Live Updates

مہنگائی کے سونامی نے عوام کا بھرکس نکال کر رکھ دیا ،ترقی کرتی معیشت بدانتظامی ،کرپشن کے قبرستان میں دفن کر دی گئی ‘حمزہ شہباز

کون سی ایسی چیز ہے جس پر تبدیلی کا آسیب نہ پھر گیا ہو،صاف شفاف الیکشن ہی اس تباہی کے سونامی کو غرق کر سکتے ہیں ‘ قائد حزب اختلاف

ہفتہ 16 اکتوبر 2021 14:14

مہنگائی کے سونامی نے عوام کا بھرکس نکال کر رکھ دیا ،ترقی کرتی معیشت ..
لاہور(اُردو پوائنٹ اخبارتازہ ترین - این این آئی۔ 16 اکتوبر2021ء) پنجاب اسمبلی میں قائد حزب اختلاف حمزہ شہباز نے کہا ہے کہ ملک پر اس وقت ایک آسیب مسلط ہے ،بھوک ،مہنگائی ،بیروزگاری اور غربت کا جن ناچ رہا ہے ،فوزیراعظم کے دستخط سے عوام پر 10 روپے سے زائد کا پیٹرول بم گرا دیا گیا ہے ،ڈیزل کی قیمت میں بھی 12 روپے سے زائد کا اضافہ ہوا ہے۔اپنے بیان میں حمزہ شہباز نے کہا کہ عمران خان نے 4 ماہ میں 8 بار پیٹرولیم مصنوعات مہنگی کیں ،جون سے اب تک پیٹرولیم مصنوعات 30 روپے سے زائد مہنگی ہو چکی ہیں،صرف پیٹرول کی قیمت 4 ماہ میں29 روپے فی لیٹر بڑھائی گئیں جبکہ ڈیزل فی لیٹر 23روپے مہنگا کیا گیا۔

انہوںنے کہا کہ کھانے پینے کی اشیا ء پہلے ہی عام آدمی کی پہنچ سے باہر ہو چکی ہیں ،مہنگائی ساڑھے 12 فیصد سے تجاوز کر چکی ہے، تبدیلی کے بھوت نے یوٹیلیٹی اسٹورز کو بھی نہیں چھوڑا،مہنگائی کے سونامی نے عوام کا بھرکس نکال کر رکھ دیا ہے ،ترقی کرتی معیشت بدانتظامی نااہلی اور کرپشن کے قبرستان میں دفن کر دی گئی ہے۔

(جاری ہے)

انہوںنے کہا کہ عمران خان کی توجہ اپوزیشن کے خلاف جھوٹے کیسز بنانے پر ہے ،اس جنون کا رتی برابر رخ بھی عوامی فلاح کی طرف ہوتا تو آج ملک کا یہ حال نہیں ہوتا،ڈالر 172 روپے سے تجاوز کر چکا ہے ،ملکی قرضہ ریکارڈ سطح پر ہے اور ترقیاتی منصوبوں کے نام پر ایک اینٹ تک نہیں لگائی گئی ،یہ سارا پیسہ کہاں جا رہا ہی ۔

انہوں نے کہا کہ کہاں ہیں وہ لوگ جو 2 فیصد مہنگائی اور 6 فیصد کے قریب ترقی کرتی معیشت میں کرپشن اور چور چور کے نعرے لگاتے تھے،عمران خان خود کہتے تھے کہ جب بجلی گیس اور پیٹرول کی قیمت بڑھے تو سمجھو وزیراعظم چور ہے ،آج لوگوں کو پتا چل گیا ہے کہ اصل چور اور لٹیرے کون ہیں،چور اور لٹیرے وہ ہیں جنہوں نے عوام کے منہ سے نوالے چھینے ،نوزائیدہ بچوں کا دودھ تک مہنگا کر دیا،چور اور لٹیرے وہ ہیں جنہوں نے پیٹرول 137 روپے لیٹر پر پہنچا دیا ،بجلی کی قیمت میں 40 فیصد اضافہ کیا، دوائیں 500 فیصد مہنگی کیں۔

انہوںنے کہا کہ ملک میں کسی ایک چیز کا نام لیں جو مہنگی نہیں ہوئی، ارزاں ہے تو وہ عوام کی سفید پوشی اور ان کی جمع پونجی ہے جسے اس حکومت نے چوک پر رکھ دیا ہے ،ایل پی جی ، روٹی، چینی اور دوائیوں سمیت کون سی ایسی چیز ہے جس پر تبدیلی کا یہ آسیب نہ پھر گیا ہو،صاف شفاف الیکشن ہی اس تباہی کے سونامی کو غرق کر سکتے ہیں عوام کا جو حال ہے ان کی ضمانتیں ضبط ہو جائیں گی۔
Live مہنگائی کا طوفان سے متعلق تازہ ترین معلومات