پاکستان مستقبل کا سنگار پور بننے جارہا ہے، کئی ممالک سے معاشی معاہدے کرلئے گئے،جان اچکزئی

کوئٹہ (اُردو پوائنٹ اخبارتازہ ترین - آن لائن۔ 02 دسمبر2023ء) نگراں وزیر اطلاعات بلوچستان جان اچکزئی نے کہا ہے کہ پاکستان مستقبل کا سنگار پور بننے جارہا ہے جس کے لئے کئی ممالک سے معاشی معاہدے کرلئے گئے ہیں پاکستان اپنے ملک میں بدامنی پھیلانے والے افغان دہشت گردوں کو حوالے کرنے کا مطالبہ کررہا ہے مگر افغان حکمران پاکستان کے ساتھ ڈبل گیم کھیل رہے ہیں ریاست پاکستان اپنے مطالبات کیلئے ہر حد تک جائے گی ان خیالات کا اظہار انہوں نے ہفتہ کو کوئٹہ پریس کلب میں پریس کانفرنس کرتے ہوئے کیا جان اچکزئی نے کہا کہ پاکستان بار بار افغان طالبان سے دہشت گردوں کی حوالگی کا مطالبہ کررہا ہے افغانستان پاکستان کیساتھ ڈبل گیم کھیل رہا ہے ریاست پاکستان اپنے مطالبات کیلئے ہر حد تک جائے گی بنوں میں ہونے والی دہشت گردی کے واقعہ میں ملوث افغانستان کے شہری کے ملوث ہونے کے شواہد ملے ہیںاور جس کا ثبوت ملنے والے آئی ڈی کارڈ سے واضح ہوچکا ہے افغان تذکرہ اور افغان دستاویزات رکھنے والے افغان مہاجرین سیکورٹی رسک بن چکے اور انہیں بھی ملک بدر کیا جائے گا اور افغانستان سے آنے والے افغانیوں کو پاسپورٹ کے بغیر کسی طور پر بھی پاکستان میں داخلے کی اجازت نہیں ہوگی۔

(جاری ہے)

کیونکہ لر و بر کا خواب دیکھنے والے قصہ پارینہ بن چکے ہیں انہوں نے کہا کہ پی ٹی ایم نے چمن دھرنے کو یر غمال بنالیا ہے جہاں پر پاکستان مخالف نعرے لگانے والوں کو کچل دیا جائے گا۔ انہوں نے کہا کہ سی ٹی ڈی بلوچستان میں دہشت گردوں کا صفایا کرنے میں مصروف عمل ہے دہشت گردوں اور انکے سہولت کاروں کو نہیں چھوڑا جائیگا کیونکہ جو دہشت گرد یا ان کے سہولت کار غریب لوگوں پر دہشت گردانہ کارروائیاں کروارہے ہیں وہ سہولت کار بھی دہشت گردوں جتنے قصور وار ہے اور کوئی ریاست دہشت گردی کی اجازت نہیں دے سکتی جو لوگ سہولت کاری یا دہشت گردوں کو شہید قرار دیتے ہیں وہ بھی جرم میں برابر کے شریک ہیں انہوں نے کہا کہ تربت میں غریب مزدوروں کے قتل کی کبھی کسی نے مذمت نہیں کی بلوچستان کو غیر قانونی تارکین وطن سے پاک اور بلوچستان سے حوالہ ہنڈی کے کاروبار کو ختم کیاجائے گا بلوچستان کو مستقبل کا سنگار بنائیں گے جس کا واضح ثبوت یو اے ای سے 25 ارب ڈالر کی سرمایہ کاری کی یاد داشت پر ہونے والے دستخط کے بعد یہ سرمایہ کاری بلوچستان میں منرلز ، انرجی اور دیگر شعبوں میں بھی ہوگی اسی طرح بہت سے ممالک سے تجارتی معاہدے کرلے گئے ہیں ان تمام معاہدوں کا سہرا پاک فوج کے سربراہ حافظ سید عاصم منیر کو جاتا ہے جن کی کاوشوں کی بدولت یہ سرمایہ کاری کے وسیع مواقع میسر آرہے ہیں۔

ایک سوال کے جواب میں انہوں نے کہا کہ افغان حکومت کی ذمہ داری ہے کہ اپنے ملک کی سرزمین دہشت گردی کے لئے استعمال نہ ہونے دے لیکن اس حوالے سے وہ کوئی کردار ادا نہیں کررہے جس کی وجہ سے آج بھی افغانستان کی سرزمین پاکستان کے خلاف دہشت گردی جیسے گھنائونے مقاصد کیلئے استعمال ہورہی ہے۔