ہے کہ کوئی کیوں ان بچوں کے لیے آواز بلند نہیں کرتا۔ اقبال کا وہ شعرہمارے حکمرانوں کو کیوں کوئی یاد نہیں کرواتا ہے۔

افراد کے ہاتھوں میں ہے اقوام کی تقدیر

ہر فرد ہے ملت کے مقدر کا ستارا

ہم جن ستاروں کو آج پتھر بننے کے لیے کچرے کے ڈھیرفراہم کر رہے ہیں کل وہ ہماری قوم کے ماتھے کو لہو لہان کریں گئے۔ اپنے بچوں کو تو جانور بھی سنبھال لیتے ہیں۔ انسان ہونے کے ناطے ہمیں کیا ان بچوں کے لیے کچھ کرنا چاہیے یا نہیں ؟ یہ ایک ایسا سوال ہے جس کے جواب کے لیے کسی کے پاس وقت نہیں۔

ہمارے ہاں میڈیا بھی گندگی اور غلاظت کے ڈھیر وں کو تو دیکھاتا ہے لیکن ان غلاظت سے لتھڑے اجسام کو ہر کوئی فراموش کر دیتا ہے۔ جو انسان ہو کر انسانیت کی دہلیز سے کہیں دور رہتے ہیں۔ کیا یہ مسلمان نہیں۔ کیا یہ قوم کے معمار نہیں بن سکتے۔ان کے لیے احتجاج کون کرے گا۔کل جب میں نے ایک سگرٹ نوشی کرتے ہوئے ، شانوں پر کچرے سے جمع کردہ چیزوں سے بھر ے تھیلے کو اْٹھائے دس سالہ بچے کو اپنی گاڑی کے قریب سے گزرتے ہوئے دیکھا تو اپنے آٹھ سالہ بیٹے کی طرف نگاہ گھوم گئی۔

یہ سوچ کر کہ کہیں وہ اس بچے کو سگرٹ پیتے تو نہیں دیکھ رہا۔ ایسا نہیں تھا۔

میں نے پھر اطمینان سے دوبارہ اس دس سالہ بچہ کی طرف دیکھا۔ جو سگرٹ کو انگلی میں دبائے بڑی حسرت سے میرے بیٹے کی طرف دیکھ رہا تھا۔ جو سکول یونیفارم میں تھا۔ میں بھی بہت سے دوسرے لوگوں کی طرح یہ سوچتے ہوئے گزر گئی کہ کاش ہمارے معاشرے کے یہ بچے بھی کسی طرح سنور جائیں۔ انہیں بھی اچھا ماحول میسر ہو۔ سچ تو یہ ہے کہ اللہ تعالی آسمان سے کوئی سیڑھی نہیں لٹکائے گا۔ ہمیں اور آپ ہی کو ان بچوں کے لیے آواز بلند کرنا ہو گی۔ اگر ایسا نہ کیا تو یہ بچے کل کے چور ، ڈاکو اور لٹیرے ہی بنیں گئے۔ان کے ایسا ہونے کے ذمہ دار ہم ہی ہوں گئے۔

ادارہ اردوپوائنٹ کا مضمون نگار کی رائے سے متفق ہونا ضروری نہیں ہے۔