کالعدم تحریک لبیک کی ہر طرح کی میڈیا کوریج پر پابندی عائد

اسلام آباد (اُردو پوائنٹ تازہ ترین اخبار۔ 15 اپریل 2021ء) کالعدم تحریک لبیک کی ہر طرح کی میڈیا کوریج پر پابندی عائد۔ تفصیلات کے مطابق پیمرا کی جانب سے تمام ٹی وی چینلز اور ایف ایم ریڈیو کیلئے خصوصی ہدایت نامہ جاری کیا گیا ہے۔ پمرا نے ہدایت کی ہے کہ میڈیا ضابطہ اخلاق کے مطابق کالعدم تظیموں کی میڈیا کوریج کی کسی صورت اجازت نہیں، اور چونکہ تحریک لبیک کو حکومت کی جانب سے کالعم قرار دے دیا گیا ہے، لہذا ٹی وی چینلز اور ایف ایم ریڈیو ٹی ایل پی کی کوریج نہیں کر سکیں گے۔

 واضح رہے کہ حکومت پاکستان کی جانب سے مذہبی جماعت تحریک لبیک پاکستان کو باقاعدہ کالعدم قرار دے دیا گیا ہے۔ جمعرات کے روز وفاقی وزارت داخلہ نے وفاقی کابینہ سے منظوری کے بعد انسداد دہشت گردی ایکٹ 1997 کے تحت تحریک لبیک کو کالعدم قرار دینے کا نوٹیفیکیشن جاری کیا۔

(جاری ہے)

نوٹیفیکیشن میں وزارت داخلہ نے تحریک لبیک کو کالعم قرار دینے کی وجوہات بھی بیان کی ہیں۔

وزارت داخلہ کے مطابق تحریک لبیک دہشت گردی میں ملوث ہے، اس تنظیم نے خونی تشدد کی راہ اختیار کی۔ ٹی ایل پی کی جانب سے سیکورٹی اہلکاروں کو قتل کیا گیا جبکہ عوام کو ڈرا دھمکا کر انارکی بھی پھیلائی جا رہی ہے۔ اس سے قبل تحریک لبیک پاکستان پر پابندی عائد کرنے کیلئے وفاقی کابینہ سے سرکولیشن سمری کے ذریعے منظوری لی گئی تھی۔ کابینہ ڈویژن نے انسداد دہشت گردی ایکٹ کے تحت پابندی کی منظوری دی۔

وزارت داخلہ نے گزشتہ روز مذہبی جماعت تحریک لبیک پاکستان پر پابندی عائد کرنے کیلئے سمری تیار کی تھی، سمری کا مسودہ وزیراعظم عمران خان کو بھیجا گیا تھا جو انہوں نے منظور کر لیا تھا۔ پنجاب حکومت نے تحریک لبیک پابندی کی سفارش کی تھی، جس کے بعد گزشتہ روز وفاقی وزیرداخلہ شیخ رشید نے تحریک لبیک پاکستان پر پابندی کا اعلان کیا تھا۔

بدھ کے روز وفاقی وزیر داخلہ شیخ رشید نے پریس کانفرنس کے دوران بتایا تھا کہ تحریک لبیک پاکستان پر پابندی عائد کرنے کا فیصلہ انسداد دہشتگردی ایکٹ کے تحت کیا گیا۔ اُن کا کہنا تھا کہ سیاسی حالات کی وجہ سے نہیں تحریک لبیک کے کردار کی وجہ سے پابندی لگائی جارہی ہے، یہ فیصلہ اینٹی ٹیرارزم ایکٹ 1997ء 11 (بی) کے تحت کیا گیا ہے۔ انہوں نے کہا کہ مظاہرین نے ایمبولینسز کو روکا ، راستے بند کیے۔ دو پولیس اہلکار شہید ہوئے 340 زخمی ہوئے۔اسلام آباد میں پولیس سے رائفل چھین کر فائرنگ کی گئی۔ مظاہرین نے پولیس اہلکاروں کو اغوا کر کے بھی مطالبات منوانے کی کوشش کی، مظاہرین ہر صورت فیض آباد اوراسلام آباد آنا چاہتے تھے ۔