ایک شخص شیخ مجیب الرحمن بن کر للکار رہا ہے،جیل میں بیٹھے شخص کو جب موقع ملتا ہے ریاستی اداوں پر حملہ آور ہوتا ہے‘ جاوید لطیف

لاہور(اُردو پوائنٹ اخبارتازہ ترین - این این آئی۔ 05 دسمبر2023ء) پاکستان مسلم لیگ (ن) کے سینئر رہنما میاں جاوید لطیف نے کہا ہے کہ ایک شخص شیخ مجیب الرحمن بن کر للکار رہا ہے،جیل میں بیٹھے شخص کو جب جب موقع ملتا ہے وہ ریاستی اداوں پر حملہ آور ہوتا ہے،جنرل (ر)باجوہ ،جنرل (ر)فیض ،جسٹس (ر)آصف سعید کھوسہ اور جسٹس (ر)ثاقب نثار سمیت سب کو بلائیں تاکہ کرتوتوں کا کچا چٹھہ قوم کے سامنے آ سکے ،سہولت کاروں کو سمجھ آ جانی چاہیے تھی یہ ان کے ایجنڈے کونہیں عالمی ایجنڈے کو پورا کرے گا،معیشت کو کمزور کرنے کے ایجنڈے پر عمل کیا گیا تاکہ نو مئی کرنا آسان ہوجائے اور معیشت کو کمزور کیا گیا۔

ماڈل ٹائون میں میڈیا سے گفتگو کرتے ہوئے جاوید لطیف نے کہا کہ ایک شخص دھمکی دے کر شیخ مجیب الرحمن بن رہا ہے، اسے جب موقع ملتا ہے خارجہ ،داخلہ اورپالیسی ساز اداروں پر حملہ آور ہوتا ہے ،اسے پاکستان کے اندر سے سہولت کاری نہ دی گئی تو عالمی ایجنڈا پورا کرنے کیلئے جیل میں سہولت کاری مل رہی ہے۔

(جاری ہے)

انہوںنے کہا کہ پکی عمر کے شخص کو جیل میں دیسی مرغی چاہیے ،جیل میں آٹھ ڈاکٹر ز ہیں،جم بنا کر دیا گیا وہ کہتا ہے اندر زیادہ آرام سے ہوں کیونکہ عالمی طاقتیں اداروں پر دبائو ڈالے ہوئے ہیں، 9 مئی کو بھولا نہیں ہے دوبارہ نومئی کرنے کی منصوبہ بندی کررہا ہے،کہتا ہے لکھ کر دے سکتا ہوں پھر پی ٹی آئی جیتے گی، اندیشہ ہے عالمی طاقتیں ایک ایجنڈے پر تمہیں سپورٹ کررہی ہے۔

انہوںنے کہا کہ کہتا ہے نکاح ہوا تو اس وقت اپنی بیوی کو دیکھا اس کو جھوٹ بولتے کچھ شرم آنی چاہیے ،کون لوگ اسے وزیر اعظم بناتے ہیں پھر کہتے فالورز بہت ہیں۔ جھوٹ ڈھٹائی سے بولتا ہے تاکہ سچ کا گمان ہو ،تمہارے نوکر کیا کہہ رہے ہیں،بیوی نے خود اعتراف کیا۔ انہوںنے کہا کہ کہتے ہیں نوازشریف کو لاڈلہ بناکر پیش کیا جارہا ہے ۔ آج لوگ نوازشریف پر اعتماد کررہے ہیں ،معیشت کا چار سالوں میں بیڑا غرق کیا گیا ،اب عوام سمجھتے ہیں نوازشریف ہی ملک کو گرداب سے نکال سکتا ہے، پیپلزپارٹی کو کہوں گا آپ اندرون سندھ کی فکر کریں ،پنجاب میں آئیں،آپ نے جو کچھ سندھ کے عوام کے ساتھ کیا اس کا جواب 8فروری کو دینا پڑے گا، ماضی میں ہمارا مقابلہ جمہوریت مخالف قوتوں سے رہا ہے ،ان قوتوں کو بھی احساس ہے کہ پاکستان جس گرداب میں پھنس چکا ہے اگر شفاف انتخابات ہوئے تو (ن) لیگ آکر قوم کو متحد کرکے اسے مشکل سے باہر نکال سکتی ہے۔

ا نہوںنے کہا کہ سوال ہے لاڈلہ تھا تو پھر لاڈلے کو پہلے کیوں نکالا تھا جب پاکستان کو ترقی کی راہ پر گامزن کررہے تھے ،جادو کے ذریعے رائے عامہ ہموار کرکے کچھ لوگوں کی خواہشات پوری کی جاتی ہیں۔ انہوںنے کہا کہ امریکی سفیر کو عدالت نہیں لایا جا سکتا ،جہاں سوال کررہا ہے وہاں جنرل (ر)باجوہ ،جنرل (ر)فیض ،جسٹس (ر)آصف سعید کھوسہ اور جسٹس (ر)ثاقب نثار سمیت سب کو بلائیں تاکہ کرتوتوں کا کچا چٹھہ قوم کے سامنے آ جائے ،قوتوں کے دبائو کی وجہ سے فیصلے تاخیر کا شکار ہو رہے ،الیکشن سے پہلے فیصلے آ جائیں تاکہ قوم کو سوچنے میں آسانی ہو وہ کھلے ذہن سے پولنگ اسٹیشن جا سکیںاور اپنا حق رائے دہی استعمال کر سکیں،جب تک معیشت مضبوط نہیں ہو گی عالمی قوتوں کی سہولت کاری چور دروازوں سے میسر رہے گی ، اس وقت سازشوں سے بھی نہیں بچا جا سکتا۔