خیبر پختونخوا میں پی ٹی آئی کے نامزد کردہ سینیٹ ٹکٹ ہولڈر پاناما اشتہاری نکلے

اسلام آباد (اُردو پوائنٹ اخبارتازہ ترین۔ 18 فروری2021ء) سلیم صافی نے سوشل میڈیا سائٹ ٹویٹر پر لکھا ہے کہ”انصاف ہو تو ایسا،پختونخوا سے عمران خان کے سینیٹ کے تین ٹکٹ ہولڈرز لیاقت ترکئی،فیصل سلیم اور ذیشان خانزادہ ایک کاروبار جو کہ سگریٹ کا ہے سے وابستہ ہیں۔تینوں کھرب پتی ہیں۔لیاقت ترکئی کا نام پاناما اکاؤنٹس والوں میں بھی شامل ہے۔نواز شریف کے پاناما اکاؤنٹس حرام اور پی ٹی آئی کے حلال یہ ہے ریاست مدینہ۔

“بات تو سچ ہے مگر بات ہے رسوائی کی،پاناما کیس کو لے کر جس قدر اس وقت کے وزیراعظم نواز شریف کی بھد اڑائی گئی تھی آج اگر پی ٹی آئی کے یوٹرن خاص طور پر وزیراعظم عمران خان کے وعدوں سے پیچھے ہٹنے اور نعروں کی مخالفت میں فیصلے دینے پر غور کیا جائے تو سابق حکمران ان کے سامنے ہیچ نظر آتے ہیں۔

(جاری ہے)

اس بار سینیٹ کی ٹکٹوں میں پی ٹی آئی کے سرکردہ لوگوں نے جس طرح سے میرٹ کو سائیڈ پر کر کے اپنے سہولت کاروں یا پھر یوں کہیے کہ فنانسرز کو آگے کیا ہے اس کی مثال نہیں ملتی۔

اس سے قبل بلوچستان میں عبدالقادر نامی شخص کو عمران خان نے سینیٹ کا ٹکٹ دیا تھامگر اس پر اس قدر تنقید کی گئی کہ بالآخر ٹکٹ واپس لینا پڑ گیا۔جبکہ فیصل واوڈا اس وقت منتخب ایم این اے ہیں انہیں بھی سینیٹ کا ٹکٹ دے دیا گیا ہے جس کی ممکنہ وجہ بھی سب کے سامنے آ چکی ہے کہ وفاقی وزیر اسد عمر ٹی وی شو میں اس بات کا اعتراف کر چکے ہیں کہ الیکشن کمیشن میں ان کی دوہری شہریت کا کیس چل رہا ہے اس میں نااہل ہونے کے خطرے کی بنا پر انہیں سینیٹر بنانے کا فیصلہ کیا گیا ہے۔

اسی طرح اسلام آباد میں حفیظ شیخ صاحب کو سینیٹر کا ٹکٹ دینا بھی سمجھ سے بالاتر ہے کہ یہ لوگ عہدوں کے لیے بریف کیس اٹھا کر پاکستان آتے ہیں اور پھر چلتے بنتے ہیں جبکہ سالہا سال سے سیاسی ریگزاروں میں ریاضت کرنے والے پیچھے رہ جاتے ہیں کہ جب ثمر اٹھانے کا وقت آتا ہے تو ان کی قربانیوں کو پس پشت ڈال کر مفاد پرستوں کو آگے کر دیا جاتا ہے۔تاہم دیکھنا یہ ہے کہ پی ٹی آئی سینیٹ میں اکثریت حاصل کرنے کے بعد پاکستان کے آئین میں بہتری لانے کے لیے کیا اقدامات کرتی ہے۔