سابق امریکی سفیر وزیراعظم عمران خان کی لیڈر شپ کی تعریف کیے بغیر نہ رہ سکے

عمران نے بھارت کیساتھ حالیہ کشیدگی کم کرنے کیلئے مہارت کا ثبوت دیا،پاکستانی وزیراعظم نے افغان امن عمل سے متعلق بھی مثبت اقدامات کیے۔ سابق امریکی سفیر رچرڈ اولسن کا بیان

مقدس فاروق اعوان بدھ 27 مارچ 2019 15:05

سابق امریکی سفیر وزیراعظم عمران خان کی لیڈر شپ کی تعریف کیے بغیر نہ ..

واشنگٹن(اُردو پوائنٹ تازہ ترین اخبار۔27 مارچ2019ء) سابق امریکی سفیر رچرڈ اولسن نے کہا ہے کہ وزیراعظم عمران خان نے بھارت کے ساتھ حالیہ کشیدگی کم کرنے کیلئے مہارت کا ثبوت دیا، پاکستانی وزیراعظم نے افغان امن عمل سے متعلق بھی مثبت اقدامات کیے،پاکستان افغان امن مذاکرات کیلئے طالبان پر اپنا اثر و رسوخ استعمال کر سکتا ہے۔سابق امریکی سفیر رچرڈ اولسن نے واشنگٹن میں میڈیا سے گفتگو کرتے ہوئے کہا پاکستان اور امریکا کے تعلقات میں بہتری آ رہی ہے، پاکستان نے افغان امن عمل میں مدد کی، یہ تعلقات کیلئے اہم ہے، عمران خان نے افغان امن عمل سے متعلق چند مثبت اقدامات کیے۔

انہوں نے کہا عمران خان نے بھارت کیساتھ حالیہ کشیدگی کو کم کرنے میں مہارت کا مظاہرہ کیا، طالبان کے ساتھ مذاکرات ابتدائی مراحل میں ہیں، پاکستان افغان امن مذاکرات کیلئے طالبان میں اپنے اثرور سوخ کو استعمال کرسکتا ہے۔

(جاری ہے)

ادھر پاکستان میں امریکا کے سابق سفیر ڈیوڈ ہیل کا پاکستانی سفارتخانے میں تقریب سے خطاب کرتے ہوئے کہنا تھا امریکا پاکستان کے ساتھ قریبی تعلقات چاہتا ہے، پاکستان کو پر امن، مستحکم اور خوشحال ملک کے طور پر دیکھنا چاہتے ہیں، پاکستان قابل غور وسائل سے فائدہ اٹھائے تو عالمی معیشت میں اہم پلیئر بن سکتا ہے۔

انہوں نے کہا پاکستان اور امریکا کے درمیان 2018 میں دو طرفہ تجارت 6.6 ارب ڈالر کی ریکارڈ سطح پر پہنچی، دو طرفہ تجارت کو اس سے بھی آگے بڑھایا جاسکتا ہے، امریکی حکومت کا سب سے بڑا ایکس چینج پروگرام پاکستان کیساتھ ہے۔واضح رہے گذشہ سال بھی پاکستان میں تعیناتامریکہ کے سابق سفیر رچرڈ اولسن نے کہا تھا کہ پاکستان کے بغیر امریکی فوج افغانستان میں ساحل پر پڑی وہیل کی مانند ہو گی۔سابق امریکی سفیر نے امریکی اخبار ’’نیو یارک ٹائمز ‘‘میں لکھا تھا کہ پاکستان سے سکیورٹی تعاون روکنا امریکا کی جانب سے جذباتی اقدام ہے۔ انہوں نے کہا کہ امریکہ کا اسلام آباد پر زور ختم ہو رہا ہے۔