Live Updates

عمران خان نے حکومت سے مذاکرات کیلئے گرین سگنل دیدیا ہے،بیرسٹر گوہر

ہم نے بانی پی ٹی آئی کو بتایا دوریاں بڑھ رہی ہیں اس کیلئے ڈائیلاگ ضروری ہے، بانی پی ٹی آئی نے ہماری بات سے اتفاق کیا ہے،مذاکرات کے راستے کھولے جائیں،اڈیالہ جیل کے باہر میڈیا سے گفتگو

فیصل علوی منگل 11 جون 2024 16:03

عمران خان نے حکومت سے مذاکرات کیلئے گرین سگنل دیدیا ہے،بیرسٹر گوہر

راولپنڈی(اردو پوائنٹ اخبارتازہ ترین۔11جون 2024 ) پاکستان تحریک انصاف کے رہنماءبیرسٹر گوہر نے کہا ہے کہ بانی پی ٹی آئی نے حکومت سے مذاکرات کیلئے گرین سگنل دے دیا ہے، ہم نے بانی پی ٹی آئی کو بتایا دوریاں بڑھ رہی ہیں اس کیلئے ڈائیلاگ ضروری ہے۔ بانی پی ٹی آئی نے ہماری بات سے اتفاق کیا ہے۔اڈیالہ جیل کے باہر میڈیا سے گفتگو کرتے ہوئے رہنماءپی ٹی آئی کا مزید کہنا تھا کہ عمران خان مذاکرات اور جوہوا ہے اسے معاف کرنے کیلئے تیار ہیں۔

مذاکرات کے راستے کھولے جائیں، آئین اور قانون کے دائرے میں رہتے ہوئے ہم بات چیت کیلئے تیار ہیں۔ مذاکرات الائنس کی سطح پر بھی ہوں گے۔ پی ٹی آئی خود بھی آغاز کر سکتی ہے، مذاکرات کے سوا کوئی آپشن نہیں ہم نے مذاکرات سے کبھی انکار نہیں کیا۔

(جاری ہے)

بیرسٹر گوہر علی خان نے کہا کہ سپریم کورٹ نے جو آپشن دیا ہے وہ بھی زیرِ غور ہے۔ مذاکرات کرنا پی ٹی آئی کا اپنا فیصلہ ہے۔

محمود خان اچکزئی اور دیگر جماعتوں کے ساتھ اتحاد ہے انہیں اعتماد میں لیں گے۔ برف پگھل رہی ہے۔ ہم چاہتے ہیں حالات بہتر ہو جائیں، ہماری مذاکرات کی پیشکش کو کسی ڈیل سے تعبیر نہ کیا جائے۔ بانی پی ٹی آئی نے سپریم کورٹ کو مذاکرات کیلئے کوئی خط نہیں لکھا، سپریم کورٹ کے مذاکرات کے آپشن کا جواب بھی پی ٹی آئی دے گی۔ بانی پی ٹی آئی عمران خان کئی بار کہہ چکے میرے ساتھ جو ہوا معاف کرنے کو تیار ہوں۔

ہم سربراہ پشتونخوا ملی عوامی پارٹی محمود خان اچکزئی سے بات کرکے مذاکرات کا آغاز کریں گے۔انہوں نے کہا کہ آج وکلاءکی بانی پی ٹی آئی سے ملاقات ہوئی جس میں عمران خان نے کہا کہ ان کی بیٹوں سے بات نہیں کروائی جا رہی ہے۔دریں اثنائ190 ملین پاونڈ ریفرنس میں بانی پی ٹی آئی عمران خان اور ان کی اہلیہ بشریٰ بی بی کے وکلاءنے احتساب عدالت کے نئے جج کی تعیناتی پر اعتراضات واپس لے لئے۔

اسلام آباد کی احتساب عدالت کے نئے جج محمد علی وڑائچ نے عمران خان اور بشریٰ بی بی کے خلاف 190 ملین پاو¿نڈز کیس کی سماعت اڈیالہ جیل راولپنڈی میں کی۔قومی احتساب بیورو (نیب) کے پراسیکیوٹر جنرل سردار مظفر عباسی، امجد پرویز اور عمران خان آئی کے وکلا ظہیر عباس چوہدری، عثمان گل و دیگر عدالت میں پیش ہوئے۔دوران سماعت سابق وزیراعظم عمران خان اور بشریٰ بی بی بھی کمرہ عدالت میں موجود تھے۔اسلام آباد ہائیکورٹ کی جانب سے نئے جج کی تعیناتی کا نوٹیفکیشن جاری کیا گیا، نئے جج کی تعیناتی کا نوٹیفکیشن موصول ہونے کے بعد وکلا صفائی نے اعتراضات واپس لے لئے تاہم 190 ملین پاونڈ ریفرنس میں آج بھی کسی گواہ کا بیان ریکارڈ نہ ہوسکا۔