القادر ٹرسٹ ریفرنس کی سماعت :سابق وزیر دفاع پرویز خٹک کا بیان قلمبند ‘نوازشریف کے فلیٹ بھی پاکستان آنے چاہیں. عمران خان

بشریٰ بی بی اور عمران خان جیل سے کمرہ عدالت میں پیش ‘بنی گالا اسلام آباد کے پٹواری عباس گوارایہ پر جرح مکمل‘ عدالت نے ریفرنس کی سماعت 13جولائی تک ملتوی کردی

میاں محمد ندیم بدھ 10 جولائی 2024 13:30

القادر ٹرسٹ ریفرنس کی سماعت :سابق وزیر دفاع پرویز خٹک کا بیان قلمبند ..

روالپنڈی (اردوپوائنٹ اخبارتازہ ترین-انٹرنیشنل پریس ایجنسی۔10 جولائی ۔2024 ) روالپنڈی اڈیالہ جیل میں سابق وزیر اعظم عمران خان اور ان کی اہلیہ بشریٰ بی بی کے خلاف القادر ٹرسٹ ریفرنس کی سماعت کے دوران سابق وزیر دفاع پرویز خٹک کا بیان قلمبند کرلیا گیا ہے. ریفرنس کی سماعت احتساب عدالت کے جج محمد علی وڑائچ نے کی، سابق وزیر اعظم کے پرنسپل سیکرٹری اعظم خان اور سابق وزیر زبیدہ جلال آج عدالت میں پیش نہ ہوئیں، بشریٰ بی بی اور عمران خان کو جیل سے کمرہ عدالت میں پیش کیا گیا، ملزمان کی جانب سے تحریک انصاف کی قانونی ٹیم کے عثمان ریاض گل اور چوہدری ظہیر عباس عدالت کے روبرو پیش ہوئے جبکہ نیب کی جانب سے امجد پرویز، سردار مظفر عباسی لیگل ٹیم کے ہمراہ پیش ہوئے.

(جاری ہے)

سابق وزیر دفاع پرویز خٹک کے بیان کے دوران عمران خان روسٹرم پر آگئے پرویز خٹک کے بیان کے دوران عمران خان مسکراتے رہے پرویز خٹک کے بیان کے دوران عمران خان نے مسکراتے ہوئے کہا کہ اب تو نواز شریف کے فلیٹ بھی پاکستان واپس آنے چاہئیں. بعد ازاں پرویز خٹک اپنا بیان 15 منٹ میں ریکارڈ کرو کر واپس چلے گئے آج کی سماعت میں بنی گالا اسلام آباد کے پٹواری عباس گوارایہ پر جرح بھی مکمل کرلی گئی جس کے بعد عدالت نے ریفرنس کی سماعت 13جولائی تک ملتوی کر دی واضح رہے کہ القادرٹرسٹ ریفرنس میں مجموعی طور پر 31 گواہان کے بیانات ریکارڈ ہوگئے ہیں جبکہ 30 پر جرح مکمل کرلی گئی ہے.