Live Updates

وزیراعظم نے نوازشریف کی واپسی سے متعلق سوال کا جواب دے دیا

کہا جارہا ہے نواز شریف آج آ رہا ہے، کل آ رہا ہے ، نواز شریف جب سعودی عرب گیا تب بھی یہی کہا جاتا تھا‘ اسمبلی میں شہباز شریف کی تقریر نہیں جاب ایپلی کیشن ہوتی ہے۔ صحافی کے سوال پر وزیراعظم عمران خان کا جواب

ساجد علی جمعرات 30 دسمبر 2021 14:49

وزیراعظم نے نوازشریف کی واپسی سے متعلق سوال کا جواب دے دیا

اسلام آباد ( اُردو پوائنٹ تازہ ترین اخبار ۔ 30 دسمبر 2021ء ) وزیراعظم عمران خان نے سابق وزیراعظم اور مسلم لیگ ن کے قائد نوازشریف کی واپسی سے متعلق سوال کا جواب دے دیا۔ تفصیلات کے مطابق وزیر اعظم عمران خان پارلیمانی پارٹی کے اجلاس میں شرکت کیلئے پارلیمنٹ ہاؤس پہنچے تو اس موقع پر انہوں نے صحافیوں سے مختصر گفتگو کی ، جس میں انہوں نے کہا کہ ہر تین ماہ بعد کہا جاتا ہے کہ حکومت مشکل میں ہے ، حکومت کوئی مشکل میں نہیں ۔

سابق وزیراعظم نوازشریف کی واپسی کے بارے میں سوال کے جواب میں عمران خان نے کہا کہ کہا جاتا ہے نواز شریف آج آ رہا ہے ، کل آ رہا ہے ، نواز شریف جب سعودی عرب گیا تب بھی یہی کہا جاتا تھا۔ ایک اور سوال کے جواب میں وزیراعظم نے کہا کہ اسمبلی میں شہباز شریف کی تقریر نہیں بلکہ جاب ایپلی کیشن ہوتی ہے ۔

(جاری ہے)

دوسری جانب پاکستان مسلم لیگ ن کے رہنما اور ممبر قومی اسمبلی رانا ثناء اللہ نے کہا ہے کہ نواز شریف ابھی آئے نہیں اور حکومت کی ’ٹلی‘ بج گئی ہے ، ‎جن کا ٹکٹ عوام کاٹ چکے ہیں وہ اپنے ٹکٹ کی فکر کریں ، نواز شریف آئیں گے تو عمران نیازی کو چھپنے کی جگہ بھی نہیں ملے گی ، نواز شریف کے واپس آنے کا خوف انہیں سونے نہیں دے رہا ، قوم اپنے قائد کا استقبال کرنے کیلئے تیار ہے ، نواز شریف وطن واپس آئیں گے تو عمران نیازی ، شیدا ٹلی اور کرائے کے ترجمانوں کو چھپنے کی جگہ بھی نہیں ملے گی۔

تاہم مسلم لیگ ن کے رہنماء سابق وزیر اعظم شاہد خاقان عباسی نے نواز شریف کی وطن واپسی سے متعلق بیانات کو پارٹی پالیسی کے منافی قرار دے دیا ، نجی نیوز چینل کے پروگرام میں گفتگو کرتے ہوئے شاہد خاقان عباسی نے کہا کہ نوازشریف کی واپسی کے بارے میں ایازصادق کا بیان پارٹی پالیسی نہیں ہے ، ن لیگ بحیثیت ایک پارٹی یہ سمجھتی ہے فی الحال نوازشریف کو لندن میں ہی علاج کروانا چاہیے ، ان کی واپسی کے لیے کوئی ٹائم لائن نہیں ہے اور فی الحال کچھ نہیں کہا جا سکتا کہ چند ماہ میں نوازشریف واپس آ رہے ہیں۔