کروڑوں کے انعامات کی برسات، ارشد ندیم ایف بی آر کے ریڈار پر آگئے

سونے کا تمغہ جیتنے کی خوشی میں حکومت اور دیگر سیاسی و سماجی شخصیات کی جانب سے ارشد ندیم کے لیے اعلان کی گئی رقوم پر ٹیکس عائد ہوگا : ایف بی آر ذرائع

ذیشان مہتاب ہفتہ 10 اگست 2024 15:59

کروڑوں کے انعامات کی برسات، ارشد ندیم ایف بی آر کے ریڈار پر آگئے

خبر کی تصحیح

ایف بی آر کی ارشد ندیم کی انعامی رقم پر ٹیکس لگانے کی تردید اولمپئین ارشد ندیم کو ملنے والی انعام رقم پر کوئی ٹیکس نہیں لگایا جائے گا، ترجمان ایف بی آر کی وضاحت

ایف بی آر کی ارشد ندیم کی انعامی رقم پر ٹیکس لگانے کی تردید۔ تفصیلات کے مطابق پیرس اولمپک میں پاکستان کو گولڈ میڈل جتوانے والے قومی اتھیلیٹ ارشد ندیم کو ملنے والے انعامات پر ٹیکس لگانے کی خبروں پر ایف بی آر کی جانب سے وضاحت جاری کی گئی ہے۔ ترجمان ایف بی آر کی جانب سے وضاحت کی گئی ہے کہ قومی ایتھلیٹ ارشد ندیم کو ملنے والی انعامی رقم پر کوئی ود ہولڈنگ ٹیکس نہیں لگے گا ، قومی ہیرو ارشد ندیم کے ساتھ ہرممکن تعاون کیا جائے گا۔ ارشد ندیم کوملنے والی انعامی رقم پرکوئی ٹیکس نہیں لگے گا،ارشد ندیم کو ملنے والے انعامات پر انکم یا ود ہولڈنگ ٹیکس کااطلاق نہیں ہوتا اور ..مزید پڑھیے

سابقہ خبر

لاہور (اردو پوائنٹ تازہ ترین اخبار۔ 10 اگست 2024ء ) پیرس اولمپکس کے جیولین تھرو مقابلے میں گولڈ میڈل حاصل کرنیوالے ارشد ندیم بھی فیڈرل بورڈ آف ریونیو (ایف بی آر) کے ریڈار پر آگئے۔ اولمپئین ارشد ندیم پر اولمپکس میں طلائی کا تمغہ جیتنے پر انعامات کی بارش ہوئی تو ایف بی آر بھی حرکت میں آگئی، اس شاندار کامیابی پر وزیراعلیٰ پنجاب سمیت کئی نامور شخصیات نے انعام کا اعلان کررکھا ہے۔

ارشد ندیم کی واپسی آج رات 1 بجے ہوگی جبکہ ان کے آنے سے قبل ہی انعامات کی برسات کا سلسلہ شروع ہوگیا تھا۔ وزیر اعلیٰ پنجاب مریم نواز نے ارشد ندیم کے لیے 10 کروڑ روپے کا اعلان کیا ہے جب کہ حکومت سندھ نے 5 کروڑ روپے، میئر سکھر نے سونے کا تاج اور گورنر سندھ کی جانب سے ایتھلیٹ کو 10 لاکھ روپے کا انعام دیا جائے گا۔

(جاری ہے)

اس کے علاوہ کے الیکٹرک نے ارشد ندیم کے لیے 20 لاکھ روپے، گلوکار علی ظفر، کرکٹر احمد شہزاد جب کہ نجی بینک یو بی ایل نے بھی جیولن تھرور کو 50 لاکھ روپے انعام دینے کا اعلان کیا ہے۔

دوسری طرف ورلڈ ایتھلیٹکس فیڈریشن کی جانب سے گولڈ میڈلسٹ کو 50 ہزار ڈالر کا انعام دیا جائے گا۔ ایف بی آر ذرائع نے نام نہ ظاہر کرنے کی شرط پر ’ایکسپریس نیوز‘ کو بتایا کہ سونے کا تمغہ جیتنے کی خوشی میں حکومت اور دیگر سیاسی و سماجی شخصیات کی جانب سے ارشد ندیم کے لیے اعلان کی گئی رقوم پر ٹیکس عائد ہوگا۔ پہلے جانچ پڑتال کی جائے گی کہ آیا ارشد ندیم ڈیٹا بیس میں بحیثیت فائلر رجسٹرڈ ہیں یا نہیں، اس کے بعد ٹیکس وصولی کا تخمیہ لگایا جائے گا۔ ایف بی آر ذرائع کا کہنا ہے کہ اگر جیولین تھرور فائلر ہیں تو ان پر انعامی رقوم کا 15 فیصد اور نان فائلر ہونے کی صورت میں ارشد ندیم پر مجموعی انعامی رقوم کا 30 فیصد ٹیکس عائد کیا جائے گا۔