مریم صفدر جتنے مرضی جادوئی گلاس اٹھائیں یا الہٰ دین کا چراغ رگڑیں، کرپشن کا حساب دینا ہوگا

لاہور (اُردو پوائنٹ اخبارتازہ ترین۔ 13 اکتوبر2021ء) فرخ حبیب کا کہنا ہے کہ مریم صفدر جتنے مرضی جادوئی گلاس اٹھائیں یا الہٰ دین کا چراغ رگڑیں، کرپشن کا حساب دینا ہوگا۔ تفصیلات کے مطابق مسلم لیگ ن اور تحریک انصاف کے رہنماوں کے درمیان لفظی جنگ چھڑ گئی ہے جس کے بعد دونوں جانب سے ذاتی نوعیت کے حملے کیے جا رہے ہیں۔ مریم نواز کی جانب سے وزیراعظم پر ذاتی نوعیت کے الزامات عائد کیے جانے کے بعد وزیر مملکت فرخ حبیب نے ردعمل دیتے ہوئے کہا کہ مریم صفدر جتنے مرضی جادوئی گلاس اٹھائیں یا الہٰ دین کا چراغ رگڑیں، کرپشن کا حساب دینا ہوگا، کرپشن کے مال سے بنائے لندن فلیٹس کی سزا جنتر منتر والے قطری خط سے ختم نہیں ہوگی، نہ اس کی سزا طوطا فال والے جعلی کیلبری فونٹ سے ختم ہوگی۔

اپنے بیان میں وزیر مملکت فرخ حبیب نے کہا کہ نواز شریف سزا یافتہ ہیں، ہم کیوں نواز شریف بنیں گے، نواز شریف مریم نواز کو مبارک ہوں۔

(جاری ہے)

وزیر اعظم عمران خان کو ایک کروڑ 70 لاکھ پاکستانیوں نے ووٹ دیا۔ عمران خان کی اپنی پہچان ہے، وہ قوم کے ہیرو ہیں۔ فرخ حبیب کے علاوہ دیگر حکومتی رہنماوں کی جانب سے بھی نواز شریف کی صاحبزادی پر بھرپور جوابی وار کیے گئے ہیں۔

وزیرمملکت برائے اطلاعات فرخ حبیب ،وزیر مملکت زرتاج گل ،پارلیمانی سیکرٹری برائے قانون ملیکہ بخاری اور معاون خصوصی شہباز گل نے بدھ کے روز پریس کانفرنس کے دوران مریم نواز کو شدید تنقید کا نشانہ بنایا۔ وزیر اعظم عمران خان کے معاون خصوصی شہباز گِل نے کہا کہ جادو ٹونے کی باتیں ہمیں نہ سنائیں، جادو ٹونے، جنات کی باتیں آپ کے منہ سے اچھی نہیں لگتیں۔

انہوں نے کہاکہ آپ کے پیسے کون سے جنات یا چڑیلوں نے بیرون ملک منتقل کیے۔ نواز شریف بنا نہیں جاسکتا وہ پیدا ہوتا ہے۔انہوں نے کہا کہ نوازشریف روز پیدا نہیں ہوتے، ہر 200 سال بعد پیدا ہوتے ہیں، پہلے نواز شریف میر جعفر کی شکل میں پیدا ہوئے تھے۔شہباز گل نے کہا کہ مریم صفدرنے آج بھی عدالت میں رسیدیں نہیں دیں ، مریم صفدرنے قطری خط کی طرح یہ نہیں بتایا کہ رسیدیں کہاں ہیں انہوں نے کہا کہ شریف فیملی نے تاجروں سے بھتہ وصول کیا اور باہر بھجوایا ، شریف خاندان سے پاکستان کا کوئی ادارہ محفوظ نہیں رہا ،اجمل قصاب اور کلبھوشن کے معاملے پر شریف فیملی نے ملک دشمنی دکھائی۔

شہباز گل نے کہا کہ مریم صفدر نے ٹھیک کہا نواز شریف کی طرح کوئی نہیں بن سکتا ،اتنا دھوکے باز واقعی کوئی نہیں بن سکتا۔ میڈیا سے گفتگو کرتے ہوئے زرتاج گل نے کہاکہ ملک میں سرٹیفائیڈ چورنی جس کا پورٹ فولیو لوگوں کو بلیک میل کرنے کا ذخیرہ موجود ہے ،سینیٹ ، آزاد کشمیر ہر جگہ پی ایم ایل ن کو اس خاتون کی وجہ سے ناکامی کا سامنا کرنا پڑا،ملک کے قابل احترام اداروں کی تضحیک کرتی ہے یہی ان کا پورٹ فولیو ہے۔ ان کی زبان نہ ان کے کردار سے کوئی محفوظ ہے، آپ کی نہ سیاسی تربیت ہے نہ ہی کچھ اور ہے۔ گالی گلوچ بریگیڈ کی آپ سربراہ ہیں، آپ ایک سرٹیفائیڈ چور ہے، آپ نے صرف پاکستان سے منی لانڈرنگ کی ہے،آپ ریجیکٹڈ ہیں ہر طرح سے۔