میرواعظ مولوی محمد فاروق اور خواجہ عبدالغنی لون تحریک آزادی کے ہیرو ہیں ، وزیر آزاد کشمیر امتیاز نسیم

اسلام آباد (اُردو پوائنٹ اخبارتازہ ترین - اے پی پی۔ 21 مئی2024ء) آزاد کشمیر کی وزیر امتیاز نسیم نے کہا ہے کہ حکومت تحریک آزادی کو اولیت دیتی ہے ، تحریک کشمیر حق خودارادیت تک جاری رہے گی ، میرواعظ مولوی محمد فاروق اور خواجہ عبدالغنی لون تحریک آزادی کے ہیرو ہیں ، مودی کو بھارت کے غیر قانونی زیر تسلط جموں و کشمیر میں شکست فاش ہو گی ۔ ان خیالات کا اظہار انہوں نے جموں و کشمیر لبریشن کمیشن اور کل جماعتی حریت کانفر س کے زیر اہتمام سیمینار سے خطاب کرتے ہوئے کیا۔

سیمینار کا انعقاد میرواعظ مولوی محمد فاروق اور خواجہ عبدالغنی لون کے یوم شہادت کی مناسبت سے کیا گیا۔ مقررین نے میرواعظ مولوی محمد فاروق شہید اور خواجہ عبدالغنی لون کو خراج عقیدت پیش کیا ۔ اس موقع پر محمود احمد ساغر ، عبدالرشید ترابی اور غلام نبی فائی نے بھی خطاب کیا۔

(جاری ہے)

وزیر آزاد کشمیر امتیاز نسیم نے کہا کہ آج ہم سب شہداءکشمیر کو خراج عقیدت پیش کر رہے ہیں ،میرواعظ مولوی محمد فاروق اور خواجہ عبدالغنی لون تحریک آزادی کے ہیرو ہیں ۔

انہوں نے کہا کہ الحاق پاکستان ہماری منزل ہے ،حکومت تحریک آزادی کو اولیت دیتی ہے ۔ انہوں نے کہا کہ وزیراعظم چوہدری انوارالحق نے تحریک آزادی کشمیر کو ہمیشہ اہمیت دی ،وزیراعظم نے لبریشن کمیشن کو وزارت میں تبدیل کیا ۔ امتیاز نسیم نے کہا کہ کشمیری تارکین وطن انتہائی اہم کام کر رہے ہیں، آپ جو تجاویز دیں گے ان پر عمل ہو گا ،بیس کیمپ کی حکومت اپنا بھرپور کردار ادا کرے گی ،ہمیں افواہوں پر کان نہیں دھرنے چاہئیں،کشمیر پر کوئی سودے بازی نہیں ہو سکتی نہ ہم ہونے دیں گے ۔

انہوں نے کہا کہ کشمیری بہن اور بیٹیوں کا درد محسوس کرتی ہوں ،بھارت کے غیر قانونی زیر تسلط جموں و کشمیر آزاد ہو گا ۔کرنل راجہ نسیم نے تحریک آزادی کو ہمیشہ اجاگر کیا ،کرنل راجہ نسیم نوابزادہ نصر اللہ خان چیئرمین کشمیر کمیٹی کو ہاڑی گہل لے کر گئے ، کرنل راجہ نسیم کو اس موقع پر خراج عقیدت پیش کرتی ہوں ،نئی نسل کو تحریک آزادی سے روشناس کرانا ہو گا ،ایک ٹیم بن کر تحریک آزادی کیلئے کام کریں گے ۔

سیمینار سے خطاب کرتے ہوئے حریت رہنما محمود احمد ساغر نے کہا کہ تحریک آزادی کے شہداء کو خراج عقیدت پیش کرتے ہیں ،جماعت اسلامی کشمیر کا مضبوط ادارہ ہے ،شہداکشمیر کی قربانیاں رنگ لائیں گی ،بھارت کو جموں و کشمیر سے نکالیں گے ،شہدا کشمیر ہمارا فخر ہیں ،ہمیں اپنے شہدا کا خیال رکھنا ہو گا ۔حریت رہنما غلام نبی فائی نے کہا کہ بھارت نے کشمیر پر بہت غلط فہمیاں پیدا کی ہیں ،ہماری صفوں میں بھی کچھ غلط فہمیاں ہیں ،انہیں پاکستانی ایجنٹ کہا گیا اور ہتھکڑیاں لگائی گئیں ،ہم وزیراعظم شہباز شریف سے ملے ہیں ،یٰسین ملک اور شبیر شاہ کی قربانیاں عظیم ہیں ۔

انہوں نے کہا کہ ان کا تعلق جماعت اسلامی سے ہے ،گریٹر کاز کے لئے مل کر کوششیں کرنا ہوں گی، انہیں یٰسین ملک کی ترجمانی کرنی ہے ،یسین ٰملک ڈیتھ سیل میں قید ہے ،میر واعظ مولوی فاروق سے ملاقاتیں رہیں ۔عبدالرشید ترابی نے کہا کہ شہداء کو خراج عقیدت پیش کرتے ہیں ،ایران کے صدر اور دیگر شہداء کو بھی خراج عقیدت پیش کرتے ہیں ۔ راجہ نجابت حسین نے کہا کہ حریت قائدین کی کمٹمنٹ کو خراج تحسین پیش کرتے ہیں ،میرواعظ خاندان کی دینی اور سیاسی خدمات غیر معمولی ہیں ۔

سیمینار سے خطاب کرتے ہوئے دیگر مقررین نے کہا کہ بھارت اپنے غیر قانونی زیر تسلط جموں و کشمیر میں ظلم و ستم کر رہا ہے ، تحریک آزادی کامیابی سے ہمکنار ہو گی ،الحاق پاکستان ہمارا نصب العین ہے ،ہمارا اصل ہدف بھارت کو ان کے غیر قانونی زیر تسلط جموں و کشمیر سے نکالنا ہے ،کشمیریوں کا اس نکتہ پر کوئی اختلاف نہیں ہے ۔ مقررین نے کہا کہ کشمیر پر ہمیشہ کھل کر بات کی ہے ،کشمیر کے لیڈروں کو بصیرت کے ساتھ آگے بڑھنا ہو گا ،ہمیں کشمیر پر بین الاقوامی حمایت کی ضرورت ہے ،لیڈر شپ قوم کو مایوسی سے بچائے ۔