پیپلزپارٹی نے میثاق جمہوریت کے بعد میثاق پارلیمنٹ دیا ،عوام کو میثاق معیشت بھی دینگے،سردار سر بلند خان جوگیزئی

این اے 171 رحیم یار خان سے جیالے کی کامیابی سے ظاہر ہے عوام نے پھر پیپلزپارٹی پر اعتماد کا اظہار کیا ہے، سیکرٹری اطلاعات پیپلزپارٹی بلوچستان

جمعہ 13 ستمبر 2024 22:03

کوئٹہ(اُردو پوائنٹ اخبارتازہ ترین - این این آئی۔ 13 ستمبر2024ء) پاکستان پیپلزپارٹی بلوچستان کے سیکرٹری اطلاعات سردار سر بلند خان جوگیزئی نے کہا ہے کہ پاکستان پیپلزپارٹی نے میثاق جمہوریت کے بعد میثاق پارلیمنٹ دیا عوام کو میثاق معیشت بھی دینگے، این اے 171 رحیم یار خان سے پیپلزپارٹی کے جیالے امیدوار مخدوم طاہر رشید کی کامیابی سے ظاہر ہے کہ عوام نے ایک بار پھر پیپلزپارٹی پر اعتماد کا اظہار کیا ہے، پی ٹی آئی نے نفرت جبکہ پیپلز پارٹی نے مفاہمت کی سیاست کو پروان چڑھایا ہے ، نفرت کی سیاست ناکام ہوچکی ہے، یہ بات انہوں نے جمعہ کو کوئٹہ پریس کلب میں پریس کانفرنس کرتے ہوئے کہی ۔

اس موقع پر ڈپٹی انفارمیشن سیکرٹری ملک ذیشان ، ربانی خلجی ، شہزادہ کاکڑ ، نعیم بلوچ ، رحمت اللہ کدیزئی ، حیات خان اچکزئی، عبدالنبی سمالانی سمیت دیگر بھی موجود تھے ۔

(جاری ہے)

سردار سربلندجوگیزئی نے کہا کہ قومی اسمبلی کے حلقہ این اے 171رحیم یار خان میں پیپلز پارٹی نے 52 ہزار ووٹوں کی لیڈ سے پی ٹی آئی کو شکست فاش سے دوچار کیا پنجاب کے عوام پیپلز پارٹی پر پہلے بھی اعتماد کرتے تھے اور اب ایک بار پھر پارٹی پر اعتماد کا اظہار کر رہے ہیں ۔

انہوں نے کہا کہ پاکستان پیپلز پارٹی نے ہمیشہ عوامی خدمت پر یقین رکھا ہے یہی وجہ ہے کہ عوام پیپلز پارٹی کے ساتھ ہیں مخالفین کہتے تھے کہ پنجاب میں پیپلز پارٹی کی وہ پوزیشن نہیں رہی لیکن ضمنی انتخابات یہ ظاہر کر رہے ہیں کہ پاکستان پیپلز پارٹی پنجاب میں مضبوط ہورہی ہے ۔ انہوں نے کہا کہ صدر مملکت آصف علی زرداری اور چیئر مین بلاول بھٹو زرداری کی قیادت میں پاکستان پیپلز پارٹی ملک بھر میں فعال اور مضبوط ہورہی ہے آئندہ عام انتخابات میں پیپلز پارٹی پنجاب سمیت ملک بھر سے بھاری اکثریت سے کامیاب اور چیئر مین بلاول بھٹو زرداری وزیراعظم منتخب ہونگے۔

انہوں نے کہا کہ مرکز میں پاکستان پیپلز پارٹی مسلم لیگ(ن) کی حکومت کی اتحادی ہے پارٹی نے ملک و قوم کے مفاد میں کوئی بھی وزارت نہیں لی اور غیر مشروط طور پر حکومت کا ساتھ دیا ہے تا کہ ملک اور جمہوریت کو استحکام فراہم کیا جاسکے ۔انہوں نے کہا کہ پارلیمنٹ کے اندر سے اراکین کی گرفتاری پر پیپلز پارٹی نے مذمت کی ہے ہم نے ملک کو میثاق جمہوریت اور میثاق پارلیمنٹ دئیے ہیں آنے والے دنوں میں عوام کو میثاق معیشت بھی دیں گے ۔

انہوں نے کہا کہ چیئر مین بلاول بھٹو زرداری کے وژن کے مطابق عوام کو روزگار، وسائل اور ملک و صوبے کو ترقی دینگے،سیاست میں گالم گلوچ کو پروان چڑھانے کی وجہ سے پی ٹی آئی کی مقبولیت کم ہورہی ہے پی ٹی آئی کی منفی سیاست اب ناکامی سے دوچار ہوچکی ہے ۔ایک سوال کے جواب میں انہوں نے کہا کہ پارٹی کی مرکزی قیادت صوبے میں پارٹی کی فعالیت اور مضبوطی کے حوالے فیصلے کر رہی ہے ۔