نواز شریف کی خواہش پر کوئی تعیناتی نہیں ہو گی،شیخ رشید

ساری قوم عمران خان کی کال کی منتظر ہے وہ اہم دن ہو گا لوگ پہاڑوں سے اتریں گے،سربراہ عوامی مسلم لیگ

عبدالجبار پیر 10 اکتوبر 2022 11:38

نواز شریف کی خواہش پر کوئی تعیناتی نہیں ہو گی،شیخ رشید

اسلام آباد (اُردو پوائنٹ،اخبارتازہ ترین ۔ 10اکتوبر2022ء) سربراہ عوامی مسلم لیگ شیخ رشید کا کہنا ہے کہ نواز شریف کی خواہش پر کوئی تعیناتی نہیں ہو گی،شہبازشریف ایسے وزیراعظم ہیں جن کے پلگ میں بھی کچرا پھنسا ہوا ہے۔ شیخ رشید نے میڈیا سے گفتگو میں کہا کہ ساری قوم عمران خان کی کال کی منتظر ہے وہ اہم دن ہوگا اور لوگ پہاڑوں سے اتریں گے۔ملک میں موجودہ صورتحال سب کے سامنے ہے،امید ہے ذمہ داران میرٹ پر فیصلے کریں گے۔

ملک میں مہنگائی،غربت اور بھوک سے لوگوں کا برا حال ہے۔سب کو کہتا ہوں ملبہ پولیس یا سیکیورٹی فورسز پر نہیں کسی اور پر گرے گا۔ سابق وزیر داخلہ کا کہنا تھا کہ 27 کلومیٹر پر حکومت کرنے والو اگر کوئی جانی نقصان ہو گیا تو بھاگ نہیں پاؤ گے۔اس سے بڑا کیا عدم اعتماد ہے کہ کراچی میں لوگ چوراہوں پر مارے جا رہے ہیں۔

(جاری ہے)

ہمارے شہر میں دہی کی دکانوں پر لوگوں کو لوٹا جا رہا ہے۔

پاکستان تاریخ کے تشویشناک وقت سے گزر رہا ہے۔ سربراہ عوامی مسلم لیگ نے کہا کہ یہ کہتے ہیں ڈرون سے بم گرائیں گے خدا کا خوف کرو،پولیس بھی ہماری اور ایف سی بھی پاکستان کی ہے۔پولیس بھی ہماری اور ایف سی بھی پاکستان کی ہے۔اسلام آباد میں کوئی جانی نقصان ہوا تو کون ذمہ دار ہوگا؟ دوسری جانب اسلام آباد ہائیکورٹ نے شہر میں دفعہ 144 کے قانون کے خلاف تحریک انصاف کی درخواست قابل سماعت ہونے پر فیصلہ محفوظ کرلیا۔

اسلام آباد ہائیکورٹ میں پی ٹی آئی،سینیٹر سیف اللہ نیازی اور اسد عمر کی درخواستوں پر سماعت ہوئی جس میں عدالت نے زیر سماعت کیسز کے ساتھ درخواست کو منسلک کرنے کی ہدایت کی۔اسد عمر نے عدالت میں بتایا کہ ڈسٹرکٹ مجسٹریٹ نے 2 ماہ کے لیے دفعہ 144 کا نفاذ کیا جو خلاف قانون ہے۔ عدالت نے استفسار کیا کہ آپ کس طرح متاثرہ ہیں اور آپ کو کسی بات سے روکا گیا ہے؟ پی ٹی آئی کے وکیل بابر اعوان نے کہا کہ اس صورت میں ریلی نہیں نکالی جاسکتی۔ جسٹس اطہر من اللہ نے ریمارکس دئیے کہ احتجاج یا ریلی نکالنے کا طریقہ ہے جس کے لیے اجازت لینی ہوتی ہے،دھرنا کیس کا ایک فیصلہ بھی موجود ہے،آپ نے وہ پڑھا ہے؟