محکمہ موسمیات کی آئندہ ہفتے کے دوران ملک کے مختلف علاقوں میں آندھی، جھکڑ چلنے اور گرج چمک کے ساتھ مزید بارشوں کی پیشنگوئی

اسلام آباد (اُردو پوائنٹ اخبارتازہ ترین - اے پی پی۔ 20 جولائی2024ء) محکمہ موسمیات نے آئندہ ہفتے کے دوران آندھی، جھکڑ چلنے اور گرج چمک کے ساتھ مزید بارشوں کی پیشنگوئی کی ہے، محکمہ موسمیات نے تمام متعلقہ حکام کو ہدایت کی ہے کہ وہ چوکس رہیں اور کسی بھی ناخواشگوار صورتحال سے نمٹنے کیلئے ضروری اقدامات کرے۔ ہفتہ کو ترجمان محکمہ موسمیات کے مطابق 22 جولائی سے بحیرہ عرب اور خلیج بنگال سے مون سون ہوائیں ملک کے بالائی علاقوں میں داخل ہوں گی جس کے باعث کشمیر میں 21 جولائی کی شام سے 27 جولائی کے دوران وادی نیلم، مظفر آباد، راولا کوٹ، پونچھ، ہٹیاں، باغ، حویلی، سدھنوتی، کوٹلی بھمبر، میرپور میں تیز ہوائوں اور گرج چمکے ساتھ وقفے وقفے سے بارش کا امکان ہے۔

اس دوران بعض مقامات پر موسلادھار بارش متوقع ہے۔

(جاری ہے)

22 جولائی سے 25 جولائی کے دوران پنجاب، اسلام آباد، راولپنڈی، مری گلیات، اٹک، چکوال، تلہ گنگ، جہلم ، منڈی بہائوالدین، گجرات، گوجرانوالہ، حافظ آباد، وزیرآباد، لاہور، شیخوپورہ، سیالکوٹ، نارووال، ساہیوال، جھنگ، ٹوبہ ٹیک سنگھ، ننکانہ صاحب، چنیوٹ، فیصل آباد، اوکاڑہ، پاکپتن، قصور، خوشاب،سرگودھا، بھکر اور میانوالی میں آندھی، جھکڑ چلنے اور گرج چمک کے ساتھ بارش کاامکان ہے۔

اس دوران بعض مقامات پر موسلادھاربارش بھی متوقع ہے۔23 اور 24 جولائی سے بہاولپور، بہاولنگر، ڈیرہ غازی خان،ملتان، خانیوال، لودھران، مظفرگڑھ، کوٹ ادو، راجن پور، رحیم یار خان اور لیہ میں آندھی، جھکڑ چلنے اور گرج چمک کے ساتھ بارش کی توقع ہے۔خیبر پختونخوا میں 22 جولائی کی شام سے 24 جولائی سے دیر، چترال، سوات، کوہستان، مالاکنڈ، باجوڑ، شانگلہ، بٹگرام، بونیر، کوہاٹ، باجوڑ، مہمند، خیبر، مانسہرہ، ایبٹ آباد، ہری پور، پشاور، صوابی، نوشہرہ، مردان، چارسدہ، ہنگو، کرم اور کزئی، وزیرستان، بنوں، لکی مروت اورڈیرہ اسماعیل خان میں آندھی، جھکڑ چلنے اور گرج چمک کے ساتھ بارش کا امکان ہے۔

اس دوران بعض مقامات پر موسلادھار بارش بھی متوقع ہے۔ بلوچستان میں 23 سے 24 جولائی ک کے دوران صوبہ کے بیشتر اضلاع میں موسم گرم اورمرطوب رہنے کی توقع ہے تاہم بلوچستان کے شمالی، مشرقی علاقوں خضدار، قلات، لسبیلہ، آواران، زیارت، ژوب، بارکھان، موسیٰ خیل، شیرانی،کوہلو، ہرنائی، نصیرآباد اور جعفر آباد میں آندھی اور گرج چمک کے ساتھ بارش کا امکان ہے۔

سندھ میں 23 اور 24 جولائی کے دوران صوبہ کے بیشتر اضلاع میں موسم گرم اور انتہائی مرطوب رہنے کی توقع ہے جبکہ مٹھی، سانگھڑ، عمرکوٹ، تھرپارکر، میرپور خاص، سکھر ، لاڑکانہ اور دادو میں آندھی، جھکڑ چلنے اور گرج چم کے ساتھ بارش کا امکان ہے۔گلگت بلتستان میں 22 سے 27 جولائی کے دوران دیامیر ، استور، اسکردو، گلگت، گھانچے اور شگر میں مطلع جزوی طور پر ابر آلود رہنے کے علاوہ تیز ہوائوں کے ساتھ بارش کی بھی توقع ہے۔

محکمہ موسمیات نے اس دوران ممکنہ اثرات اور احتیاطی تدابیر اختیار کرنے کی ہدایت کی ہے۔ 23 اور 24 جولائی کے دوران موسلادھار بارش سے سیمری، گلیات، مانسہرہ، کوہستان، مالاکنڈ، دیر، سوات، شانگلہ، بونیر، کرم، اورکزئی، خیبر، مہمند، نوشہرہ، صوابی اور کشمیر کے مقامی نالوں، ندی نالوں میں تغیانی کا خدشہ ہے۔ 23 اور 24 جولائی کے دوران موسلادھار بارش کے باعث پنجاب اور خیبر پختونخوا کے نشیبی علاقے زیر آب آنے کا اندیشہ ہے۔

شدید بارشوں کے باعث پہاڑی علاقوں، مری، گلیات، کشمیر اور گلگت بلتستان میں لینڈ سلائیڈنگ کے باعث ٹریفک کی آمدورفت متاثر ہونے کا خطرہ ہے۔ شدید بارشوں، آندھی، جھکڑ چلنے اورگرج چمک کے باعث روزمرہ کے معمولات متاثر ہونے، کمزور انفراسٹرکچر، کچے گھر، دیواریں، بجلی کے کھمبے، بل بورڈز، گاڑیوں، سولر پینل وغیرہ کو نقصان پہنچنے کا اندیشہ ہے۔

کسان حضرات موسمیاتی پیشگوئی کو مدنظر رکھتے ہوئے اپنے معمولات ترتیب دیں۔ مسافر اور سیاح حضرات سفرکے دوران زیادہ محتاط رہیں اور موسمی حالات کے مطابق اپنے سفر کا انتظام کریں اور بارشوں کے دوران کسی بھی ناخوشگوار صورتحال سے بچنے کیلئے موسم کے بارے میں آگاہی حاصل کریں۔ تمام متعلقہ اداروں کو الرٹ رہنے اور کسی ناخواشگوار واقعہ سے بچنے کیلئے تمام ضروری اقدامات کرنے کی ہدایت کی جاتی ہے۔